Новак: Мендан олдинги маърузачи Ўзбекистонда қийноқлар мунтазамий, деган хулосага келган

Бирлашган Миллатлар Ташкилотининг қийноқлар бўйича махсус маърузачиси Манфред Новак Олмонияда даволанаётган Ўзбекистон Ички ишлар вазири Зокиржон Алматовни қийноқлар қўлланиши юзасидан жиноий жавобгарликка тортиш керак, деб ҳисоблайди.

Ана шу мазмундаги баёнот билан Манфред Новак Олмонияда паноҳ топган бир неча ўзбекистонлик Ички ишлар вазирини жиноий жавобгарликка тортишни сўраб 12 декабр куни Олмония Федерал прокуратурасига ариза топширганидан кейин чиққан.

Ўз баёнотида жаноб Новак БМТнинг қийноқлар бўйича олдинги махсус маърузачиси Тео ван Бовеннинг 2002 йили Ўзбекистонда бўлиб, бу мамлакатда қийноқлар мунтазам қўлланилади, деган хулосага келганини эсга олади.

Жиноятларнинг катта-кичиклигига қарамасдан - бу давлатга қарши қаратилган бўладими ёки оддий кичик жиноят эканига қарамасдан қийноқлар қўлланаверади, дея қўшимча қилган махсус маърузачи.

Манфред Новак жаноблари 2005 йил июлида БМТнинг Инсон ҳуқуқлари бўйича Олий комиссарлиги Андижон воқеалари юзасидан тайёрлаган ҳисоботга ҳам тўхталган.

Ҳисоботда Ўзбекистон куч тизимлари намойишчиларни тарқатишда жиддий инсон ҳуқуқлари бузилишига йўл қўйгани айтилади.

Инсон ҳуқуқларини ҳимоя қилиш бўйича Халқаро Амнистия ва Хюман Райтс Уотч ташкилотлари Олмонияда саратон хасталигидан даволанаётган Ўзбекистон Ички ишлар вазирини тергов қилиш чақириқлари билан чиққан, Андижон воқеаларидан омон қолган саккиз нафар ўзбекистонлик Олмония Федерал прокуратурасига Зокиржон Алматовни жиноий жавобгарликка тортиш ҳақида даъво аризаси топширганди.