Sèist:
Hug air clò MhicIlleMhìcheil,
Ho ro thugaibh thug dha-rìribh,
Hug air clò MhicIlleMhìcheil.

Oganaich ùir a' chùil teudaich,
'S oil leam aodach a bhith dhìth ort.

Bheir Albainn cuideachadh luadhadh,
Ma tha gruagaichean san rìoghachd.

Nì mi fhìn dhut sgioba chlèith',
Den phòr as gleusda tha sa Chrìosdachd.

Gun tig bannal oirnn à Slèite,
'S air do chlèith-s' gun dèan iad dìcheall.

Gun tig gruagaichean Chloinn Raghnaill,
Còmhlan dàicheil nach dèan dìobradh.

Thig sgiob eile à Gleanna Garadh,
Luaidheas gu faramach dìonach.

Gun tig nighneagan on Cheapaich,
A bheir caithris air mun sgìthich.

Buidheann mhaighdeann à Gleanna Comhann,
Fùcadairean coimheach rìoghail.

Gheibh sinn sgiob' eile à Eirinn,
O Iarla Anntraim nan steud rìomhach.

Dèanaibh an luadh-làmh gu guineach,
'S thugaibh fuil air mac na strìopaich!

[Song lyrics sourced by the Gaelic Resource Database (GRD) for educational purposes only.]