Moch 's mi 'g èirigh 's a' mhadainn
is trom èisleanach m'aigne
is nach èighear mi 'n caidreamh nam bràithrean.
Leam is aithghearr a' chèilidh
rinneas mar ris an t-Seumas
ris na dhealaich mi 'n dè moch là Càisge.

Leam is aithghearr a' chèilidh
rinneas mar ris an t-Seumas
ris na dhealaich mi 'n dè moch là Càisge.
Dia 'na stiùir air an darach
dh'fhalbh air tùs an t-siùil-mhara,
seal mun tug e cheud bhoinne de thràghadh.

Dia 'na stiùir air an darach
dh'fhalbh air tùs an t-siùil-mhara,
seal mun tug e cheud bhoinne de thràghadh.
Ge b'e àm cur a' chorc' e
's mi nach pilleadh o stoc uat,
's ann a shuidhinn an toiseach do bhàta.

Ge b'e àm cur a' chorc' e
's mi nach pilleadh o stoc uat,
's ann a shuidhinn an toiseach do bhàta.
Nuair bhiodh càch cur ri gnìomhadh
bhiodh mo chuid-sa dheth dìomhain,
'g òl nan gucagan fìon air a fàradh.

Nuair bhiodh càch cur ri gnìomhadh
bhiodh mo chuid-sa dheth dìomhain,
'g òl nan gucagan fìon air a fàradh.
Cha bu mharcach eich leumnaich
a bhuinigeadh geall rèis ort
nuair a thogadh tu brèid os cionn sàile.

Cha bu mharcach eich leumnaich
a bhuinigeadh geall rèis ort
nuair a thogadh tu brèid os cionn sàile.
Cha b'iad na luchàrmainn mheanbha
bhiodh ma cupaill ag ealdhadh
nuair a dh'èireadh mòr shoirbheas le bàirlinn.

Cha b'iad na luchàrmainn mheanbha
bhiodh ma cupaill ag ealdhadh
nuair a dh'èireadh mòr shoirbheas le bàirlinn.
Ach na fuirbearnaich threubhach
's deis a dh'iomradh 's a dh'èigheadh,
bheireadh tulg an tus clèith air ràmh bràghad.