Cwpled Caeth ar yr odl ar yr odl 'ol'

Cynnau mae'r Dwyrain Canol
Y tân i waedgwn Whitehall.

Robin Huws
8 pwynt

Cywydd- Maddeuant.

Fy nhad 'rwyf yn bechadur
Yn ffiaidd dan giaidd gur,
Ac 'rwy'n ôl. Fu dim holi
Llawenydd o ddydd oedd hi,
Ail wisgo'r mab a'i nabod
Yn bur fel tae' dim 'di bod;
Yna gwledd a phawb yn glyd
A rannai falchder ennyd.
Ei frawd hŷn ni chytunai
Ni ddoi'i fewn faddau'i fai,
Yna'r tad a ddaeth o'r tŷ
I'w fynwes a'i gyfannau.

Machraeth
8 pwynt

Cân - Cystadleuaeth.

Un noswaith cyn Nadolig ar Sianel Pedwar C
Daeth i mi chwant cystadlu enillais gyda chlec.
Y glec oedd Cracer Dolig, ar raglen Wedi Saith,
A ddaeth a'r wobr imi 'rol ceisio lawer gwaith.

A dyma sut 'renillais, John Hardy'n mofyn rhif,
Dewisiais innau ddeunaw, i mi hwn oedd y prif.
Ac meddai John wrth edrych y papur yn ei law,
"Rych wedi ennill I Pad", roedd hynny imi'n fraw.

I mi nid oedd gwahaniaeth rhwng I Pad , Neu I Pod,
Efallai fod gwerinwr 'roes yma braidd yn od;
Ond na, 'roedd holl wybodaeth bydysawd yn fy llaw,
A'r cwbwl mewn modfeddi o ddim ond saith wrth naw.

Ac O! y fath gystadlu a ddaeth i mi drwy'r post,
Yn cynnig pris cysylltu, a phwy oedd leia'i gost.
Rwy'n awr ar Fand Byd eang sy'n cynnig i bob un,
Y melys fel y chwerw, brwydr pegynau dyn.

Bu hon yn gystadleuaeth a barodd i mi fraw,
Gweld rhai'n tra arglwyddiaethu ar bopeth sy'n ei llaw.
Ond weithiau gwegia'r cread, ac ni all deall dyn,
Wneud synnwyr o'r dirgelwch sy'n rhan o angau hun.

Eurfon Griffiths
8 pwynt

Ateb llinell ar y pryd.

Pa raid i neb briodi
Yn y sŵ fel chimpansi

0 pwynt

Telyneg : Dial

Y dial gwir urddasol
Yw ein maddeuant llawn,
Fel Crist mewn poen arteithiol
Rhwng lladron un prynhawn,
Yn maddau i un ei feiau
Tra'r llall â geiriau gwawd
Er gweld y gwaed o'i greithiau.
Yn methu â'i weld yn frawd;
Ond gwelodd hen ganwriad
Am dri o'r gloch ei hun,
O'r duwch mawr ddylanwad
Ar Groes un mwy na dyn;
A lladdwyd pob dialled
Pan fwriodd hwn ei ddis
Tros ddilyn anfeidroledd
Yr Un fu'n talu'r pris.

Eurfon Griffiths