CWPLED CAETH yn cynnwys enw coeden

Parhau'r haf sydd yn y pren
wna gaeaf gwin ysgawen.

Geraint Roberts
8 1/2 pwynt

Cywydd - Geiriau

cofnod byr mewn Beibl teulu o un a gollwyd yn y Rhyfel Mawr

Dyma'r 'ganed' mor gynnil
i arwr rhad Somme yr hil,
a dagrau y blotiau blêr
yw'r enw ar ei hanner.

Y brawd iau trwy'r beiro du
a'i linach yn melynu,
a chyn lleied yw'r dwedyd,
yr alffa ac omega mud.

Un dolur lond tudalen
yw'r lliw inc rhwng cloriau llên,
a llaw un yn tyngu llw
oferedd y 'bu farw'.

Geraint Roberts
9 pwynt

Cân- Iechyd a Diogelwch

Fe ges i lythyr gan foi bach o'r Cyngor
i ddweud na chai Santa ddod acw ddim rhagor,
a choeliwch chi fyth ei reswm o ydoedd
nad o'n i wedi llnau y simdde ers misoedd:

ac roedd peryg i'r dyn, wrth ddod lawr drwy y gwagle,
i gael huddyg a llwch i fyny ei ffroene.
Atebais yn ôl mod i wedi confertio
i gas ers sawl blwyddyn, ond wnaeth o ddim gwrando...

Doedd y residence parking o flaen y ty
ddim yn "applicable" fyny fry;
ac fe allai y ceirw ddod â ffliw, neu'n wa'th,
ffliw adar, ffliw ieir neu yn wir hen ffliw cath.

A hefyd, os byddai y reindeer yn teilo,
pwy fyddai'n gyfrifol am ei symud o odd'no?
"Dim problem," dywedais, "mae'r demand yn uchel,
mae'n ardderchog i riwbob, yn well na baw camel."

Ond er yr holl drafod, fe ddaeth Santa Clos
ar noswyl Nadolig rhyw dro yn y nos:
fe ddaeth, ac yfed y sieri i gyd,
cyn cael breathaliser ar waelod y stryd.

Harri Williams
8 1/2 pwynt

Ateb llinell ar y pryd

I'r Alpau ar wyliau yr af ...
A sgio dros y gaeaf..

1/2 pwynt

Telyneg - Ofn

Fe wyddwn i, yn bum mlwydd oed,
fod bleiddiaid dan fy ngwely,
a sleifiai allan, ddant wrth ddant,
yn syth ar ôl cau'r llenni.

Yn nrws y wardrob, eto fyth,
roedd ellyll yn cyrcydu;
po fwya'r chwys, y mwya'r âi
yn nüwch oer y llenni.

Er bod pob munud megis awr
a dwyawr yn ofnadwy,
fe wyddwn i y deuai'r haul
ryw bryd i ddeffro'r llenni.

Nid blaidd sydd bellach yn fy nos
na'r diafol o ran hynny,
ond cael fy hun, dim ond fy mod,
a neb tu ôl i'r llenni.

Mari Lisa
9 pwynt