Ҳамроевни Каримовга сотқинлик қилишда айблаганлар унинг тошбўрон этилишини талаб этишган

Жиззахлик инсон ҳуқуқлари фаоли, Бахтиёр Хамроевнинг айтишича, бугун бир автобусда келган етмиш нафарча одам унинг уйига кириб, уни Андижон воқеалари ҳақида туҳмат билан Би-би-си ва Озодлик радиолари орқали чиқишлар қилишда айблаган.

Улар орасида маҳаллий расмийлар, ҳусусан маҳаллий телевидение расмийси, газета муҳаррири, кексалар ва аёллар, ҳамда "Ўзбекистон Қаҳрамони" унвонини олган Жиззахликлар ҳам бўлган.

Жаноб Ҳамроевга кўра, унинг уйига бостириб кирган кишилар уни "террорист", "ватан хоини", "нонкўр", "сотқин" каби сўзлар билан ҳақорат қилган, ҳамда Ўзбекистон Президенти Ислом Каримовни ҳақорат қилишда айблаганлар.

Бу гуруҳ жаноб Ҳамроевдан 500дан ортиқ оддий инсонлар ҳалок бўлгани айтилаётган Андижон намойиши борасида нотўғри ахборот тарқатаётгани учун халқдан кечирим сўрашини талаб этган.

Аввалроқ Жиззахлик мустақил журналист Улуғбек Ҳайдаровни дўппослаб кетганлар ҳали ҳам топилмаган

Жаноб Хамроевга кўра, етмиш кишини ўз ичига олган бу гурух таркибидаги аёллар уни кўчага судраб чиқарилишини ва тошбўрон қилинишини талаб қилганлар.

Ғазабланган кексалар эса жаноб Ҳамроевни ҳасса билан уришган.

45 дақиқалик ҳақоратлардан сўнг гуруҳ ўз йўлига равона бўлган, Бахтиёр Ҳамроев эса Жиззах Шаҳар Ички Ишлар Бошқармасига мурожаат этган.

Жиззах ИИБ расмийси мурожаатга жавобан, Ҳамроев хонадонига келиб воқеа тафсилотларини ўрганган.

Ҳабар берилишича, маҳаллий расмийлар, ҳусусан маҳаллий телевидение расмийси, газета муҳаррири, кексалар ва аёллар, ҳамда "Ўзбекистон Қаҳрамони" унвонини олган Жиззахликлар аввало шаҳардаги Маънавият ва Маърифат марказида мажлис ўтказишган, мажлисдан сўнг эса автобусга ўтириб Бахтиёр Ҳамроев уйига йўл олишган.

Андижон воқелари борасида хориж матбуотига очиқ гапирган фаол Саиджахон Зайнобиддинов ҳозирда ҳибсда

Мазкур воқеа борасида Би-би-си Жиззах ИИБ расмийлари билан боғланишга ҳаракат қилган, бироқ ҳаракатлар зое кетган.

Жиззахлик инсон ҳуқуқлари фаоллари даъво қилишларича, охирги бир неча кунлар ичида Андижон воқеаларининг мустақил ёритилишига қарши қадам сифатида, уларга тазйиқлар кучайган.