Абдувоҳид Ҳайит, филология фанлари номзоди, шоир, ёшим 40 да.

Менимча, мустақилликдан кейинги 16 йил ичида адабиёт инқирозий ҳолатга юз тутди.

Мустақилликдан аввалги қайта қуриш йилларини оладиган бўлсак, ўша пайтда адабиётда янгича бир тўлқин, шиддат билан қандайдир бир "импульс" пайдо бўлганди, деб айтиш мумкин.

Лекин бошланган ҳаракат 92-93-йилларга бориб, нимагадир сўниб қолди. Буни кўпчилик адабиётчилар кузатишди, айтишди...

Ҳақиқатни ёзган адабиётчилар, адиба, шоирларга нисбатан таъқиблар ва цензуранинг мавжудлиги, албатта, адабиётнинг ҳам қандайдир бир қолипга тушиб қолишига сабаб бўлди дейиш мумкин.

Умуман, жамиятда адабиётга бўлган қизиқиш сусайди. Идеаллар ўзгарди, менимча. Бу нарса жуда кўп ёзувчиларнинг қалам тебратмай қўйганларида кўринади. 16 йил ичида саноқли асарлар яратилди, албатта. Лекин аввалгидек суръатдаги жараён кузатилмаяпти.

Илгари одамлар Комил Инсонга интилиб яшашган бўлса, ҳозирги авлоднинг тафаккурида адабиётга ўрин йўқ, адабиётга ажратилган ўрин жуда ҳам камайиб кетаяпти.

Кейин яна ўша адабиётчи, умуман маъанавият одами сиймосининг ҳозир жамиятда энг сўнгги поғоналарга тушиб қолганлиги ҳам адабиётнинг, адабиётга қўшиб, бошқа маънавий соҳаларнинг ўлимига сабаб бўлаяпти деб ўйлайман.

Қандайдир асарлар яратилаётган бўлиши мумкин, балки уни бугун биз кўрмаётган бўлишимиз мумкин ва эртага чиқиб қолар эҳтимол...

Энди бу даврда таржимачиликка озми-кўпми эътибор берилаяпти ва жаҳон адабиётидан анча-мунча асарлар ўзбек тилига таржима қилинди. Мана шу нарсаларни ижобий томонлари деб айтиш керак, албатта.

BBCUzbek.com нинг янги лойиҳасида иштирок этиш ва эътиборингизга ҳавола этилаётган мавзу юзасидан ўз фикру мулоҳазаларингизни билдирмоқчи бўлсангиз, бизнинг электрон манзилимиз: uzbek@bbc.co.uk га мактуб жўнатишингиз ёки саҳифанинг ўнг томонидаги махсус формадан фойдаланишингиз мумкин.