Алматовни Андижонда намойишчиларга ўт очган ҳарбийларга раҳбарлик қилганликда айблашаётир

Олмонияда саратон хасталигидан даволанаётгани айтилган Ўзбекистон Ички ишлар вазири Зокиржон Алматов, уни жиноий жавобгарликка тортиш чақириқларидан кейин мамлакатдан чиқиб кетган.

Ички ишлар вазири Зокиржон Алматовнинг Андижон воқеалари туфайли Оврупо Иттифоқи мамлакатларига кириши таъқиқланган, бироқ Олмония инсонпарварлик нуқтаи назаридан унинг мамлакатда даволанишига рухсат этганди.

Шундан сўнг БМТ ва инсон ҳуқуқлари ташкилотлари Берлиндан вазирга нисбатан жиноий иш қўзғашни талаб қилдилар.

Алматовга қарши ариза топширган саккиз Ўзбекистон фуқароси ҳимоячисининг айтишича, бу иш очиқлигича қолган.

Ўзбекистон фуқаролари, жаноб Алматов, инсонларни қийноққа тутиш ҳолатлари ва Андижон қирғинидаги ўрни учун жавоб бериши керак, дейдилар. Уларнинг ҳимоячиси Волфганг Калекнинг Би-би-сига маълум қилишича, жаноб Алматов иши кўрилаётган Ҳанновер шаҳрини тарк этганидан кейин унга қарши очилган жиноят иши ёпилгани йўқ.

Волфганг Калек олмон терговчиларига мурожаат қилиб, терговни тўхтатмасликка чақирган ҳамда вазирнинг мамлакатдан чиқиб кетишига нима учун рухсат берилганини сўраган.

Ҳарбий база

Жаноб Алматов, гувоҳларнинг айтишларича, Андижонда норозилик намойишига чиққан оломонга қарши пала-партиш ўт очиб беш юз ё ундан ҳам кўп одамни ўлдирган ҳарбийлар қўмондони бўлган.

У Андижон қирғинида тутган ўрни боис, Оврупо Иттифоқига кириши таъқиқланган 12 ўзбек мулозими рўйхатининг бошида турибди.

Ўзбек расмийлари, Андижонда 187 киши ҳалок бўлган, уларнинг ҳам аксарини ғалаённи ташкил қилган исломий жангарилар ўлдирган, деб келади.

Душанба куни БМТнинг қийноқлар бўйича махсус маърузачиси Манфред Новак, Берлинни инсон ҳуқуқларини ҳимоя қилиш ташкилотлари илгари сурган айбловларни тергов қилишга чақирган, Алматов жаноблари "қийноққа оид жиноятлар" учун савол-жавоб қилиниши кераклигини айтганди.

Уч йил илгари БМТнинг қийноқлар бўйича олдинги маърузачиси, қийноқлар Ўзбекистонда мунтазам қўлланилади, деган хулоса берганди.

Андижондаги воқеалар юзасидан расмий Тошкент АҚШ танқидига учраганидан кейин Ўзбекистон Қўшма Штатлари ҳарбий базасини ёпди.

Олмониянинг кичик сонли ҳарбий қўшинлари ўзбек-афғон чегарасидаги Термиз шаҳрида жойлашган.