Cwpled caeth yn cynnwys enw unrhyw dywysog

Y byd. Fai'n well pe bai o,
Madog, heb feddwl mudo.

Ifan Prys8 1/2 pwynt

Cywydd - Cartref

(I Nyfain)

Fel adduned doredig
Y dest, â'th gwynfan bach dig
Teirawr oed yn torri'r hedd
Yn ddi-daw. Yr oedd diwedd
Misoedd maith dy daith dy hun
Yn y floedd ddechrau'r flwyddyn.

Dridiau di-bryder wedyn,
A thaith nad yw'n daith i un
Ar gychwyn - cychwyn mewn car
Â'r byd yn awr bedwar:
Y fi, dy fam, dy chwaer fawr
Yn rhan o gyffro Ionawr.

Ifan Prys

8 1/2 pwynt

Cân Ysgafn - Y Cymro Perffaith neu Y Gymraes Perffaith

Mae ei gwallt fel tresi aur, a'i gwên yn werth saith;
mae Cymru yn ei chalon hi, ond ddim Sir Fôn chwaith,
a di'n malio dim am dreiglo a mân reolau'r iaith:
Dyma fy Nghymraes ... Perffaith.

Mae pob Cymro isio'i phriodi, ma'i 'di gwrthod sawl gwaith;
mae hi'n destun cerddi serch, yr hyfrytaf yn ein hiaith,
ac mae 'na sôn amdani draw ym Mhatagonia ar y paith:
Dyma fy Nghymraes ... Perffaith.

Dydi ddim fel Iances,
dydi ddim yn llances,
dydi ddim fel Ffrances
nac Almaenes chwaith:
mae hi'n hoffi seiclo
'n gwisgo sgidie day-glo
a di ddim yn treiglo:
Fy Nghymraes Per-ffaith.

Dwi'n ei charu yn fy mhen, ers blynyddoedd maith;
dwi di boddi yn ei llygaid gleision dyfnion llaith,
a hi fydd wrth fy ochor i pan ddof i ben y daith
Dyma fy Nghymraes ... Perffaith.

Geraint Lovgreen9 pwynt

Ateb llinell ar y pryd.

Hawlio, hawlio'rwyt William
Loches ym mynwes ein Mam.

1/2 pwynt

Telyneg - Croen.

Pererinion anfoddog oeddym,
yn Rhosyr, mewn minibỳs ysgol;
a'i weipars yn marcio'r eiliadau hir,
a'r glaw wedi dwyn yr olygfa.

"Poni welwch chwi...?" meddai Syr;
a cheisio consurio storom ola'r tywysogion
a'u sêr yn syrthio;
a sut y daeth adar corff i flingo'r llys;
tynnu asennau'r to,
a chario'r cerrig i Gaernarfon.

Ac yna, meddai,
daeth y deri i ymdaro eilwaith
a'r môr yn merwino'r tir,
nes oedd twyni tywod wedi trwsio creithiau'r llys,
a'r hen friw yn llyfn, yn angof.

Ac felly bu, meddai Syr,
nes i ninnau gael ein geni;
a daeth stiwdants o rywle i rofio'r tywod,
plicio'r canrifoedd
yn llawfeddygol gysáct;
ac "edrychwch", meddai,
"poni welwch chwi...?".

Ac edrychasom (i'w blesio).
A gwelsom, drwy'r weipars a'r glaw,
fonion waliau
yn gwarchod gwacter;
gwelsom graffiti dau gariad
fu'n ceisio llonydd yma;

a gwelsom ein hunain, megis drwy wydr,
fel pobl a gollodd bwysau'n rhy sydyn,
yn teimlo eu hanes
yn llac amdanyn.

Ifor ap Glyn9 pwynt