Eadar-theangachadh

30mh Giblean 2008 3:00f, Gerald

An-diugh, tha sinn air a bhith beachdachadh air cuin a ghearras sinn ar prògraman. Tha fios ‘am dè tha sibh dol a ràdh – “cha do rinn sibh fhathast iad”.

‘S e an rud gu bheil e glè chudromach a bhith coimhead air adhart sa chlàr-ama agad. Cuimhnich gu feum thu aontachadh le luchd-deasachaidh cuin a bhios iad saor, feumar na dealbhan agus na tiotalan a dhealbh agus a dhèanamh. Cuideachd, chan e dìreach an sgioba againne a tha cleachdadh goireasan-deasachaidh BBC Alba an-dràsta – lìonaidh na h-oifisean deasachaidh an-àirde cho luath mun àm seo den bhliadhna agus bidh iad cho gann 's a ghabhas.

Tha duilgheadasan sònraichte againne leis an obair seo nach biodh agad air prògraman eile. Chan aithne do dhuine againn Mandarin a bhruidhinn, ach ‘s e sin a bhruidhneas an luchd-agallaimh againn. Bidh eadar-theangaire againn fhad ’s a tha sinn a’ fhilmeadh, ach dè mu dheidhinn nuair a thilleas sinn air ais an seo? Thuirt Seòras (a tha gar cuideachadh ann an Sìona) gun taip a’ chompanaidh aigesan ann am Beijing na h-eadar-theangaidhean againn fhad ’s a tha sinn ann an sin. Ach feumaidh iad a bhith gu math mionaideach airson nach toir sinn cho fada gan gearradh.

Tha sinn air bruidhnn ri boireananch eile a bhruidhneas Mandarin, gun fhios nach bi sinn feumach air a taic. Chuidich i luchd-obrach eile bhon BhBC nuair a rinn iad na prògraman iongantach Chinese School. Tha sinn an dòchas gun urrainn dhi ar cuideachadh leis an obair gearraidh.

Tha sinn air obrachadh a-mach nach eil againn ach dà latha airson film deich mionaidean a dhèanamh (tha seo a rèir na th’ againn de dh’ airgead agus obair eile a rinn sin mar-thà). Tha sinn den bheachd gun seall sinn dreachd den fhilm dhi a h-uile latha gus an cùm i sùil air mar a thèid na h-agallamhan a ghearradh. Bheir sinn latha dhuinn gus crìoch a chur air agus mearachdan sam bith a chur ceart. An uairsin, thèid sinn air adhart gun ath fhilm.