Моҳира Асадова, ўзбекистонлик эстрада жанрида ижод қилаётган хонанда:

Шахсан ижодкор сифатида мен бугунги мустақиллигимиздан ниҳоятда миннатдорман. Сабаби, жуда катта ютуқлар ва имкониятларга эга бўлдик.

Президентимиз ёш ижодкорларни рағбатлантириш ниятида "Ниҳол" мукофотини таъсис этдилар.

Қолаверса, миллий қўшиқчилигимиз, мақомларимиз, халқ қўшиқлари, лапарларимиздан ташқари, миллий эстрада жанрида ижод қилишга ҳам имкониятлар жуда катта.

Хусусан, бугунги кунда нафақат Ўзбекистон телевидениеси ёки радиолари, балки хусусий радиолар ва хусусий теле-марказлар очилдики, бу ҳам бизнинг ижод қилишимизга қанақадир имконият яратиб берди.

Нафақат бизнинг юртимизда, балки шахсан мен ўзим дунё бўйлаб ўзбек санъанатини тарғиб этиб юрибман.

Мисол учун, Бирлашган Миллатларнинг ЮНЕСКО жамғармаси томонидан Жанубий Кореяда ўтказилган катта мусиқий фестивалда иштирок этиб, 56 давлатнинг ичида Гран-при соҳибаси бўлдим. Бу ҳам мустақиллигимизнинг шарофати билан.

Авваллари биз Москва орқали, катта бир тўсиқлар билан, катта бир текшир-текширлар орқали чет элга чиқсак, бугун имконият бемалол.

Ўзбекистонда олтинчи марта "Шарқ тароналари" халқаро мусиқий фестивали бўлиб ўтмоқда.

Бу ҳам аввалбошда мустақиллигимизнинг маҳсули бўлса, қолаверса дунё тан олаётгани ва дунёнинг барча санъаткорлари мана шу юртга кириб келиб, ўзларининг кучларини, ўзларининг санъатларини, меҳнатларини намойиш қила олишлари ҳам мана шу мустақиллигимизнинг натижасидир.

Бугунги кун мустақиллигимизнинг бир вакиласи, мана шу гўзал Ватанимизнинг бир ижодкор қизи сифатида фахр билан айта оламанки, 16 йил жуда қисқа фурсат бўлса ҳам, ана шу 16 йил ичида катта муваффақиятларга эришдик.

BBCUzbek.com нинг янги лойиҳасида иштирок этиш ва эътиборингизга ҳавола этилаётган мавзу юзасидан ўз фикру мулоҳазаларингизни билдирмоқчи бўлсангиз, бизнинг электрон манзилимиз: [email protected] га мактуб жўнатишингиз ёки саҳифанинг ўнг томонидаги махсус формадан фойдаланишингиз мумкин.