Бахтиёр Ҳамроев уйидан чиқса, уни қўриқлаётган милиция ходимининг "калласи кетади"...

Ўтган ҳафтада “Озодлик” радиоси мухбири калтакланган, жиззахлик инсон ҳуқуқи ҳимоячиси ғойиб бўлган, мухолифат вакиллари уйларидан чиқарилмаяпти.

Ҳуқуқлари поймол этилгани ҳақида шикоят билан мурожаат қилган кишининг уйига йўл олган Бахтиёр Ҳамроевни жиззахлик милиционерлар тўхтатиб ҳеч қаёққа бормасликка кўндирганлар.

- Сиз уйингиздан бирор жойга чиқадиган бўлсангиз, «бизнинг калламиз кетади”,-дейишган милиционерлар.

Жиззах шаҳри марказидаги кўп қаватли уйлардан бирида истиқомат қиладиган норасмий Ўзбекистон Инсон ҳуқуқлари жамияти фаоли Бахтиёр Ҳамроев, уйи атрофини «уч машинада қўриқлашаётганини” айтади.

Мухолифатдаги “Озод деҳқонлар” партияси аъзоси ҳамда инсон ҳуқуқи ҳимоячиси Елена Урлаева эса Тошкентнинг Мирзо Улуғбек тумани милиционерлари уйига кириб олиб, шифохонага даволаниш учун боришига тўсқинлик қилганларини гапиради.

Ҳали апрель ойида ҳокимият ва ҳуқуқ-тартибот идоралари раҳбарлари «Эзгулик” жамиятининг Зомин туман бўлими раҳбари Улуғбек Каттабоевнинг ширкатлардан бирининг мол-мулкини ноқонуний ўзлаштиришга урингани ҳақида гапиришган, июнь ойида эса Каттабоев фирибгарликда айбланиб унинг устидан жиноят иши қўзғатилганди.

Инсон ҳуқуқи фаолининг аёли турмуш ўртоғининг 29 июндан буён қаердалигини билмаслигини айтади.

Бугунгача кўплаб инсон ҳуқуқлари фаоллари милиция бўлимига асоссиз чақиртирилиб шубҳали ҳужжатларга имзо чекишга мажбур этилаётганлари, уйларига солиқ, табиий газ ёки сув ҳақини тўлаттиришга мажбурлаш учун тегишли идоралар ходимлари жўнатилаётганларидан сўзлайдилар.

Мухолиф ёки ўзгача фикрлайдиганларнинг ўзларига эмас, қариндошларига босимлар уюштирилаётган ҳоллар ҳам кучайган.

Тошкентлик журналистлардан бири кекса нафақахўр онасига маҳалла фаоллари дўқ-пўписа қилиб, «бу ердан кўчириб юбориш» билан таҳдид қилаётганларини айтади.

- Ваҳоланки, бир қанча қўшнимизнинг квартира ҳақларидан катта миқдорда қарздорлиги бор пайтда биз ҳамма хизматлар ҳақини олдиндан тўлаб қўйганмиз, дейди журналист.

1 июл куни Ховос туманидаги маҳкамадан қайтаётган “Озодлик” радиосининг Сирдарё вилояти бўйича мухбири Лобар Қайнарова ўз уйи остонасида 2 номаълум аёл ва 1 эркак томонидан қаттиқ калтакланиб шифохонага ётқизилган.

Ҳужум қилганлар радиожурналистнинг ёзув ускуналарини олиб кетганлар. Сирдарёлик инсон ҳуқуқларига босимлар бўлаётгани тўғрисида эшиттиришлар тайёрлаганидан кейин Лобар Қайнарова, “сиёсий мавзуларда лавҳалар тайёрламаслиги лозимлиги, акс ҳолда ўзига ёмон бўлиши» ҳақида огоҳлантирилганини айтади.

Ҳуукуматнинг ўзгача фикрловчиларни жиловлаш йўлида тутаётган усуллари, мамлакатда қораланадиган Шўролар Иттифоқи усулларидан фарқ қилмайди, баъзида эса Шўролар давридаги тазъйиқлар ҳолвага айланмоқда, дейишади инсон хуқуқлари фаоллари...

Матбуотда эса, Андижон воқеаларидан кейин Ғарб давлатларининг Ўзбекистон мустақиллигини кўра олмаслиги, ҳукуматни танқид қилаётганлар “ватанпарварлик туйғуси йўқ”, “ватанини хорижнинг 3-4 тангасига сотишга тайёр” қабилидаги ибораларга тўла мақолалар кўпайган.

Кейинги ҳафталарда эса , бу « даҳанаки” ҳужумлар тобора зўравонлик кўриниши касб этмоқда.

Сал аввалроқ мустақил журналист Улуғбек Ҳайдаров ҳам Жиззахда калтаклаб кетилганди.