BBC Scotland Executive Report 2007/08

Chaidh mòran obrach a dhèanamh thar na bliadhna a' deasachadh airson Seirbheis Dhidseatach Ghàidhlig iomamheadhanach a chur air chois an co-bhoinn le Seirbheis nam Meadhanan Gàidhlig. Dh'iarr Urras a' BhBC beagan leasachadh a dhèanamh air a' chiad tagradh, agus thugadh cead airson na seirbheis anns an Fhaoilleach. Tha fadachd ann a-nis gus an tèid a cur air bhog air DSat, DCable agus air a' bhann leathann, is dùil ri sin anns an t-Sultain 2008.

Am measg nam prògraman barraichte ann an 2007/08 bha sreath eile de Rapal Tbh. Leudaicheadh am prògram o 15 gu 30 mionaid, agus e a' toirt àrd-ùrlar do thàlant ùr ann an ceòl air feadh Alba, an dà chuid air telebhisean agus rèidio. Bha Gabh Gnothach, a' chiad sreath a chaidh a choimiseanadh bho Spangle le maoineachadh bho Sheirbheis nam Meadhanan Gàidhlig, ag amas air ùidh òigridh a dhùsgadh ann a bhith a' stèidheachadh gnìomhachas.

Leudaicheadh an ùine air BBC Dhà Alba do chlann fo aois sgoile cuideachd, agus a-nis thathar a' craoladh dhaibhsan gach madainn Diluain gu Dihaoine mu 50 seachdain anns a' bhliadhna. Chaidh BBC Alba an co-bhoinn ri Pròiseact nan Ealan gus an tachartas Hiort a chlàradh, ga chraobh-sgaoileadh air-loidhne beò à Steòrnabhagh. Rinneadh an opara Ghàidhlig seo mu Hiort ann an ceithir rìoghachdan Eòrpach eile aig an aon àm.

Lean an t-sreath Eòrpa a' dol bho neart gu neart, a' faighinn moladh an dà chuid bho luchd-labhairt na Gàidhlig agus bho fheadhainn nach tuig i. Anns an iomradh a dh'fhoillsich Coimisean Craolaidh na h-Alba anns a' Chèitean air naidheachdan is cùisean an là, chuir iad an cèill gun deach moladh a dhèanamh air a' phrògram aig gach coinneamh phoblach a bh' aca le inneas ga dhèanamh air cho farsaing, fi osrachail agus a bha e.

Chuireadh seirbheis ùr naidheachdan air-loidhne air chois do luchd-ionnsachaidh agus fi leantaich. Tha an t-seirbheis seo a' tairgsinn naidheachdan mun Ghàidhealtachd agus na h-Eileanan agus a' Ghàidhlig a thuilleadh air an duilleag a tha a' sealltainn na h-aimsire air feadh Alba.

Aig Fèis nam Meadhanan Ceilteach 2008 chaidh Derek Moireach ainmeachadh mar Phearsa Rèidio na Bliadhna. Tha e a' leantainn Màiri Anna NicUalraig, a bhuannaich an t-urram sin an-uiridh, agus mar sin 's e an ceathramh neach air Radio nan Gàidheal a th'air an duais a chosnadh. Air an rèidio fhèin, ràinig Coinneach 15 bliadhna de chraoladh; lean Spòrs na Seachdain air le iomraidhean fi osrachail agus còmhradh air raon farsaing de spòrs, agus bha fèill mhòr air cunntas Gàidhlig air ball-coise nuair a bha Alba a' strì gus faighinn gu Farpais Nàiseanta Ball-Coise na Roinn-Eòrpa 2008. Chomharraich an làrach-lìn Cuairtean Bliadhna Chultarach na Gàidhealtachd on t-Sultain, le turais air-loidhne ann an cuid de sgìrean na Gàidhealtachd. Bha agallamhan-rèidio, dealbhan agus fi os eile na lùib, agus bha an làrach ceangailte ri sreathan aithriseach air rèidio agus telebhisean.

• Previous
• 1
• 2