---

ЯНГИ САЙЛОВЛАР ЯНГИ ЎЗГАРИШЛАР ДАЛОЛАТИМИ?

---

Мен Бахтиёр Ҳасан, 1970 йилда туғилганман, Андижон шаҳридан, ёшим 37 да, ҳозирги пайтда бошпана сўраб, Украина давлатига келганман:

Бахтиёр Ҳасан: Менинг бу президентлик сайловларида ҳеч қандай қатнашиш ниятим ва ҳаракатим ҳам йўқ. Нима сабабдан дейдиган бўлсак, бу сайловлар ноқонуний, чунки конституциянинг 90-моддасида аниқ, равшан айтиб қўйилган: президент икки марта сайланади, холос. Январда "уже" янги президент билан чиқишимиз керак эди. Президентлик сайлови ўтган йилнинг декабр ойида ўтказилиши керак эди. Ҳамма ёқ жим-житлик. Давлат ўзининг бутун олиб борган сиёсати билан яна бир бор аниқ-равшан қилиб кўрсатаяптики, давлат шахсан Ислом Абдуғаниевичнинг қўлида. Энди, бу конституцияни ким бузаяпти? - Албатта, Ислом Абдуғаниевич Каримов. Ўзбекларнинг бир мақоли бор-ку, балиқ бошидан,..деган. Демак, биз, яъни халқимиз ҳам айниётгандек бўлаяпмиз мана шу сайловга келиб, президент номзодини сайлаш билан.

Би-би-си: Лекин бу галги президентлик сайловларида бир эмас, тўртта номзоднинг иштирок этиши кутилмоқда. Бу каби ҳолат, масалан, Ўзбекистоннинг мустақиллик тарихида кузатилмаган. Сиз учун мана шунинг ўзи демократик янгиланишлар, ўзгаришлар далолати эмасми?

Бахтиёр Ҳасан: Улар ҳеч нарса қила олишмайди. Бу - хўжакўрсинга қилинаётган ишлар. Аён-ку, улар ҳеч қачон юта олишмайди. Ёки номзодлардан Дилором Тошмуҳамедова,..гапини эшитинг, президентлик сайловларида ким ютмасин, Ислом Абдуғаниевич ютадими, биз ишонамиз, Ўзбекистонимиз ривожланади. Хўш, нимага бошқа номзодларнинг исмини айтмайди? Номзодлар очиқдан-очиқ ўзларининг заифликларини кўрсатиб қўйишяпти. У ҳозир Ғарб билан мулоқотни тикламоқчи. Бу фақат четга кўрсатиш учун, мана, бизда демократия бўлаяпти, мана, менга тўртта мухолиф номзод бор, мен ютишга ҳаракат қиламан, халқим мени танлайди, деб кўрсатиш.

Би-би-си: Сизнинг назарингизда, янги президент ким бўлишидан қатъий назар, Ислом Каримов бўладими ёки бошқа, у ҳал қилиши, амалга ошириши керак бўлган, энг долзарб ислоҳотлар нималардан иборат ва қайси соҳаларда амалга оширилиши керак?

Бахтиёр Ҳасан: Янги президент ким бўлмасин, мен биламан, бу - барибир ҳам Ислом Абдуғаниевич бўлади, ислоҳотлар бўлмайди. Нимага деганда, шунча 15 йил давомида ислоҳотлар бўлдими, айтинг? Ёки ўзбекнинг бири икки бўлдими? Шу Ўзбекистонда қуриб қўйганимиз битта DAEWOO ширкати бўлди, холосми? Мана, биз Андижонда биламиз, нима ишлар бўлаяпти бу заводнинг ичида...Шунинг учун ислоҳотлар...Агар нима қилиш керак бўладиган бўлса ҳам, албатта, биринчи бўлиб демократик тизимни йўлга қўйиш керак. Келажагимиз агар яна шундай давом этар экан, бизнинг яна орқага қайтишимиз аён бўлиб турибди. Лекин биз қачонгача буни сабр-тоқатлик билан кутамиз...

Эътиборингизга ҳавола этилаётган мавзу юзасидан ўз фикру мулоҳазаларингизни билдирмоқчи бўлсангиз, бизнинг электрон манзилимиз: [email protected] га мактуб жўнатишингиз ёки саҳифанинг ўнг томонидаги махсус формадан фойдаланишингиз мумкин.