Мен Муҳаммад Солиҳман, "Эрк" демократик партиясининг раҳбари сифатида сиёсий фаолият кўрсатаяпман. Бўш вақтларимда шеър ёзаман, шу йил 58 ёшга тўламан.

Афсуски, на ташқи сиёсатда ва на ички сиёсатда бу ҳукуматнинг эришган ютуқларидан кўра, кўрсатган ожизликлари кўпроқ яққол кўзга ташланаяпти.

Ҳолбуки, 1991 йил Ўзбекистон Шўро жумҳуриятлари ичида "реформа"ларга энг тайёр бўлган жумҳуриятлардан бири эди. Инфраструктураси жуда яхши эди. Иқтисоди ҳам бошқа жумҳуриятларникига қараганда соғлом ва мустаҳкам эди. Табиий заҳиралари жиҳатдан ҳам ҳозирлиги яхши бир ўлка эди.

Аммо бугун 16 йил мустақиллик ортидан назар ташлайдиган бўлсак, бу жумҳуриятларнинг ҳаммасидан ортда қолган бир ўлка бўлиб кўринаяпти Ўзбекистон.

Балки Тошкентда баъзи бир қурилишлар бўлиб, хўжакўрсинга қилинаётган айрим ялтироқ ишлар манзарасида мамлакат аҳолисининг аксарият қисми қашшоқлик мезонларидан пастроқ даражада турмуш кечираяпти. Буни фақат биз мухолифат эмас, балки ташқаридан кузатаётган бошқа кузатувчилар ҳам кўриб туришибди.

Эсингизда бўлса, 1991 йил "Бирлик" ва "Эрк" ҳаракати рўйхатга олинган ҳамда расмий партия, расмий ҳаракат сифатида фаолият кўрсатишганди. Ҳатто, "Эрк" партиясининг парламентда фракцияси ҳам бор эди.

Бугун нафақат парламентда, балки Ўзбекистонда легал фаолият кўрсатишнинг йўли ҳам беркитилган мухолифатга...

Ўрта Осиё халқларининг орасида ўзбеклар жуда ўтроқлашган ва қаттиқ бир фожеавий сабаб бўлмаса, ўз Ватанидан ҳеч ажралишни истамайдиган бир халқ.

Бошқа миллатларнинг миграцияси билан Ўзбекистондаги ўзбекларнинг миграциясини ҳеч тенглаштириб бўлмайди. Чунки бизники фақат иқтисодий эмас, зулмдан, сиёсий "репрессия"лардан кўпроқ чиқиб кетаяпти.

21-асрда яшаяпмиз. Ҳеч бир ўзини "изоляция" қилган ўлка ҳеч қачон фаровонликка эриша олмайди. Ўзини изоляция қилаётган Ўзбекистон бугун ўзини фаровонлик ва демократик эркинликлардан ихота қилаяпти. Шунингдек, бу эркинликлардан қўрқаяпти.

Фаровонликдан ҳам қўрқаяпти, чунки фаровонликка эришган миллат давлатнинг босимидан озод бўлади. Ҳатто 1993-94 йилларда озгина бўй кўрсатган сиёсий либерализация ҳам бугун йўқ. Масалан, ҳозир учта одам кўчага чиқиб пикет қилаолмайди.

Лекин 1994-95 йилларда одамлар пикет қилишлари мумкин эди, "протест" қилиб. Бугун у ҳам йўқ.

BBCUzbek.com нинг янги лойиҳасида иштирок этиш ва эътиборингизга ҳавола этилаётган мавзу юзасидан ўз фикру мулоҳазаларингизни билдирмоқчи бўлсангиз, бизнинг электрон манзилимиз: uzbek@bbc.co.uk га мактуб жўнатишингиз ёки саҳифанинг ўнг томонидаги махсус формадан фойдаланишингиз мумкин.