Президент Ниёзовнинг олтин ҳайкали - Туркманистоннинг "олтин асри" тимсоли

Туркманистоннинг бир умрлик Президенти Сапармурод Ниёзов 2009-йилда мамлакатда муқобил президентлик сайловлари ўтказилишини эълон қилди.

Туркман телевидениеси орқали чиқишида жаноб Ниёзов тўрт йилдан сўнг ўтказиладиган сайловларнинг эркин, демократик сайловлар бўлишини айтди.

Унинг таъбирича, "мамлакатнинг келажаги бир шаҳсга боғлиқ бўлиб қолмаслиги керак".

"2009-йилда Халқ кенгаши уч ёки тўрт одамни президентликка номзод қилиб кўрсатади... сайловлар демократик тамойилларга асосланган янги ҳокимият тизимини юзага келтиради", деб айтди жаноб Ниёзов.

Унинг ўзи сайловларда иштирок этмаслиги, аммо "давлат ва жамият ишларидан четда турмаслиги"ни айтди.

Бир умрлик президент

Туркманбоши ёки "бутун туркманларнинг отаси" деб билинадиган Ниёзов аввалроқ 2010-йилда ҳокимиятни ўз ворисига топширишига ишора қилган, аммо бирон номзодни тилга олмаган.

Мамлакатни шўро давридан буён бошқариб келаётган жаноб Ниёзов 1999-йилда "бир умрлик президент" деб эълон қилинган.

Унинг ҳокимияти остида Туркманистон "Олтин Аср"да яшаётгани айтилади.

Президент Ниёзовга кўра, "Руҳнома"-туркманларнинг муқаддас китобидир

Унинг туркманлар тарихи ва анъаналарига бағишланган "Руҳнома" асари мамлакат масжидларида мусулмонларнинг муқаддас китоби-Қуръон билан ёнма-ён қўйилади.

У мамлакатда мухолифатни бутунлай йўқ қилган, ҳукумат вазирлари ва бошқа қўл остидагиларни бот-бот алмаштириб туради, улардан баъзиларини сургун қилгани ҳам айтилади.

Жаноб Ниёзов 2002-йилда мухолифатни ўзига қарши суиқасд уюштиришда айблаган.

Инқилоб шарпаси?

Президент Ниёзовнинг сайловлар ҳақидаги эълони Қирғизистоннинг узоқ йиллик Президенти Асқар Акаев халқ исёни натижасида ҳокимиятдан ағдарилганидан бир неча ҳафта ўтиб, янграмоқда.

Жаноб Ниёзов ўз нутқида Қирғизистонни тилга олмаган, туркман матбуоти ҳам қўшни давлатдаги воқеалар ҳақида лом-мим демаган.

Ғарблик таҳлилчилар қонуний мухолифат мавжуд бўлмаган, ёпиқ Туркманистонда ҳокимиятнинг ҳар қандай ўзгариши зўравонликларсиз бўлмаслиги эҳтимоли ҳақида огоҳлантиришган.