Ҳукумат эълон қилган рақам гувоҳлар келтираётган сондан анча кам

Ўзбекистон бош прокурори Андижонда ҳукумат кучлари ва намойишчилар ўртасидаги тўқнашувларда 169 кишининг ҳалок бўлганини айтди.

Бу - ҳукумат аввал эълон қилган рақамдан анча кўп, аммо гувоҳлар ва инсон ҳуқуқлари фаоллари айтаётган сондан анча камдир.

Бош прокурор Рашитжон Қодиров бегуноҳ фуқароларнинг ўлгани ҳақида ҳеч нарса демаган.

У ўлдирилганларнинг 30 нафари ҳукумат кучлари, қолганлари эса қуроллилар, шу жумладан чет эл фуқаролари эканини айтган.

Мухолифатдаги "Озод деҳқонлар" партияси эса жума куни ҳукумат кучлари томонидан ўлдирилган 745 кишининг рўйхатини тузганини айтган.

Партия раҳбари Нигора Ҳидоятова бу сон ўлганларнинг яқинлари томонидан тасдиқлангани ва хали сўнгги рақам эмаслигини билдирган.

"Аскарлар кўчама-кўча юриб, тинч фуқароларни отишган",- деб айтган "Озод деҳқонлар" вакили.

Нигора Ҳидоятова унинг партияси фаоллари Андижонда 18 ёшли Сардор Ҳасановнинг жанозасида қатнашганлари, унинг жума куни нон сотиб олиш учун кўчага чиққан пайт аскарлар томонидан орқа миясига отиб ўлдирилганини айтган.

Ҳамма ёқ кўнгилни айнитувчи қон ҳиди, пачоқланган бошлар, одам ичаклари билан тўлиб кетган, оёқ босадиган жой қолмаганди, ҳамма ёқ қон, қон, қон.. Андижонлик гувоҳ

Ўзбекистон бош прокуратураси 169 кишининг ҳалок бўлганини айтган.

Ҳукумат Андижонда тинч намойишчиларнинг ўққа тутилгани ва юзлаб кишиларнинг ўлдирилганини рад этмоқда.

Президент Каримов отишга буйруқ бермаганини айтган.

"Ҳамма ёқ қон, қон, қон..."

Жума кунги воқеалар ҳақида шоҳидлар ва инсон ҳуқуқлари фаолларининг сўзларини келтираётган хабар агентликлари тинч намойишчиларнинг ўққа тутилишини "қирғин" деб тасвирламоқда.

Рейтерс агентлиги жума кунги хунрезликка гувоҳ бўлганини айтган андижонликлардан бирининг "бу қирғин эди" деган сўзларини келтирган.

Шаҳардаги мактаб ҳовлисида кўрганларини тасвирлаган 31 ёшли гувоҳ "ҳамма ёқ кўнгилни айнитувчи қон ҳиди, пачоқланган бошлар, одам ичаклари билан тўлиб кетган, оёқ босадиган жой қолмаганди, ҳамма ёқ қон, қон, қон.." деб айтган.

Тошкентдаги норозилик

Бугун Тошкентдаги АҚШ элчихонаси ёнида тўпланган бир гуруҳ инсон ҳуқуқлари фаоллари "Йўқолсин қотил, Андижонликлар, биз сиз билан" деган шиорларни кўтариб чиқишган.

Би-би-си мухбирига кўра, норозилик қатнашчилари сони унча кўп бўлмаган-30 киши атрофида, аммо жума куни тинч намойишчиларнинг ўққа тутилишидан буён аҳамиятли бир чиқиш бўлган.

Хавфсизлик кучлари норозилик иштирокчиларини яқиндан кузатиб турган, аммо уларга ҳеч ким тегмаган.

Норозилик қатнашчиларидан бири буни уларни кузатиб турган хорижлик журналистлар сонининг кўплиги билан изоҳлаган.

Айни пайтда бугун Андижондаги воқеалардан буён илк бор рўзномалар чоп этилган.

Уларда Президент Каримовнинг катта сурати ва унинг шанба куни матбуот анжуманида гапирган сўзлари келтирилган.

Рўзномаларда Андижондаги намойишчилар "жиноятчи ва бангилар" деб аталган.

Қочқинлар

Бирлашган Миллатлар Ўзбекистон ва Қирғизистон ҳукуматини чегаранинг икки томонини очиқ тутишган чақирган.

Ўзбекистонлик қочқинлар ҳукумат кучлари уларни ўққа тутганини айтишмоқда

Ташкилотга кўра, ҳозирда Сузоқ туманидаги жамлоқларда 560 нафар қочқин кун кечирмоқда.

Улар қирғиз томонидан сиёсий бошпана сўраётганлари айтилган, аммо Қирғизистон ҳукумат мулозимлари қочқинлар бу борада оғзаки тартибда мурожаат қилганларини айтган.

Бирлашган Миллатлар қочқинларнинг мақомини ҳам ўрганади.

Душанба куни қочқинлардан баъзилари Би-би-сига жума куни ҳукумат кучлари уларни пистирмадан ўққа тутганини айтишган.

Ўзбек-қирғиз чегарасидаги Қорасув шаҳри эса у ердаги аҳолининг ўзи томонидан назорат қилинмоқда.

Якшанба куни Қорасувдаги намойишчилар ҳукумат идораларини ёқиб юборганлари, милиция ва маҳаллий ҳокимият раҳбарларини қувиб чиқарганлари айтилган.

Аҳоли бундан икки йил муқаддам Ўзбекистон ҳукумати томонидан бузиб ташланган Қорасув кўпригини қайта тиклаган.

Мухбиримизга кўра, ҳар икки томондан чегара савдоси қайта йўлга қўйилган ва вазият ҳозирда осойишта.

Душанба куни ҳукумат кучларининг Қорасувда ҳам Андижондаги ҳаракатларни такрорлаши мумкинлиги ҳақида хавотирлар изҳор қилинган.

Дипломатик босимлар

Сешанба куни Ўзбекистондаги хорижий давлат элчилари ва журналистларнинг Андижонга кутилган сафари қолдирилгани маълум қилинган.

Ассошейтед пресс агентлиги Британиянинг Тошкентдаги элчихонаси мулозимидан иқтибос келтиришича, Ўзбекистон ташқи ишлар вазирлигидан Андижонга сафарнинг эрта ёки индинга бўлиши мумкинлигини айтишган.

Жэк Строу ва Кондолиза Райс Андижондаги вазиятни муҳокама қиладилар

Душанба куни жаноб Строу тинч намойишчиларнинг ўққа тутилиши "қабул қилиб бўлмас" эканини айтган ва Ўзбекистон ҳукуматидан халқаро кузатувчилар ва ёрдам ташкилотларининг Андижонга киришига рухсат беришини талаб қилганди.

АҚШ Давлат Департаменти Андижонда "қуролсиз намойишчиларнинг ўққа тутилиши"ни қоралаган.

Аммо Британия ва Оврўпо Иттифоқидан фарқли ўлароқ, Америка Андижондаги аксил ҳукумат намойишларининг армия томонидан бостирилишини қоралашга унчалик шошилмаган.

АҚШ Ўзбекистонни ўзининг террорга қарши урушдаги муҳим иттифоқчиси сифатида кўради.

Инсон ҳуқуқлари ташкилотлари Вашингтонни Президент Каримовнинг репрессив тузумини қўллаб-қувватлаётганликда айблашган.