Penllyn V Tegeingl
Ceri Wyn Jones yn pwyso a mesur cynnyrch dau dim o feirdd yn y rownd cyntaf o'r Talwrn.
Penllyn
Tegeingl
Cwpled Caeth yn cynnwys y gair 'Dwynwen'
O Ddwynwen, a ddoi heno
Ar Ionawr oer o'r hen ro?
William Jones Williams
8 pwynt
Cwpled Caeth yn cynnwys y gair 'Dwynwen'
Ei thrwyn yw gwendid Dwynwen
-Heb ei roi i ffitio'i phen.
Moi Parry
8 pwynt.
Trydargerdd- Rhybudd
Cyfarchion i ti#Ceri
Ar ddilyn un o'r cewri,
Ond cofia di mai llai yw'r fraint
Na maint y bwlch i'w lenwi#rhybudd.
Beryl Griffiths
9 pwynt
Trydargerdd- Rhybudd
Na phoener am fydr,
Na phoener am odl,
Dim ond i chi gyfri
Mae trydargerdd yn "dodl".
Marc Lloyd Jones
8 pwynt
CYWYDD: PARTI
(DYLAN)
A'r wlad dan oleuadau
A swyn y pres yn parhau,
Daw hedd llwyr y dyddiau llon
A Gwyl i g'nesu'r galon.
Ar y stryd yn rhwystredig
Mae yn dod yn gwmni dig,
Byw y 'Dolig heb deulu
Yng nghrafangau'r dognau du.
Darn o bren fel gobenydd
Nes daw rhyddhad toriad dydd,
A throeon helbulon byd
Yn un hunllef newynllyd.
Dylan Davies
8 1/2 pwynt
CYWYDD: PARTI
(Nadolig 1914, ar y "ffrynt" gorllewinol)
A synau hen gasineb
Yn oeri'r nos yn nhir neb.
O ganol tarth marwolaeth
Yn ddi-arf, gelynion ddaeth
I newid lle, ysgwyd llaw,
Eistedd a gwenu'n ddistaw.
Canu'n braf yn llawn afiaith
Un emyn dôn mewn dwy iaith.
A naws Gŵyl ar faes y gad
Oedant, yn hedd cadoediad.
Yna'n dawel dychwelyd
Yn ŵyn bach i ryfel byd.
Marc Lloyd Jones
9 pwynt
Englyn yn cynnwys y llinell "Yn Llansannan fe synnes"
Yn Llansannan fe synnes - fod 'na feirdd
Fod 'na fwy drwy hanes,
A'r rhain ar golofn yn rhes
O ddynion, heb un ddynes !
William Jones Williams
8 1/2 pwynt
Englyn yn cynnwys y llinell "Yn Llansannan fe synnes"
Yn Llansannan fe synnais - o weld dim,
Na chlywed un adlais
O'r heniaith bêr a gerais,
Ond sŵn dienaid y Sais.
Pedr Wyn
7 1/2 pwynt
Cân ysgafn- Y Llywodraethwyr.
Os oes amser ar eich dwylo
Ac am swydd sy fawr ei bri,
Ewch yn llywodraethwyr, bobl
Swydd a statws iddi hi.
Chi fydd wedyn yn gyfrifol
Medde nhw am blant y fro,
Chi fydd hefyd yn ymlafnio
I gael 'thrawon wnaiff y tro.
Bydd rhaid trafod diogelwch,
Asesiad risg, a phethe mawr
Fel pa faner fry i'w chwifio
A pha bryd i'w thynnu i lawr.
Ond cyn ichi neidio'n eiddgar
At swydd bwysig a wnaiff les
Cofiwch, peidiwch disgwyl gormod
Y mae'r grym gan fois y pres.
Beryl Griffiths
8 pwynt
Cân ysgafn- Y Llywodraethwyr.
Mewn rhyw dŷ cyffredin anferth
Mae dau gogydd wrth y llyw,
A'u bwriadau tra gwahanol
Yn creu prydau at ein byw.
Ond mae prinder y cynhwysion
Yn rhoi i rai blateidiau bach
Tra bo cafiâr a gwinoedd
Ar y bwrdd o flaen y crach.
Y pencogydd sy'n coginio
Efo'i lyfr ryseitiau drud,
Dim ond rhoi y sos a'r halen
Wna ei ddirprwy bach o hyd.
Beth a ddaw o'r gegin swnllyd
Lle mae'r ddau yn mynnu'u hawl?
Ninnau'n gwybod bod y ddeuddyn
Yr un mor dda am wneud y cawl.
Moi Parry
9 pwynt
Limrig yn cynnwys y llinell- 'Pan oedd Robbie Burns yn talyrna'
Pan oedd Robbie Burns yn Talyrna
I dafarn y werin ai ynta
I ganol y genod
Y bardd oedd yn gwybod
Y câi mysg y rhosod ei wala.
William Jones Williams
8 1/2 pwynt
Limrig yn cynnwys y llinell- 'Pan oedd Robbie Burns yn talyrna'
Pan oedd Robbie Burns yn talyrna,
A Shakespear yn ceisio meuryna,
Roedd Bala pryd hynny
Yn dîm ar i fyny,
Dwi'n synnu bod rhai yn dal yma.
John Gruffydd Jones
9 pwynt
Ateb llinell ar y pryd
Pa werth sydd mewn cicio pêl
Jiw Jiw hwn yw fy Jiwel.
0 pwynt
Ateb llinell ar y pryd
Aayne yn gam ei anel
Pa werth sydd mewn cicio pêl.
Englyn- Band
Mi chwythwn gornet eto - boed arian,
Boed aur, am gael martsio
Gam wrth gam, i Stryd y Go'
Wybod fy nyfod heibio.
Iwan Bryn Williams
9 pwynt .
Englyn- Band
Rho iddo gyfarwyddyd - a'r wialen
Ar eiliad disyfyd.
A chwifia dy fraich hefyd
A'r band fydd yn deffro'r byd.
Pedr Wyn
Pedr Wyn
8 pwynt
Telyneg - HEOL
Yn sinema y côf fe'i gwelaf eto'n glir,
Stryd Dwr, y llwybr paradwysaidd rhwng dau glawdd.
Yno y byddwn i yn ffoi, rhwng brigau ir,
Pan fyddai'r byd yn boen, fan hyn roedd hi yn hawdd
Ymgolli. A'r haul yn chwarae mig rhwng y dail
Fe lithrai'r nant yn llyfn o bwll i bwll, yn frith
O berlau amhrisiadwy na welais i eu hail .
Ond pylu wnaeth y ffin rhwng ffaith a rhith,
A daeth rhyw reidrwydd i ddychwelyd eto i'r Stryd.
Ond nid yr un yw'r ffordd sy'n fy wynebu i
Nid oes ond baw a llaid a difrod ar ei hyd.
Aeth y baradwys gynt yn yfflon gyda'r lli.
Ac yma yn fy siom, rhaid im wynebu'r ffaith
Na thal hi i chwennych ddoe, na'i droi yn ddelfryd chwaith.
Beryl Griffiths
8 1/2 pwynt
Telyneg - HEOL
Prin bod Paradise Street
Yn gweddu fel enw
I'r rhes o dai unffurf
A linynai
O gylch gwaelodion y Cwm.
Codai eu mwg fel gweddi
I ddistiau metel y gwaith dur,
A hidlo'n araf
I lwydni'r dydd.
Ond
Roedd sglein ar garreg
Pob drws di-glo,
A thincian yr esgidiau hoelion
Yn croesawu'r bore.
Heno
Mae enw 'Rhes y Cwm'
Mewn Cymraeg sglein ar y mur,
Y gwaith yn sgerbwd mud,
Pob drws ar glo,
A minnau yn adnabod neb.
John Gruffydd Jones
9 pwynt
Englyn ar y pryd- Capten
Wrth y llyw yn ffraeth a llawen-'roedd ddoe
Yn rhyw Dduw o gapten
Yn agor eto i griw clên
I'w hargau mor ddiangen.
9 pwynt
CYFANSWM 76 PWYNT
Englyn ar y pryd- Capten
Yn griw hen mewn llawenydd- y tynnwn
Drwy'r tonnau bob tywydd;
Heriwn ffawd a rhannu ein ffydd
Dan Owen Capten newydd
8 1/2 pwynt
CYFANSWM 76 1/2 PWYNT
Chwilio
Amserlen
Ar yr awyr nawr
05:00Richard Rees
Richard Rees yn cyflwyno'r gerddoriaeth orau o bob cyfnod, o'r 70au a'r 80au hyd heddiw.
