Tha na bhidiothan beò

17mh Ògmhios 2008, Seònaid

Chì thu na bhideothan a' chlàir Alasdair ann an Sìona air an làraich a-nis. Tha dusan aca ann uile gu lèir agus tha a' chiad tè an seo.

As dèidh dha na rushes a dhol gu ingest, chaidh Alasdair trompha agus, a' cleachdadhAvid Assist, chomharraich e far an robh gach pìos film a dheidheadh a chleachdadh air-loidhne a' tòiseachadh agus a' stad. Bha e nas luaithe an obair seo fhàgail aig Alasdair oir bha fios aige dìreach far an robh gach pìos anns na rushes. A-null thugamsa an uairsin.

Cha robh mi air Avid Assist a chleachdadh roimhe ach mar a thachair, bha cùrsa ann an t-seachadain a chaidh air mar a dh'obraichear an t-siostam. Sgoinneil! As dèidh trì là de dh'oideachadh bha misneachd gu leòr agam an t-ionnsachadh ùr seo a chur gu feum – mus dìochuimhnichinn a h-uile càil!

An toiseach bha agam ri na bhidiothan a gheàrr Alasdair a chur tro bathar-bog taobh a-staigh Avid a dh'fhàgadh iad ann an cruth freagarrach airson a dhol air-loidhne. Gheàrr mi dealbhan a-mach às na rushes a sheallas aig toiseach gach bhidio nuair a bha e na thàmh. Cha robh air fhàgail an uairsin ach faidhlichean a chruthachadh a dhèanadh ceangail bhon duilleig-lìn chun phìos bhideo. Le sin dèant, bha na faidhlichean deiseil airson a dhol air-loidhne.

Mar sin leat

17mh Ògmhios 2008, Alasdair

Tha sinn air ais slàn sàbhailte ann an Glaschu agus tha na bhideothan againn, mu dheireadh thall, air-loidhne. Nach do gheall mi dhut? Tha mi a-nis a' dèiligeadh ri nithean san oifis às dèidh an turais a Shìona, leithid foirm mo chosgaisean. Rinn mi cinnteach cuideachd gu bheil an uidheamachd theicnigeach fhathast ag obair agus e air a bhith air turas letheach slighe timcheall an t-saoghail air itealain. Tha e cudromach gun dèan mi cinnteach gu bheil a h-uile pìos uidheamachd agus càbal air dòigh airson an ath turas a thèid a chleachdadh. Dh'fhaodadh gum bi feum air ann an cabhaig agus feumaidh e bhith deiseil airson filmeadh, le bataraidhean làn agus mar sin air adhart.

Le sin, tha m' obair-sa air Sealladh air Sìona a-nis seachad. Tha mi an dòchas gun tug sinn blas dhut de dhùthaich air leth inntinneach agus sealladh air mar a tha sinne a' dèanamh prògraman telebhisein. Cumaidh Gerald agus Maria orra ag obair le na dh'fhilm sinn gus crìoch a chur air na prògraman TBh Bheurla agus bidh Cathaidh a' cur nam prògram Gàidhlig ri cèile. Tha mi an dòchas gun còrd iad riut.

As dèidh seachdain de shaor-làithean, bidh mise a' tilleadh a dh' obair air Eòrpa, a' clàradh aithrisean ann an dùthchannan air feadh na Roinn-Eòrpa airson prògraman telebhisean a dhèanamh. Chì mi thu a-rithist ann an ùine nach bi fada. Mar sin leat an-dràsta.

Alasdair