НАТО Афғонистондаги амалиётларда Ўзбекистон ҳудудидан фаол истифода қилиб келган

НАТО расмийларининг маълум қилишларича, Ўзбекистон НАТО давлатларига қўшни Афғонистондаги амалиётларни қўллаб -қувватлаш мақсадида ўзининг ҳаво ҳудудидан фойдаланишни таъқиқлаган.

НАТО дипломатларига кўра, Ўзбекистон ҳукумати 1-январга қадар НАТО давлатларидан ўз кучларини олиб чиқиб кетиш ва ҳаво ҳудудидан фойдаланишни тўхтатишни талаб қилган.

Ушбу қарор Ўзбекистон жанубидаги Термез ҳаво қўналғасида бир неча юз аскарларини жойлаштирган Олмонияга таъсир кўрсатиши мумкин.

НАТОнинг Брюсселдаги воизи зарур бўлгани тақдирда Термездаги база ва Ўзбекистон орқали ўтадиган ҳаво йўналишига муқобилнинг топилишини айтган.

Ассошэйтед Пресс ахборот агентлиги Шимолий Атлантика Иттифоқи мулозиминиг "Афғонистондаги амалиётларимизни қўллаб-қувватлаш салоҳиятимиз камаймайди" деган сўзларини келтирган.

Аммо Ўзбекистон ва Олмониядаги баъзи манбаъларга кўра, расмий Тошкент Олмония ўз кучларини сақлаб қолиши мумкинлигига ишора қилган.

Ҳозирга қадар олмон расмийлари Термездаги ҳарбий базадан фойдаланишда давом этишга умид қилаётганликлари ва ўзбек расмийлари билан музокараларнинг бораётганини маълум қилишган.

Термездаги ҳаво қўналғасида Олмония билан бирга, яна бир неча Оврўпо давлатлари ўзларининг кичик сондаги ҳарбий контингентларига эга экани айтилади.

Аввалроқ Швеция Ўзбекистон ҳукуматининг Андижон воқеалари юзасидан халқаро терговга рухсат бермаганлиги важидан Термездан ўз аскарларини олиб чиқиб кетишини айтган эди.

Афғонистонда 8 мингга яқин кучларига эга бўлган НАТО 2001-йилдан буён Ўзбекистон ҳудудидан фаол истифода этиб келган.

Жавоб қадами

	Шу ҳафта АҚШ кучлари Қарши яқинидаги Хонобод базасини тарк этган

Иттифоқ рамий Тошкентнинг Андижон воқеаларини текширишда халқаро ҳамкорлик чақирикларини рад этиши ортидан ўтган ҳафта ҳукуматнинг 12 нафар мулозимига Оврўпо давлатларига киришни таъқиқлаган.

Оврўпо Иттифоқи тарқатган баёнотда ораларида Ички ишлар вазири ва Миллий хавфсизлик хизмати раҳбарлари бўлган 12 кишининг Андижондаги хунрезликларга бевосита алоқадорликлари айтилади.

Виза таъқиқи эълон қилинишидан бир кун ўтиб, рўйхат бошида турган Ички ишлар вазири Зокиржон Алматов Олмониянинг Ханновер шаҳридаги шифохонада саратон касалидан даволанаётгани маълум бўлган.

Олмония расмийлари Ўзбекистон Ички ишлар вазирига инсонпарварлик нуқтаи назаридан виза берилганини айтиб, унинг муолажа тугаши билан Олмонияни тарк этишини маълум қилишган.

"Фергана.ру" ахборот агентлиги Тошкентдаги Олмония элчихонаси Зокиржон Алматовга биринчи марта рад жавоби бергани, аммо ҳукумат расмийлари Термездаги ҳарбий базани ёпиш билан таҳдид этганларидан сўнг, виза берилгани ҳақида ёзган.

Сешанба куни Бирлашган Миллатларнинг Бош Ассамблеяси Ўзбекистон борасида Оврўпо Иттифоқи илгари сурган резолюция лойиҳасини маъқуллаган.

Резолюцияда Ўзбекистон ҳукуматини Андижонда хунрезликларга шоҳид бўлганларга қарши таъқибларни тўхтатиш ва гумондорларга нисбатан адолатли маҳкамани таъминлашга чақирилади.