Мен шуни айтишим мумкинки, ўтган 16 йил мобайнида жуда ҳам катта муваффақиятларга эришилди. Профессионал бокс бўйича дунёга машҳур тўртта йўналиш бор. Шу йўналишлардан биттаси бўйича жаҳон чемпионининг ўзбекистонлик эканидир. Ҳамюртимиз Руслан Чагаевнинг ҳозир амалдаги чемпион экани бизнинг жуда ҳам катта катта ютуғимиз деб айтган бўлардим.

Шунингдек, шахмат оламида "Халқаро шахмат уюшмаси" таснифи бўйича жаҳон чемпиони ҳам ҳамюртимиз Рустам Қосимжоновдир.

Бошқа собиқ Шўро республикалари ичида бу каби кўрсаткичларга эришганлари жуда ҳам кам.

1994 йилги Қишки Олимпиадада Лина Черязова Олтин медаль олди. Ундан кейин 2000 йилги Сиднейдаги Ёзги Олимпиада ўйинларида Олтин медалларни қўлга киритишни бошладик. 2004 йилда эса Олтин медалларимизнинг сони янада кўпайди.

Шунингдек, кик-боксинг, самбо, бокс, эркин ва юнон-рим куршлари бўйича жаҳон чемпионлиги...Мен ҳали Осиё чемпионатини айтаётганим йўқ. Осиё чемпионати ва қитъа ўйинларида бизларда умуман ўнлаб жаҳон чемпионлари бор.

Футбол бўйича 1994 йилги Осиё Ўйинлари ғолиби бўлдик. Қўлга киритилган натижалардан ташқари, миллий курашимиз бутун дунёда тан олинди. Ҳозир дунёнинг элликдан ортиқ давлатида миллий кураш бор.

Шу жиҳатдан олиб қаралганда, 16 йиллик қисқа фурсат ичида биз жуда ҳам катта ғалабаларга эришдик деб бемалол айта оламан.

Бой берилган имкониятлар дейилганда, бизнинг чим устида хоккей бўйича "Андижанка" деган жуда ҳам яхши жамоамиз бор эди. Собиқ Иттифоқ терма жамоасининг асосини ташкил қиларди. Ана шу жамоамиз йўқ бўлиб кетди.

Шунингдек, от спорти, камондан ўқ отиш, гимнастика, велоспорт турларида жаҳонга довруғи таралган спортчиларимиз бор эди. Ана шу анъана давом этмай қолди.

Яна жамоавий спорт турлари-баскетбол, волейбол, қўл тўпи...Шу жиҳатдан ҳам бизларда озгина оқсаш бўлди.

Биринчи навбатда федерацияларга боғлиқ. Қайси федерация масалан, яхши ишласа, тадбиркорлар билан бирга ишлаб, ҳомийлар топиб, спортчиларни кўпроқ хорижга жўнатган федерацияларда асосан ютуқ бор. Баъзи бир иши бўшашган федерациялардан эса, албатта, етук спортчилар чиқмайди.