Шифокорлар Майкл Жексонни ҳаётга қайтариш учун бир соатдан кўпроқ уринишган...

Жаҳон поп мусиқаси қироли - Майкл Жексоннинг дунёдан кўз юмгани бутун дунё бўйлаб оғир йўқотиш ҳис-туйғулари билан кутиб олинмоқда.

Поп юлдузи Мадонна: "Дунё ўзининг энг буюк санъаткорларидан бирини йўқотди. Бироқ унинг мусиқаси абадий яшайди", деб айтган.

Майкл Жексоннинг собиқ рафиқаси Лиза Мари Пресли эса: "Менга шунчалик оғир ва аламлики, ҳатто ҳис-туйғуларим чалкашиб ҳам кетди. Бу кўп томонлама шундай бир фожеаки, уни таърифлашга тил ожиз...",-дея ўз қайғусини изҳор қилган.

Майкл Жексоннинг кўп сонли мухлислари тунни Лос-Анжелес ғарбидаги касалхона ташқарисида ўтказишган.

50 яшар хонанда Беверли Ҳиллсдаги уйида йиқилган ва беҳуш ҳолатда касалхонага олиб кетилган.

Шифохонада унинг юрак хуружидан оламдан ўтгани айтилган.

Аммо, ўлимнинг асл сабабини аниқлаш учун экспертиза ўтказилади.

Ўлимидан ҳали бир неча соат олдин Майкл Жексон қайта саҳнага чиқишини қайд этувчи концертлари учун репетиция қилганди.

Майкл Жексон яқинлари, дўстлари, ҳамкасблари ва мухлисларининг марҳум ҳақидаги хотиралари билан танишиш учун бу ерга босинг

'Оллоҳ ҳар доим Сен билан бирга бўлсин, Майкл'

Пайшанба куни туш пайти Майкл Жексон нафас олишдан тўхташи ортидан Беверли Ҳиллсдаги уйига тез ёрдам чақирилган.

Кейин у Лос-Анжелесдаги Калифорния университети касалхонасига олиб кетилган, икки соатлар ўтиб эса, оламдан ўтгани эълон қилинган.

Акаси Жермэйн Майкл Жексоннинг юрак хуружи туфайли дунёдан кўз юмганига ишонишини айтган.

Жермэйн Майкл укасининг ўлими ҳақида

Қўшиқчи ўтмишда соғлиғи юзасидан қатор муаммоларни бошидан кечирган. Ва у 13-июлдан бошлаб Буюк Британияда қатор концертлар учун келиши кутилаётган эди.

Келаси ойга мўлжалланган концерт бир неча кун ортга сурилиши Майкл Жексоннинг саломатлиги юзасидан хавотирларга туртки берган, бироқ тадбир уюштирувчилари буни фақат ташкилий масалаларга боғлиқлигини айтишганди.

Жексонлар оиласи номидан гапирган Жермэйнга кўра, шифокорлар қўшиқчини ҳаётга қайтариш учун бир соатдан кўпроқ уринишган, бироқ бу ҳаракатлар зое кетган.

Шунингдек у матбуотдан "ушбу оғир дамда ички оилавий дахлсизликларини ҳурмат қилиши"ини сўраган.

"Оллоҳ ҳар доим Сен билан бирга бўлсин, Майкл. Мен Сени яхши кўраман",-деб айтган Жермэйн Жексон.

Майкл Жексоннинг унутилмас дақиқалари

'Қўшиқчи мунтазам оғриқ қолдирувчи дори қабул қилган'

Жексоннинг оилавий ҳуқуқшуноси Брайн Оксман Америка телевидениесига қўшиқчининг оғриқни қолдирувчи дори қабул қилишидан хавотирда бўлганини айтган.

Жаноб Оксманга кўра, Жексон фаолияти бошларида саҳнада йиқилиб тушиши оқибатида олган жароҳати, жумладан суяги сингани учун оғриқ қолдирувчи дори тавсия қилинган.

"Бу унга жуда кучли оғриқ берарди. У эса, бу каби безовталикни ёқтирмасди. Оғриқ қолдирувчи дори қабул қила бошлади. Кейин бу унинг ҳаёти бир қисмига айланди", -деб айтган Брайн Оксман.

Ҳозир Майкл Жексоннинг жасади Калифорния университети касалхонасидан Лос-Анжелесдаги ногаҳоний ўлимлар бўйича текширув олиб борувчи суд-тиббиёт экпертиза идорасига олиб кетилган. Текширувлар жума куни ўтказилиши айтилганди.

Қўшма Штатлар расмийлари тиббий экспертиза хулосалари тайёр бўлиши учун 8 ҳафтагача вақт кетиши мумкинлигини айтишган.