Ilhaan Cumar oo ka jawaabtay hadalkii Trump ee ahaa "inay khashin tahay"

Tebin toos ah

1. 3 Disembar 2025Dowladda Jarmalka oo aqoonsatay baasaboorka diblomaasiga ah ee Soomaaliya

   Hay'adda Socdaalka iyo Jinsiyadda Soomaaliya ayaa sheecisay in dowladda Jarmalku si rasmi ah u aqoonsatay baasaboorka dimlomaasiga ah ee Soomaaliya. War qoraal ah oo hay'addu soo saartay ayaa lagu sheegay in tallaabadan ay muhiim u tahay xoojinta "xiriirka diblomaasiyadeed iyo fududeynta socdaalka labada dal".

   Go'aankan ay dowladda Jarmalku ku aqoonsatay baasaboorka dilomaasiga ah ee Soomaaliya ayaa la sheegay in lagu daabacay warbaahinta dowladda. Warka ka soo baxay Hay'adda Socdaalka Soomaaliya ayaa lagu sheegay sidoo kale in tallaabadan ay qayb ka tahay dedaallada dowladda Soomaaliya ee ku aaddan horumarinta adeegyada dhanka amniga sharciga, safarka iyo casriyeynta adeegyadan.

2. 3 Disembar 2025Dowladda Soomaaliya miyay u jawaabtay Trump?

   Wasiiru dowlaha Arrimaha Dibadda ee xukuumadda Federaalka Soomaaliya Cali Cumar (Cali Balcad) ayaa bartiisa X, ku daabacay qoraal dad badan u arkeen in dowladdu ugu jawaabayso madaxweynaha Mareykanka Donald Trump, oo maalmahaan si is daba joog ah weerar afka ah ugu qaaadayay Soomaalida Mareykanka ku nool iyo dowladnimada Soomaaliya, isagoo ku tilmaamay dalka Soomaaliya dal aan dowlad, milatari iyo nidaam midna ka jirin.

   Qoraalka Wasiiru-dowlaha Arrimaha Dibadda Soomaaliya Cali Balcad, ayaan u dhignaa sidaan:"Dadka qaarkood waxaa aad ugu fududaatay inay Soomaaliya u adeegsadaan marmarsiiyo ama inay ku qariyaan guuldarradooda. Sheekadan ma aha oo keliya mid been ah, balse waa aflagaado loo geystay adkeysigeenna iyo naf-hurnimadeenna. Waa inaan midnimo muujinaa, ilaalinaa karaamadeenna, una muujinnaa caalamka inaanan ahayn wax uu qof doonayo oo sida uu rabo u adeegsado”.

   Ilaa iyo hadda lama oga in warkaan uu jawaab u yahay hadalladii Trump ee maalmahaan uu wax kaga sheegayay Soomaaliya.

   Hadalkaan Cali Balcad ayaa imaanaya xilli madaxweyne Trump oo hadallo adag u adeegsaday Soomaalida uu ku celceliyay in Soomaaliya ay tahay dal dowlad la'aan ah oo uraya.

3. 3 Disembar 2025Trump oo is ammaanay xilli Soomaalida uu ku tilmaamay ma shaqeystayaal

   Madaxweynaha Mareykanka Donald Trump ayaa maamulkiisa ku amaanay dadaallada ku aadan ilaalinta deegaanka, waxaa uu dhaleeceen u jeediyay tallaabooyinka ay ku wajahayaan arrintaas xisbiga Dimuqraadiga.

   Waxaa uu amaanay siyaasaddiisa ku wajahan wax ka qabashada ilaalinta wasakaheynta hawada iyo biyaha isla markaasna uu dalkaas ka sameeyay shaqooyin ku saabsan tamarta.

   Sii akhri sheekooyinka Trump:

   Trump oo isaga is amaanay

   BBC-da oo raalli-gelin siisay Trump laakiin diidday in ay lacag magdhow ah siiso

   Trump oo ka dhabeeyay ballanqaadkiisii ku aaddanaa soo-galootiga

4. 3 Disembar 2025Duqa Minneapolis oo u jawaabay Trump, Soomaalida-na taageeray

   Duqa magaalada Minneapolis Jacob Frey, oo ka jawaabayay warbixin lagu daabacay wargeyska The New York Times oo sheegeysay in ciidamo federal ah oo ka socda, Laanta Socdaalka Mareykanka la geeyay magaaladiisa ayaa sheegay in Soomaalida uu jeclyahay oo uu garab taaganyahay, xilligan ay wajahayaan culeysyo kaga imaanaya mamaulka Trump.

   Wuxuu sheegay in dad ka badan 80,000 oo Soomaali ah oo ah muwaadiniin ay ku suganyihiin gobolka Minnesota, isagoo intaa ku daray in xitaa boolis Soomaali ah ay ammaanka ka qayb qaadanayaan.

   Wuxuu ugu baaqay dadka in aysan albaabada ka furin askarta guryaha tageysa, arrintaasi oo argagax ku beertay bulshada.

5. 3 Disembar 2025Trump oo bixiyay amar ka dhan ah Soomaalida qaxootiga ku ah dalkiisa

   Maamulka Trump ayaa ku amray Hay’adda Socdaalka iyo Kastamka Maraykanka (ICE) in ay bartilmaameedsato muhaajiriinta Soomaaliyeed ee aan sharciyad haysan ee ku nool magaaloyinka mataanaha ah , sida uu qof arrimahan la socday u sheegay CBS News Talaadadii.

   Boqolaal qof ayaa la filayaa in la beegsado marka hawlgalku bilowdo usbuucan, sida uu sheegay mas’uulka. Wargeyska The New York Times ayaa markii hore warbixintan baahiyay.

   Sida ay sheegeen hoggaamiyeyaasha deegaanka, waxaa halkaas ku nool qiyaastii 80,000 oo qof oo asal ahaan ka soo jeeda Soomaaliya, ayna intooda badan yihiin muwaadiniin Maraykan ah.

   Maamulka Trump ayaa adkeeyay tallaabooyinkiisa ka dhanka ah muhaajiriinta kadib toogashadii laba askari oo ka tirsan ciidamada Ilaalada Qaranka oo ka dhacday Washington DC toddobaadkii hore.

   Sarah Beckstrom, 20 jir ahayd ayaa mar dambe u geeriyootay dhaawicii iyadoo Andrew Wolfe, oo ah 24 ah, uu si daran u dhaawacmay.Ninka lagu tuhunsan yahay, oo la xiray laguna soo oogay dacwad dil ah, wuxuu ka soo jeedaa Afgaanistaan.

6. 3 Disembar 2025Mareykanka oo muwaadiniinta dhowr dal ka mamnuuci doona dalkiisa iyo sababta

   Xoghayaha Amniga Gudaha Mareykanka Kristi Noem ayaa sheegtay inay soo saari doonto mamnuucid safar oo ka dhan ah dhowr dal oo ay ku eedeysay inay “ku soo daabuleen” Mareykanka falal-dambiyeedyo”.

   Noem oo Isniintii warkaan ku qortay baraha bulshada ayaa sheegtay inay la kulantay Madaxweynaha Donald Trump, isla markaana ay go’aansatay inay soo jeediso “in gebi ahaanba la mamnuuco safarka dal kasta oo la sheegay inuu dalkayaga ku soo daad-gureeyo horey u soo gaystay dambiyo dil, dadka aan shaqeysan, iyo kuwa ku tiirsan gargaarka dowladda.”

   Trump iyo Wasaaradda Amniga Gudaha ayaa markaas kadib qoraalka Noem ku bahaiyay baraha bulshada ee ay adeegsadaan.

   Weli lama cad in dalalka ay mamnuuciddu saamayn doonto, iyo goorta ay dhaqan gali karto tallaabadaas. Wasaaradda Amniga Guduhu waxey u sheegtay BBC-da inay dhawaan ku dhawaaqi doonaan liiska.

7. 3 Disembar 2025Ilhaan Cumar oo ka jawaabtay hadalkii Trump ee ahaa "inay khashin tahay"

   Ilhaan Cumar oo ka tirsan Kongareeska Mareykanka ayaa ka jawaabtay hadalka Madaxweyne Donald Trump uu ka sheegay iyada iyo guud ahaan Soomaalida ku nool dalkaas.

   Isagoo ka hadlayay kulan golaha wasiirrada ah, madaxweynuhu wuxuu sheegay in Soomaalidu yihiin "khashin" iyo in Mareykanku "aadi doono jihada khaldan haddii aan sii wadno inaan dalkeenna ku qaabilno khashin."

   “Ku mashquuliddeyda waa cabsi gelin,” ayay Ilhaan Cumar ku qortay barteeda X. “Waxaana rajeynayaa inuu heli doono caawinaadda uu aadka ugu baahan yahay.”

   Hadalladiisu waxay imaanayaan iyadoo la filayo inay billowdaan howlgal lagu sheegay in lagu qaban-doono dadka laga soo saaray amarro masaafurisah oo ku sugan gobolka Minneapolis, halkaas oo ay ku nool yihiin dad badan oo asal ahaan Soomaaliya ka soo jeeda.

   Mas'uuliyiinta magaalada Minnesota ayaa cambaareeyay qorshahaas, iyagoo ku doodaya in ay suuragal tahay in si khalad ah loo qabto muwaadinin Maraykan ah oo laga yaabo in ay u muuqdaan kuwo ka yimid dalka Soomaaliya.

   Akhriso:

   Trump oo Soomaalida ku tilmaamay "khashin iyo inay jahannamo ka yimaadeen" sheegayna inuusan dooneyn inay Mareykanka sii joogaan

   Trump oo qaaday tallaabo cabsi ku abuurtay dadka ka soo jeeda 19-dal oo Soomaaliya ay ka mid tahay