Масъуллар янги офатга қарши қўлларидан келганча кураш олиб бораётганликларини айтишмоқда

Жаҳон Соғлиқни сақлаш ташкилоти Мексикада аниқланган янги турдаги ҳалокатли чўчқа тумови жиддий экани ва кенг кўламли эпидемия тусини олиш хавфи борлиги билан огоҳлантирган.

Халқаро ташкилот раҳбари Маргарет Чен хонимлари дунё ҳукуматлари ушбу хасталик хавфидан ҳушёр туришлари лозимлигини билдирган. У Вашингтонга сафарини тўхтатиб, Женевага қайтиб келган.

Чен хоним мазкур тумовга қарши кўрилажак зарурий чора-тадбирларни тиббиёт экспертлари билан муҳокама қилмоқда. Ташкилот тавсияларининг сал кечроқ эълон қилиниши кутилмоқда.

Айрим хабарларга кўра, мазкур хасталик аллақачон 60 га яқин кишининг умрига зомин бўлган. Яна минг нафари ушбу касалликка чалинган.

Маҳаллий мутахассисларга кўра, касалликка асосан 25 ва 45 ёшлар атрофидаги эркаклар чалинишмоқда ҳамда бунинг сабабини била олмай ҳалаклар.

Уларнинг айтишларича, ҳозир ёш болалар ва кексаларнинг аҳволлари хусусида ҳам бош қотиришмоқда.

Мексика Президенти Фелипе Кальдерон янги хасталикни жиловлаш учун қўлларидан келган барча ишни қилаётганликларини айтган.

Мамлакат Соғлиқни сақлаш вазирлиги миллион дозада ушбу хасталикка қарши мўлжалланган дори-дармонлар билан таъминланган.

Улкан шаҳар ҳувиллаб қолган

Мексикада бўлган мухбиримизнинг хабар беришича, дунёнинг аҳоли энг зич яшайдиган ва энг гавжум шаҳри бўлмиш пойтахт Мехико янги турдаги тумов хасталиги сабаб ҳувиллаб қолган.

Унга кўра, фуқаролар ҳукуматнинг огоҳлантиришларига қулоқ тутиб, уйда тинчгина ўтириш, бошқа одамлар билан мулоқот қилмасликни афзал билишмоқда.

Мактаб, олий ўқув юртлари вақтинчалик ёпиб қўйилган, оммавий тадбирлар, театр намойишлари,..бекор қилинган.

Маҳаллий мутахассислар хасталикнинг ёйилиш кўламини назорат этиш ва унга чалинган кишилар сонини аниқ билиш ҳаракатида эканликларини айтишмоқда.