Leabhar feumail

28mh Giblean 2008 09:00, Maria

Thug mi Mini Atlas of the World leam gu m' obair an-diugh agus bha e gu math feumail nuair a bha mi a’ bruidhinn ris an treòraiche againn air a’ fòn. Bha e a’ moladh daoine agus àiteachan a bhiodh iomchaidh airson na sgeulachdan eadar-dhealaichte.

Nuair a tha thu ag ullachadh airson filmeadh, tha e cudromach gum bi deagh bheachd agad dìreach dè cho fada 's a bheir thu a’ siubhal bho àite gu àite agus dè an ùine a dh’ fheumas tu chur seachad anns gach àite gus a h-uile càil a tha dhìth ort fhilmeadh. Cho luath 's a tha am fiosrachadh seo agad, faodaidh tu clàr-ama a dhèanamh dhut fhèin a dh’ innseas càite am bi thu gach latha agus cò/dè bhios tu a’ filmeadh.

Bidh e duilich faighinn timcheall Sìona, an ceathramh dùthaich as motha san t-saoghal, as dèidh an Ruis, Canada agus na Stàitean Aonaichte leis na th’ againn de thìde. Tha e dualtach gum bi againn ri itealan a ghabhail a-mach 's a-steach às a h-uile àite. Ged a shàbhaileas seo tòrr tìde, bidh e cosgail agus feumaidh sinn a bhith cinnteach gu bheil airgead gu leòr sa bhuidseat.

An robh fios agad...

'S ann aig Sìona a tha an àireamh-sluaigh as motha san t-saoghal (1.3 billean), am monadh as àirde (Everest), tha crìochan aice le 14 dùthchannan eile agus bu chòir còig raointean-tìm a bhith innte, ach chan eil ann ach aon.