ሚኒስትሪ ጥዕና ኤርትራ፡ ኣብ ከተማን ዓድን ዝግበር መገሻታት ክድረት ኣተሓሳሲቡ

ቀጥታዊ ሸፈነ

1. 16 መጋቢት 2020

   ክቡራት ተኸታተልቲ ቢቢሲ ትግርኛ፡ ናይ ሎሚ ቀጥታዊ ጸብጻብ ኣብዚ ወዲእና ኣለና። ስለዝተኸታተልኩምና ነመስግነኩም።

2. 16 መጋቢት 2020ሓፈሻዊ ምዕባለታት ኮሮናቫይረስ

   ብመሰረት ሎሚ ዝወጽአ ሓበሬታ፡ ዛጊት ብደረጃ ዓለም፡ ልዕሊ 164,000 ሰባት በቲ ቫይረስ ክልከፉ እንከለው፡ ልዕሊ 6,470 ሞይቶም ኣለው።

   መንግስቲ ጀርመን ንዝርጋሐ ናይቲ ለበዳ ንምቊጽጻር፡ ምስ ካልኦት ሃገራት ኤውሮጳ ዘራኽቦ ዶባት ክዓጽዎ ተገዲዱ'ሎ። ኣብታ ሃገር 5,000 በቲ ቫይረስ ክልከፉ እንከው፡ 12 ድማ ሞይቶም። ኣብ ፈረንሳ፡ ልዕሊ 5,000 ተለኺፎም፡ ከባቢ 127 ድማ ሞይቶም።

   ኣብ ኢራን፡ ክሳብ ሕጂ 853 ሰባት ሞይቶም ኣለው። ቁጽሪ ዝተለኽፉ'ውን ልዕሊ 14,000 በጺሑ'ሎ።

   ኣብ ኢጣልያ፡ ቁጽሪ ዝተለኽፉ ናብ 20,000 ክብ ኢሉ። ዛጊት ልዕሊ 1,800 ሰባት ሞይቶም ኣለው።

   ኣብ ዓባይ ብሪጣንያ፡ ቁጽሪ ዝተለኽፉ ሰባት 1,543 ክበጽሕ እንከሎ፡ 24 ሰባት ድማ ሞይቶም ኣለው።

   

3. 16 መጋቢት 2020ኣብ ሶማልያ ብኮሮናቫይረስ ዝተለኽፈ ሰብ ተረኺቡ

   ኣብ ሶማልያ፡ ብኮሮናቫይረስ ዝተለኽፈ ሰብ ከምዝተረኽበ ሚኒስትሪ ጥዕና እታ ሃገር ሎሚ ኣብ ዘውጽኦ መግለጺ ኣፍሊጡ።

   እቲ በቲ ቫይረስ ተሊኺፉ ዘሎ ሶማላዊ ዜጋ ኮይኑ፡ ኣብ ቀረባ እዋን ካብ ወጻኢ ዝተመልሰ እዩ።

   ብተወሳኺ፡ ካብ ዕለት 18 ጀሚሩ ኩሉ ዓለምለኻዊ በረራታት ደው ክብል ምዃኑ ሰብመዚ እታ ሃገር ገሊጾም።

4. 16 መጋቢት 2020ሚኒስትሪ ጥዕና ኤርትራ፡ ኣብ ከተማን ዓድን ዝግበር መገሻታት ክድረት ኣተሓሳሲቡ

   ምኒስትሪ ጥዕና ኤርትራ፡ ሕማም ኮሮናቫይረስ ኣብ ኤርትራ ከምዘየለ ድሕሪ ምሕባር፡ ተወሳኺ ሓበሬታታትን መምርሒታትን ንህዝቢ ኤርትራን ወጻእተኛታትን ኣመሓላሊፉ።

   እቲ ሓበሬታ፤

   - ግድንን ህጹጽን እንተዘይኮይኑ፡ ህዝቢ ካብ ዝነብረሉ ከተማን ዓድን ዝግበር መገሻታት ክድርት

   - ኩሉ ሰብ፡ ብዝተኻእለ መጠን ካብ ናይ ሰባት ምትእኽኻብ ክቑጠብ

   - ካብ ሃገር ወጻኢ ንዝግበር መገሻታት ንህጹጽን ግድንን እንተዘይኮይኑ ክጎድል

   - ንምዕባለታት ሕማም ኮሮናቫይረስ ተኸታቲሉ ኣድላዩ ዘበለ ሓበሬታታትን መምርሒታትን ከምዘመሓላልፍ ኣፍሊጡ።

   

   ምንጪ ስእሊ, Getty Images

   Skip X post

   ንትሕዝቶ X ተፍቅድ ዶ?

   እዚ ጽሑፍ ካብ X ዝተረኽቡ ትሕዝቶታት ኣሎዎ። እንተኾነ ኩኪስ ይዅን ካልእ ቴክኖሎጂ ክጥቀሙ ስለዝኽእሉ፡ ቅድሚ ምኽፋቱ ፍቓድኩም የድሊ። ፍቓደኛታት ቅድሚ ምዃንኩም፡ ነቲ ናይ X ፖሊሲ ኩኪስ ከምኡ’ውን ፖሊሲ ብሕትና ክተንብብዎ ትኽእሉ ኢኹም። ነዚ ትሕዝቶ ንምርኣይ፡ ‘እሰማማዕ’የ ቀጽል’ ዝብል ጠውቑ።

   Accept and continue

   Warning: ቢቢሲ ኣብ ካልእ ገጻት ንዘሎ ሓበሬታ ሓላፍነት ኣይወስድን።

   End of X post

5. 16 መጋቢት 2020ኣብ ታንዛንያ ፈላማይ ብኮሮናቫይረስ ዝተታሕዘ ሰብ ተረኺቡ

   ኣብ ታንዛንያ፡ ብኮሮናቫይረስ ዝተለኸፈ ሰብ ከምዝተረኸበ ሚኒስትሪ ጥዕና እታ ሃገር ኣፍሊጡ።

   እታ በቲ ቫይረስ ዝተለኸፈት፡ ጓል 48 ዓመት ታንዛንያዊት እያ።

   እዚ ከምዚ እንከሎ፡ ኣልጀርያ ኩሉ ምስ ኤውሮጳ ዝግበር በረራታት ይኹን ናይ ጀላቡ ምንቕስቃሳት ከምዝዓጸወቶ ቀዳማይ ሚኒስተር እታ ሃገር ገሊጹ።

   እታ ሃገር 48 ብኮሮናቫይረስ ዝተለኽፉ ሰባት ኣለውዋ። ሃገራት ጋና፣ ደቡብ ኣፍሪቃ፣ ኬንያ፣ ጅቡቲ ከምኡ'ውን ሊብያ ናይ ጉዕዞ በረራታት ኣቕሚጠን ኣለዋ።

6. 16 መጋቢት 2020ቦርድ መረጻ ኢትዮጵያ፡ ብስግኣት ኮሮናቫይረስ ሰራሕተኛታቱ ኣብ ገዝኦም ኮይኖም ክሰርሑ ገይሩ

   ቦርድ መረጻ ኢትዮጵያ፡ ብስግኣት ኮሮናቫይረስ፡ ሰራሕተኛታቱ ንሓደ መዓልቲ (ንሎሚ ሰኑይ) ኣብ ገዝኦም ኮይኖም ክሰርሑ ወሲኑ።

   እቲ ቦርድ ነዚ ውሳነ ዘሕለፈ፡ ድጋፍ ክህቡ ካብ ዝመጽኡ ወጻእተኛታት እቲ ሓደ ምልክታት ሕማም ኮሮናቫይረስ ስለዝተርኣዮ፡ ምርመራ ተገይሩ ውጽኢቱ ክሳብ ዝፍለጥ ንጥንቃቐ ምዃኑ ገሊጹ።

   እቲ ወጻእተኛ ቅድሚ ሓደ ወርሒ ናብ ኢትዮጵያ ከምዝኣተወ'ውን እቲ ቦርድ ኣፍሊጡ።

   

   ምንጪ ስእሊ, NEBE

7. 16 መጋቢት 2020ኤርትራ ብዛዕባ ኮሮናቫይረስ እንታይ ትገብር ኣላ?

   

   ምንጪ ስእሊ, MOI ERITREA

   ኣብ ኤርትራ፡ ኮሮናቫይረስ ዝምልከት ዝተገልጸ ሓድሽ ምዕባለታት እኳ እንተዘየለ፡ ቅድም ክብል ዳይረክተር ጥዕና ዶክተር ዓንደብርሃን ተስፋጽዮን፡ ንለበዳ ኮሮናቫይረስ ንምክልኻል፡ ኣብ ኣህጉራዊ መዓርፎ ነፈርቲ ኣስመራ መመርመሪ ነቝጣ ከምዝደኮነ ሓቢሩ እዩ።

   ከምኡ'ውን ኣብ ኮማዊ ሆስፒታል ቪላጆ መወሸቢ ማእከል ከምዘዳለወ ገሊጹ ነይሩ።

   ኣብቲ ዝሓለፈ ሰሙን ድማ፡ ሚኒስትሪ ጥዕና ኤርትራ ኣብ ዘውጽኦ መግለጺ "ክሳብ ሕጂ ዝተለኽፈ ሰብ’ኳ እንተዘየለ፡ ብኣየር፡ መሬትን ባሕርን ምስ ዝተፈላለያ በቲ ለበዳ ዝተጸልዋ ሃገራት ስለእንራኸብ ኮሮና ቫይረስ ኣብ ሃገርና ከይኣቱ ክንከላኸልን ንኹሉ እንተታት ድሉዋት ክንከውንን መድረኽ ዝጠልቦ ጉዳይ’ዩ" ምባሉ ይዝከር።

   ሚኒስትሪ ጥዕና ኤርትራ፡ ካብ ሃገራት ቻይና፡ ኢጣልያ፡ ደቡብ ኮርያን ኢራንን ብቐጥታ ወይ ብትራንዚት ናብ ኤርትራ ክኣትዉ ዝሓቱ ገያሾ፡ክውሸቡ ምዃኖም እውን ኣፍሊጡ እዩ።

8. 16 መጋቢት 2020ኣብ ትግራይ መወሸቢ ማእከል ኮሮናቫይረስ ከምእተዳለወ ተገሊጹ

   ሓላፊ ቢሮ ሓለዋ ጥዕና ክልል ትግራይ ሓጎስ ጎደፋይ (ዶ/ር) ኣብ ከተማ መቐለ፡ መወሸቢ ማእከል ኮሮናቫይረስ ከምዝተዳለወ ገሊጹ።

   ንሱ ኣብ ትዊተር ኣብ ዘሕለፎ መልእኽቲ፡ ኣብ ከተማ ሽረ እውን ካልእ ተመሳሳሊ መወሸቢ ማእከል የዳልዉ ምህላዎም ሓቢሩ'ሎ።

   ዓቕሚ ናይቲ መወሸቢ ማእከላት ግን ኣይተገለጸን።

   

   ምንጪ ስእሊ, Hagos G

   

   ምንጪ ስእሊ, Hagos G

9. 16 መጋቢት 2020ሓድሽ ዜና, ኢትዮጵያ፡ ብሰንኪ ኮሮናቫይረስ ኣብያተ ትምህርቲ ክዕጾ ወሲና

   

   ምንጪ ስእሊ, PM OFFICE

   ኣብ ኢትዮጵያ፡ ብሰንኪ ኮሮናቫይረስ፡ ኣብ መላእ እታ ሃገር ንቀጻሊ 15 መዓልታት ኣብያተ ትምህርቲ፣ ስፖርታዊ ምንቅስቓሳትን ዓበይቲ ኣኼባታትን ከምዝዕጾ ቀዳማይ ሚኒስተር ኢትዮጵያ ኣብዪ ኣሕመድ ገሊጹ።

   እቲ ውሳነ ካብ ሎሚ ጀሚሩ ተግባራዊ ከምዝኸውን እውን ተገሊጹ’ሎ።

   ተምሃሮ ዩንቨርስቲታት ግና ‘ኣብ ዘለውዎ ኮይኖም’ ኣድላዪ ክትትል ክግበረሎም እዩ ኢሉ ቀደማይ ሚኒስተር ኣብዪ ኣሕመድ ሎሚ ኣብ ቤት ጽሕፈቱ ኣብ ዝሃቦ መግለጺ።

   ብዝሒ ኣብ ኢትዮጵያ ብኮሮናቫይረስ ዝተትሓዙ ሰባት'ውን 5 ከምዝበጽሐ ቀዳማይ ሚኒስተር ኣብዪ ኣሕመድ ተዛሪቡ።

   እቲ መበል ሓምሻይ ኮይኑ ተመዝጊቡ ዘሎ ሰብ ካብ ዱባይ ዝመጽአ ከምዝኾነ'ውን ኣብቲ መግለጺ ተጠቒሱ።

10. 16 መጋቢት 2020ኬንያ ብዛዕባ ኮሮናቫይረስ ስኑዕ ሓበሬታ ፈኒዉ ንዝበለቶ ሰብ ኣሲራ

    

    ምንጪ ስእሊ, DCI KENYA

    ፖሊስ ኬንያ፡ ኣብ ትዊተር ብዛዕባ ኮሮናቫይረስ ስኑዕ (ናይ ሓሶት) ሓበሬታ ፈኒዉ ንዝበሎ ኤላሻ ሙቱይ ኪቶኒዮ ዝበሃል መንእሰይ ኣብ ቀይዲ ኣእትዩ።

    እቲ ጥርጡር፡ ብዛዕባ ኣብ ኬንያ ዝተረኸበት ፈላመይቲ ብኮሮና ቫይረስ ዝተለኸፈት ሰብ ኣመልኪቱ ኣብ ዝጠቀዖ ጽሑፍ 'መንግስቲ ይሕስወና እዩ ዘሎ' ዝብል ሓበሬታ ዘርጊሑ ነይሩ።

    ኣብ ጽሑፉ ድማ፡ እታ ብኮሮናቫይረስ ዝተትሓዘት ሰበይቲ 'ከምቲ ዝተብሃለ ካብ ኣመሪካ ዘይኮነትስ ካብ ኢጣልያ እያ መጺኣ' ዝብል መልእኽቲ ዘሕለፈ ኮይኑ፡ እቲ ብስኑዕ ናይ ትዊተር ዝተዘርገሐ ጽሑፍ ኣብ ዝሓለፈ ቀዳመ ሰንበት ብዙሓት ክቀባበልዎ ጸኒሖም።

    እቲ መንእሰይ፡ ንህዝቢ ዘርዕድ ስኑዕ ሓበሬታ ብምዝርጋሕ ዝተኸሰሰ ክኸውን ከሎ፡ ገበነኛ ኮይኑ እንተተረኺቡ ክሳብ 50 ሽሕ ዶላር መቕጻዕቲ ወይ ድማ ካብ 10 ዓመት ዘይዛይድ ማእሰርቲ ክፍረዶ ይኽእል።

11. 16 መጋቢት 2020ኮሮናቫይረስ ንምክልኻል ኣእዳውና ከመይ ክንሕጸብ ይግበኣና?

12. 16 መጋቢት 2020ቤተክርስትያን ኦርቶዶክስ ኢትዮጵያ፡ ህዝቢ ንመምርሒ ሚኒስትሪ ጥዕና ክስዕብ ጸዊዓ

    ርእሰ ሊቃነ ጳጳሳት ቤተክርስትያን ኦርቶዶክስ ኢትዮጵያ፡ ብፁእ ወቅዱስ ኣቡነ ማትያስ፡ ዝርገሐ ኮሮናቫይረስ ንምክልኻል፤ ህዝቢ ሚኒስትሪ ጥዕና ንዝህቦ መምርሕታት ከተግብር ጸዊዖም።

    

    ምንጪ ስእሊ, Getty Images

13. 16 መጋቢት 2020ኣብ ኤውሮጳ ኣብ ሓደ መዓልቲ ልዑል ብዝሒ ሞት ተመዝጊቡ

    

    ምንጪ ስእሊ, Reuters

    ሰለስተ ሃገራት ኤውሮጳ፡ ብሰንኪ ኮሮናቫይረስ ክሳብ ሎሚ ካብ ዘጋጠመን ዝበዝሐ መዓልታዊ መጠን ሞት ኣመዝጊበን ኣለዋ።

    ኣብ ኢጣልያ ትማሊ 368 ሰባት ክሞቱ እንከለዉ፡ ሓፈሻዊ መጠን ሞት ናብ 1,809 ክብ ኢሉ።

    ኣብ ስፔን ድማ፡ ትማሊ 97 ሰባት ክሞቱ እንከለዉ፡ ኣብታ ሃገር ብሰንኪ ኮሮናቫይረስ ዝሞቱ ሰባት ብዝሒ 288 በጺሑ።

    ኣብ ፈረንሳይ ትማሊ 29፡ ብሓፈሻ ድማ 120 ሰባት ብሰንኪ ኮሮናቫይረስ ሞይቶም ኣለዉ።

    ኣብ ብሪጣንያ ድማ፡ ትማሊ ጥራይ 14 ሰባት ሞይቶም። ብድምር ከኣ፡ ዛጊት 35 ሰባት ሞይቶምዋ።

    ሃገራት ኤውሮጳ፡ ጽንኩር ሓለዋ ዶባት የካይዱ ምህላዎም ይሕብሩ።

    ኦስትሪያ ልዕሊ ሓሙሽተ ሰብ ምእካብ ዝኸልከለት ኮይና፡ ብዙሓት ሃገራት ድማ ቤት ትምህርትታት ዓጽየን ኣለዋ።

14. 16 መጋቢት 2020ብኮሮናቫይረስ ተጠርጢሩ ካብ ኣምቡላንስ ዘምለጠ ውልቀሰብ ኣብ ክልል ኣምሓራ ተታሒዙ

    

    ሓደ ካብ ስዑዲ ዓረብ ዝተመለሰ ውልቀሰብ፡ ምልክታት ኮሮናቫይረስ ስለዝተርኣዮ ኣብ ኣዲስ አበባ ናብ መወሸቢ ቦታ ብኣምቡላንስ እናተወሰደ እንከሎ፡ ሃዲሙ ኣብ ክልል ኣምሓራ ናብ ዝርከብ ዝተወለደሉ ዓዲ ኣብ ዝምለሰሉ ኣብ ቀይዲ ከምዝኣተወ ተገሊጹ።

    እቲ ስሙ ዘይተገልጸ ውልቀሰብ፡ ለጋምቦ ካብ ዝበሃል ቦታ ብስግረዶብ ቅድሚ ሓደ ወርሒ ናብ ስዑዲ ዓረብ ዝኸደ ክኸውን ከሎ፡ ብፖሊስ ስዑዲ ተታሒዙ ናብ ኢትዮጵያ ከምዝተጠረዘ ሰብመዚ ይገልጹ።

    ኣብ መዕርፎ ነፈርቲ ኣዲስ ኣበባ ምስበጽሐ፡ ምልክታት ናይቲ ሕማም ስለዝተርኣዮ፡ ብኣምቡላንስ ናብ መወሸቢ ቦታ እናተወሰደ ኣብ ዝነበረሉ እዩ ክሃድም ክኢሉ።

    ሰንበት ንጉሆ፡ ኣብ ናይ ህዝቢ ኣውቶቡስ ተሳፊሩ ናብታ ለጋምቦ እትበሃል ኣብ ክልል ኣምሓራ አትርከብ ትውልዲ ዓዱ እናተመለሰ እንከሎ ድማ፡ ኣብ ቀይዲ ከምዝኣተወ ተገሊጹ።

    እቲ ጥርጡር መታን ከይተሓዝ ብዝብል ኣብ መገዱ፡ ኣብ ከተማታት ኮምቦልቻ፡ ደሴን ጉጉፍቱን መካይን ከምዝቐየረ ዝተገለጸ ኮይኑ፡ ኣብተን ዝተሳፈረለን ዝተፈላለያ መካይን ንዝነበሩ ሰባት ምፍላይ ከምዘጸግም ሰብመዚ ናይቲ ከባቢ ገሊጾም።

    እንተኾነ፡ እቶም ኣብታ መወዳእታ ዝተረኸበላ ኣውቶቡስ ዝነበሩ ኣስታት 60 ሰባት ንበይኖም ተፈልዮም ክጸንሑ ከምዝተገበረ ተገሊጹ።

    ውጽኢት ምርመራ ናይቲ ውልቀሰብ ዛጊት ኣይተፈለጠን።

15. 16 መጋቢት 2020ኣብ ኦሮሚያ ዝተዓጸወ ኢንተርኔት፡ ምስ ኮሮናቫይረስ ብዝተሓሓዝ ንምኽፋት ‘መደብ የለን’

    

    ምንጪ ስእሊ, ETHIO TELECOM

    መንግስቲ ኢትዮጵያ፡ ኣብ ምዕራብ ኦሮሚያ ኣብ ልዕሊ ዝንቀሳቐሱ ዕጡቓት ኦሮሞ ወተሃደራዊ መጥቃዕቲ ካብ ዝኸፍት ኣትሒዙ፡ ኣብ ገለ ቦታታት ምዕራብ ኦሮሚያ ኣገልግሎት ኢንተርኔትን ቴሌፎንን ካብ ዘቋርጽ ክልተ ወርሒ ኮይኑ ከምዘሎ ይግለጽ።

    ምቁራጽ ናይዚ ኣገልግሎታት ከኣ፡ ኮሮናቫይረስ ዝምልከቱ ሓበሬታታት ናብ ህዝቢ ናይቲ ከባቢ ከይበጽሕ ዝድርት ምዃኑ ብምግላጽ፡ መንግስቲ ነቲ ኣገልግሎታት ክኸፍቶ ኣብ ማሕበራዊ መራኸብታት ጎስጓስ ክካየድ ቀንዩ እዩ።

    ብዛዕባ’ዚ ቢቢሲ ሕቶ ዘቕረበላ ኣካያዲት ስራሕ ኢትዮ ቴሌኮም ፍሬህይወት ታምሩ፡ እቲ ኣገልግሎት ዝተዓጸወ ብምኽንያት ጸጥታ ምዃኑ ብምሕባር ምስ ኮሮናቫይረስ ብዝዛመድ “ዝወሰድናዮ ሓድሽ ስጉምቲ የለን፤ ሓድሽ ነገር እንተልዩ ክነፍልጠኩም ኢና” ኢላ።

    ንመሰላት ዝሕለቕ ትካል 'ሂዩማን ራይትስ ዎች' ዝሓለፈ ሰሙን ኣብ ዘውጸኦ መግለጺ፤ መንግስቲ ኢትዮጵያ ነቲ ንክልተ ኣዋርሕ ዝዓጸዎ ኣገልግሎት ኢንተርኔትን ቴሌፎንን ክኸፍት ምሕታቱ ዝዝከር እዩ።

16. 16 መጋቢት 2020ቁጽሪ ኣብ ኢትዮጵያ ብኮሮናቫይረስ ዝተለኸፉ ሰባት 4 በጺሑ

    ሚኒስትሪ ጥዕና ኢትዮጵያ ብሰንበት ኣብ ዘውጸኦ መግለጺ፡ ኣብ ኢትዮጵያ ተወሰኽቲ ሰለስተ ሰባት ብኮሮናቫይረስ ከምዝተትሓዙ ምርግጋጹ ኣፍሊጡ።

    ካብቶም ሰለስተ ሰባት፡ እቶም ክልተ ጃፓናውያን እቲ ሓደ ድማ ወዲ 42 ዓመት ኢትዮጵያዊ ምዃኖም ገሊጹ'ሎ።

    "ኩሎም ኣብ ኣዲስ ኣበባ ዝሰርሑን ምስቲ እቲ ቫይረስ ዝተረኸቦ ፈላማይ ሰብ ብቐረባ ዝተራኸቡን" ከምዝኾኑ እቲ መግለጺ የብርህ።

    Skip X post

    ንትሕዝቶ X ተፍቅድ ዶ?

    እዚ ጽሑፍ ካብ X ዝተረኽቡ ትሕዝቶታት ኣሎዎ። እንተኾነ ኩኪስ ይዅን ካልእ ቴክኖሎጂ ክጥቀሙ ስለዝኽእሉ፡ ቅድሚ ምኽፋቱ ፍቓድኩም የድሊ። ፍቓደኛታት ቅድሚ ምዃንኩም፡ ነቲ ናይ X ፖሊሲ ኩኪስ ከምኡ’ውን ፖሊሲ ብሕትና ክተንብብዎ ትኽእሉ ኢኹም። ነዚ ትሕዝቶ ንምርኣይ፡ ‘እሰማማዕ’የ ቀጽል’ ዝብል ጠውቑ።

    Accept and continue

    Warning: ቢቢሲ ኣብ ካልእ ገጻት ንዘሎ ሓበሬታ ሓላፍነት ኣይወስድን።

    End of X post