Зокиржон Алматов Оврўпога кириши таъқиқланган мулозимлар рўйхатининг бошида

Халқаро Амнистия инсон ҳуқуқлари ташкилоти Олмонияда даволанаётган Ўзбекистон Ички ишлар вазири Зокиржон Алматовни сўроқ қилиш, лозим бўлса, ҳибсга олишга чақирган.

Ташкилотнинг Олмониядаги бош котиби Барбара Лохбилер Олмониянинг Федерал прокурори Кай Нийм Андижонда 13 -майда содир бўлган қонли воқеалар юзасидан жаноб Алматовни тергов қилиш ва халқаро қонунлар тақозо қилгани тақдирда уни ҳибсга олишга мажбур эканини айтган.

Рейтерс хабар агентлиги Халқаро Амнистия мулозимининг "фуқароларга қарши мунтазам ҳужумлар "инсониятга қарши жиноят" саналади" деган сўзларини келтирган.

Инсон ҳуқуқлари ташкилоти чиқарган баёнотда, Олмония, шунингдек, Бирлашган Миллатлар жорий этган қоидаларга биноан, Ўзбекистондаги қийноқлар борасидаги даъволарни ҳам текшириши кераклиги айтилади.

"Ҳибсга олинган ҳар бир ўзбек қийноққа солиниши мумкин. "Иқрорликлар" кўпинча қийноқлар остида олинади ва кейинроқ узоқ йиллик қамоқ жазолари учун асос бўлади", деб айтган Халқаро Амнистия вакили.

Олмониянинг Федерал прокуратураси ушбу баёнотга хали ҳеч қандай муносабат билдирмаган.

Виза таъқиқи

Саратон хасталигига дучор бўлгани айтилган Ўзбекистон Ички ишлар вазири Зокиржон Алматов Оврўпо Иттифоқининг ўтган ой ўзбек мулозимларига нисбатан жорий этган виза таъқиқига қарамай, Олмонияга даволаниш учун борган.

Олмония мулозимлари жаноб Алматовга "инсонпарварлик" нуқтаи назаридан виза берилгани ва муолажадан сўнг унинг Олмонияни тарк этишини айтишган.

Оврўпо Иттифоқи ўз ҳудудига киришлари таъқиқланган 12 нафар ўзбек мулозимларининг "Андижондаги воқеаларга тўғридан-тўғри алоқадор" эканликларини айтган.

Таъқиқланганлар рўйхатида Алматов билан бирга, Ўзбекистон Миллий хавфсизлик хизмати раҳбари Рустам Иноятов ва эндиликда собиқ мудофаа вазири Қодир Ғуломовлар ҳам бор.