O thugaibh moladh mòr do Dhia,
gach fìne t' ann fa leth;
Seadh molaibh Dia gun fonnmhor àrd,
gach uile shluagh air bith.
Oir 's mòr a choibhneas tròcaireach,
a dheònaich e dhuinn fèin;
Tha fìrinn Dè sìor-mhaireannach.
Molaibh Iehobhah treun.

Molaibhse Dia. Na theampall naomh,
molaibhse Dia gu mòr:
An speuraibh àrd a chumhachd fòs
molaibh e mar is còir.
Airson a ghnìomhairean ro-threun,
molaibhse Dia 's gach àit';
A rèir a mhòrachd molaibh e,
's a ghlòir a ta ro-àrd.
Le guth na trompaid mar an ceudn'
molaibhse Dia gu binn:
Air clàrsaich seinnibh moladh dha,
is air an t-saltair ghrinn.

Molaibh Iehobhah treun. (x4)

Le tiompan thugaibh moladh dha,
san dannsadh mar an ceudn';
Le organ togaibh suas a chliù
's le inneal-ciùil nan teud.
Air ciombalaibh ta labhair binn
molaibhse Dia gun tàmh:
Molaibhse Dia air ciombalaibh,
nì tairm is fuaim ro àrd
Gach uile dhùil sam bith ta beò,
gam bheil an deò nan crè,
Àrd-mholadh iadsan Dia gu mòr
Molaibh Iehobhah treun.
Molaibh Iehobhah treun.

[Fonn le Eilidh NicChoinnich.]

Èist ri Eilidh NicChoinnich agus Art MacCarmaig a' bruidhinn mu dheidhinn an salm seo.