Cwpled Caeth ' -ai'

Fe gaem urddas petasai.
'R cyfoethog â'u llog yn llai.

Gwen Jones
8 pwynt.

Cywydd- Gwarchod.

(Hydref 2009) Ar ddiwrnod gwlyb yng ngardd goffa Tower Hill, Llundain, cofeb i'r morwyr a gollodd eu bywydau yn ystod y ddau ryfel byd. Coffeir fy ewythr, Emlyn Thomas o Rydlewis, ar un o'r meini. Bu farw ar fwrdd yr Emiliano ym 1942, wedi ei tharo gan dorpedo)

Eiliad fach ganol Tachwedd
I gof un heb garreg fedd.
Glaw mân yn gloywi meini
Yn yr ardd, fy seintwar i;
Geiriau glân ar garreg lwyd
I gofio'r golled gafwyd.
Yno, ym mysg yr enwau,
Un a'i ffawd rwy'n ei goffau;
Pêl dân 'r Emiliano
Â'i hysodd, a'i hawliodd o.
Eiliad fach ganol Tachwedd
I gof un heb garreg fedd.

Terwyn Tomos
9 pwynt.

Cân - Iechyd a diogelwch

Torri nghoes dan fêl o wair, troi fy migwrn yn y ffair,
Dala mriach yn yr haff shafft, mynd i'r sbyty i gael grafft;
Dyfod adre, mas am dro, dringo cloddie wna i sbo,
Disgyn ar nyth cacwn cas, nhw a fi yn rhedeg ras;
Health and Safety yn y tŷ yn disgwyl am fy ngweled i;
Mynd i gwato dan y co'd, storm o d'rane draw yn dod,
Gan daro'r goeden yn ei hanner, ac ar fy mhen disgynnodd gwiwer.
Nôl am adre, hala'r ci mas i'r beudy i neud pi pi,
Cay y cathod yn y cêj, rhain yn sgrechian, llawn o rêj;
Cael intsructions pendant felly gan y bois o'r 'Health and Safety' -
Rhoswch yn y tŷ yn gyson, wrth eich hunan, heb gysuron;
Peidiwch byth a chare concers, gall eich hala chi yn boncers,
Os cewch eich taro ar eich pen, falle bydd hi yn Amen.
Cyn bo hir ni fydd dim byd a gawn ni wneuthur ar y cyd;
Ma'n nhw'n whilo pethe dwl a rheiny gyd yn llawn o 'bull';
Mynd i'r capel ar fy rownd, ond mae'n llofft ni owt of bownd;
Sdim hawl dringo lan y grisie rhag in gwmpo ar ein penne,
A mwy na hynny gallwn sgwasho ein gweinidog ni a'i fflato.
Ma'r 'Health and Safety' am ein rhwystro rhag mynd i'r nefoedd am ein credo,
Rhag ofn fydd Pedr ger y gatie wedi torri rhai rheole.

Gwen Jones
8 pwynt

Ateb Llinell ar y pryd

Nid wyf yn dda ar lwyfan
syn wyf a nhgoesau'n wan)
1/2 pwynt

Telyneg- Perthyn

(I nhad)

I beth yr ymbalfalaf am dy nabod
a thithau'n ddim i mi ond llun mewn ffrâm?
a'th fyw
yn ddim ond cysgodion mewn caddug
yng nghilfachau atgofion
y rhai a gydgerddodd â thi.

I beth y ceisiaf ddeall?
ni all atgofion benthyg
osod fy llaw yn dy law dithau,
na llonyddwch llun roi ias y perthyn i ni'n dau

Ond, ym mhellter y blynyddoedd,
gwn i mi dy nabod unwaith,
ac i tithau fy nabod innau'n dda.

Terwyn Tomos
9 pwynt