Y Talwrn - Dinbych V Cadw'r Ffin
Gerallt Lloyd Owen yn pwyso a mesur cynnyrch dau dim o feirdd yn y rownd gyntaf o'r Talwrn.
Cwpled Caeth ar yr odl 'in'
Ar "Cefn Gwlad", lled gyffredin
yw i Dai fod ar ei din.
Berwyn Roberts
8 1/2 pwynt
Cwpled Caeth ar yr odl 'in'
Bydd Yncl Dafydd Franklin
Yn eitha boi yn syth bin.
Dafydd Franklin Jones
8 pwynt
Pennill Mawl / Dychan - Yr Heddlu
Yn sgîl y gor-gynilo,
at sŵn hen oes awn eto:
sŵn gwadnau 'sgidiau ar y lôn,
nid ffôn neu hedfan heibio.
Eifion Lloyd Jones
8 1/2 pwynt
Pennill Mawl / Dychan - Yr Heddlu
Nhw sy'n gwneud eu gorau glas
I'n gwarchod ni rhag lladron cas,
Pob bygythiad, a phob byrglar -
Ond mae'r ffôrs yn llai o'r hannar.
Gwnaed toriadau effeithlonrwydd:
Crwcs sy'n dawnsio mewn llawenydd!
Cwyno? Ewch at eich cynghorydd....
Wps! Na - sori - Comisiynydd.
Rhwydd yw canu clod yr heddlu
Anodd, anodd yw eu talu.
Alun Evans
8 pwynt
Cywydd: Dyled (Ffred Ffrancis)
Mewn oes, y mae yna un
na wêl gryfder y gelyn
na'styried anhawsterau;
un ar ras i gario'r iau.
Ei farn yn gadarn trwy'r gwawd
a'i waedd yn ddigyfaddawd.
Ni y rhai sydd ofn troi'r drol
yn mwydro yn gymhedrol
am wlad, am iaith, ac ymhlith
yr euogrwydd mae rhagrith.
Ein dewis, bod yn daeog,
yn rhy llwfr i dalu'r llog.
John Glyn Jones
9 1/2 pwynt
Cywydd: Dyled
I Gardi roedd ei gerdyn
Yn nef. Pa ryw swyn yw hyn?
Mwynhad oes yn M and S
O wên lydan ei lodes
Yn dewis gwisg rôl gwisgoedd
a gwario dim- gwir hud oedd!
Rol gwenu wrth brynu bra,
Dewis nôs Next sy'nesa-
Pyjamas del i'r gwely,
Te hael cyn mynd nôl i'r tŷ.
Mwy noeth fu trannoeth mwynhad
O dialedd methdaliad.
Sion Aled
8 1/2 pwynt
Englyn Beddargraff
O ddrws i ddrws nid oedd yr un - ddynes
na ddenai'n go sydyn:
Yn unig aeth er hynny'n
hen lanc i'w wely ei hun.
John Glyn Jones
8 1/2 pwynt
Englyn Beddargraff
Cowntiais ar ddosbarth cyntaf- o fywyd
Ond ni fu.Derbyniaf
Finnau mai'r gorau a gaf
Yw ail-da beth yr ildiaf.
Meg Ellis
8 pwynt
Cân: Diwrnod i'w Gofio
Roedd Jini Jones yn nainti, yn weddw ers cyn co',
A'r unig gwmni ganddi, oedd ei chath fach ffyddlon, Jo.
Un tro, tra'n llnau y brasus 'fo Brasso'n braf ei byd
Fe welodd debot diarth, a hwnnw'n llwch i gyd.
O'i rwbio gyda'i chadach, fe glywodd ddiawl o glec.
Daeth mwg o'r tebot bychan. Medd Jini, "Fflipin hec,
Dwi'n mygu, Jo, be wnawn ni?" Roedd yntau 'di cael braw.
Y cyfan fedrai dd'wedyd, 'nei gryndod oedd "Mi-aw".
Rôl sychu'r sbectol drwchus, a'i gwisgo'n ôl mewn strach
Fe welodd ddyn glas gloyw yn dod o'r tebot bach.
"Nac ofnwch, Genie ydwyf," medd wrth y wraig yn cŵl,
Medd hithau "Paid a rwdlan, y fi 'di Jini'r ffŵl."
"Cewch gen i ddau ddymuniad," cyhoeddodd y dyn glas
"Dwi isho bod yn brydferth," medd Jini fach ar ras,
"A dwi'sho'r gath ma s'gin i, i gael ei throi yn ddyn."
Ac ar ôl clec fawr arall, roedd Jini'n hardd ei llun.
Nid oedd ei chymar bellach yn bwsi meri mew,
Roedd o yn ddyn golygus, a'i gorff o yn ddi-flew.
Ond roedd o'n gwisgo lipstic, a sgert. Ga'th Jini 'fflip',
Roedd hi yn llwyr ddifaru i Jo y gath gael 'snip'.
Gwenno Davies
8 1/2 pwynt
Cân: Diwrnod i'w Gofio
Cawsom ddiwrnod i'w gofio pan briododd y ferch
Efo'r priodfab mor dalsyth yn wrthrych ei serch.
Roedd na sôn basa traffarth efo'r teulu-yng-nghyfarth:
A siarad yn blaen, maen nhw yn rai reit ddiarth.
Ei dad o a'i fusus (rhif dau) yn reit glên
Ond ei daid o'n rêl bwbach anfoesgar, di-wên.
Hi'r nain - dynas grand - 'di'r bòs yno, wrth gwrs
A phawb yn cow-towio: ganddi hi y mae'r pwrs.
Ond mae'r hogyn ei hun yn iawn, 'nôl pob sôn
Er ei fod o yn gweithio i ffwr' - yn Sir Fôn.
Roeddan ni wedi meddwl am briodas fach ddel
Mewn tŷ mawr yn y wlad neu rhyw westy go swel;
Ond na, rhaid cael eglwys - y crandia'n y plwy -
A do, gostiodd hynny ryw geiniog neu ddwy,
Heb sôn am y ffrog oedd yn ddrud fatha pupur,
Ond o, roedd y lluniau yn neis yn y papur.
Gododd jôcs y gwas priodas (ei frawd) ambell wrychyn,
Ond be dach chi'n ddisgwl gan sowldiwr o gochyn?
Dyna hanas y briodas yn daclus mewn pennill
Ond yn ôl y sibrydion, bydd un arall fis Ebrill.......
Meg Elis
8 pwynt
Limrig yn ymwneud â ffasiwn
Bu Adda ac Efa'n cynhyrchu
Dilladach ar gyfer eu gwerthu,
Ond daeth pethau i stop,
Aeth yr hwch drwy y siop,
Doedd neb arall o gwmpas i'w prynu.
Berwyn Roberts
8 1/2 pwynt
Limrig yn ymwneud â ffasiwn
Mae'r esgid yn gwasgu
A'r cnawd o'r holl blygion yn tasgu
Fydd hi byth yn seis dim
Ond â diet go chwim
Gwnaiff i Ferched y Wawr genfigennu.
Meg Elis
8 1/2 pwynt
Ateb llinell ar y pryd
Ni wellaf ers ei cholli
Y mae lon oer o 'mlaen i.
1 pwynt
Ateb llinell ar y pryd
A'r awen bron a rhewi
Y mae lon oer o 'mlaen i.
0 pwynt
Englyn Cywaith: Traeth
Ynof y mae broc o gofio - dyddiau
diddig a diddarfod;
Rhwydo hwyl y mynd a'r dod
ein doeau ar ei dywod.
Berwyn Roberts
9 pwynt
Englyn Cywaith: Traeth
Tawel yw tir neb y tywod- heddiw
dyma hedd y darfod
rôl gweld ton ar don yn dod;
gelyn o gantre'r gwaelod.
Meg Elis
9 pwynt
Telyneg:Wyneb
(ar ôl darllen am fachgen bach sy'n methu gwenu oherwydd cyflwr meddygol, ac felly'n gwgu'n barhaus, druan)
Heb wên i dorri'r garw,
mae'r byd yn gwgu'n ôl;
a'i rieni'n gweld dim...
sut mae o'n teimlo
er mwyn ei gysuro
a chael cysur ganddo.
Yntau'n gaeth
i'w wyneb,
yn methu
rhannu'i gariad -
na dangos ei ddicter,
weithiau.
Eifion Lloyd Jones
9 pwynt
Telyneg:Wyneb
"Eli, Nain, eli!"
A'i bysedd dwyflwydd yn sbona'n y potyn,
yn arbrofi'r hufen dros lyfnder croen
sy'n sgleinio â diniweidrwydd.
Gyda bysedd doethach
mesuraf y ddogn iawn
i gydbwyso'r croen,
powdro dros unrhyw sglein.
Cyn sbio'n y drych
ar yr wyneb gorffenedig
a chwilio am y plentyn.
Meg Elis
10 pwynt
Englyn ar y pryd- Trafnidiaeth
Mae ymffrost mewn e-bostio-ein hanes
lawr y lein yn gryno
yn ei bryd, ond angen bro
yw gwersi sut i sgwrsio
John Glyn Jones
9 1/2 pwynt
CYFANSWM- 80 1/2 PWYNT
Englyn ar y pryd- Trafnidiaeth
Er cof am drên Wrecsam- Marleybone
Ni wnaeth i ni hiraethu- am y tren
Mae y trac yn rhydu
Yn ei seidin does wadu
Joio nawr mae'r virgin hy'
9 pwynt
CYFANSWM- 77 PWYNT
Chwilio
Amserlen
Ar yr awyr nawr
05:00Richard Rees
Richard Rees yn cyflwyno'r gerddoriaeth orau o bob cyfnod, o'r 70au a'r 80au hyd heddiw.
