Cynigion ychwanegol:

Cwpled caeth ar yr odl 'wn':

Ymroi i fyw mae rhai, fe wn,
yn unswydd am eu pensiwn.

Ei racsio fesul ffracsiwn
yw ein greddf, o'i gael yn grwn.

Mewn ffydd garddiwn y gwndwn
a rhoi had yn naear hwn.

Byw ei awch wna dyn dan bwn
oes o eisiau'i obsesiwn.

Heb boeni am bôl piniwn,
dweud ei ddweud wna'r gwleidydd hwn.

Pan fydd gwarth fel cyfarth c?n
ynof, mi gofiaf Annwn.

I un sy'n was i ffasiwn,
Chanel yw'r label i hwn.

Limrig yn ymwneud ag aros mewn gwesty:

Welodd Mari Trelech ddim bidê
nes bu hi mewn gwesty'n y dre'
a dweud wrth ei gwr:
"Dyma'r ffynnon, mae'n siwr,
a dwr i wneud paned o de."

"B an' B yn yr Emlyn fydd ora,"
awgrymais i Meri drws nesa';
a noson i'w chofio
yn wir ydoedd honno.
A'r brecwast? Cawn hwnnw'r tro nesa'.

Y plans oedd cael mynd gyda'i gily'
am wythnos o wyliau eleni,
ond medd Martha: "Sai'n dod."
Medd Wil: "Beth sy'n bod?"
"Does 'da nhw'm comôd wrth y gwely."

Aeth ffermwr o'r ffordd hyn i'r Belle Vue
a chael bwydlen yn Saesneg, men-u,
roedd hi at ei ddant,
yn ateb pob chwant,
a daeth ato i'r Oernant i fyw.

Englyn yn dechrau â'r gair 'Gwelais':

Gwelais ddiffodd y golau - un nos Sul
ar ras wyllt i'r siopau;
daw rhyw ias o gloi'r drysau
ddoe'n y cwm, a'n ffydd yn cau.

Wedi'r daeargryn yn China

Gwelais y ddau 'da'i gilydd, - yr ysgol
a'r ysgwyd yn llonydd,
eu llyfrau'n un â'r llofrudd,
y wal rad a'r wylo rhydd.

Wrth ddarllen Llyfr Mawr Y Plant i fy nai

Gwelais hen lwynog eilwaith - ar ei duth
yn nhir doe fy afiaith,
a chenau bach ei heniaith,
liw nos, wêl flewyn o'i iaith.

Gwelais y brad a'r gwadu - a gwyliais
y gelyn yn ffynnu;
ond, er hyn, y rhod a dry
a'r heniaith fydd, er hynny.

Cân (heb fod dros 20 llinell): Yr Argyfwng

Ym mis Mai 2008 fe fethodd y sustem garthffosiaeth yn yr orsaf ofod, a bu'n rhaid gyrru cyfarpar gyda roced yno er mwyn ei gywiro.

Ochor yma i'r sêr, ond tu draw i'r cymylau,
mae Meccano anferth i astudio'r planedau,
ond, yn yr ehangder ar ddiwedd mis Mai
yng nghanol y geriach, datblygodd rhyw fai.

Beth a alwyd yn doilet, wel, wnai o ddim gweithio -
rhyw washera spli-pin bach oedd wedi nogio;
meddyliwch, mewn difri', am hogiau y roced
hanner ffordd lan i'r nefoedd yn gweddïo am bwced.

Roedd Lyca, y ci, a sawl hen fwnci
wedi teithio'r ffordd honno heb orfod pipi;
ac os byddwch yn cerdded hen lwybrau'r wlad
mae llwyni a pherthi er mwyn cael rhyddhad;
ond, i fyny yn fanna, wedi'ch selio mewn swigen,
dyna pryd y gwyddoch beth yn wir ydi 'angen'.

Heb agor un ffenest, gollyngwyd i'r gwagle
ychydig o'r gwynt - fe aeth allan i rywle;
doedd y dynion bach gwyrdd sy'n byw yn y gofod
ddim yn gyfarwydd â'r math yma o ddrewdod.

A'r tro nesa', pan fydd yr Andrex 'di gorffen,
cofiwch gofio, yn siwr, am y bois yn y lloeren.

Cân (heb fod dros 20 llinell): Yr Argyfwng-it is

Ar ymddeoliad Dr Elwyn Parry, fy meddyg teulu, Mehefin 27

Dweud wyf, heb fod hanner da,
(adref â hypochondria),
fod Pen'groes fy oes fy hun
yn waelach, Doctor Elwyn;
a'r nerf oedd yn Corwen House
yn cwyno am feddyg hynaws.

Ces oes â lot, lot o tonsilitis
a range i'w hatal - o pharyngitis
ac achos, nid sleit, o laryngitis
i nosau o swatio â sinusitis;
hitia atynt bwl cas o otitis
a wedyn, i weitiad, tendonitis;
mwy, i ti etyb fy dermatitis,
deuaf atat â'm conjunctivitis
a f'aciwtiaf bronchitis, (bûm glaf, do),
a disîs eto - appendicitis.

Mae meddyg i mi heddiw?
Mae yr un i wella 'mriw?
a Phen'groes fy oes fy hun
yn waelach, Doctor Elwyn.

Cywydd (heb fod dros 12 llinell): Marchnad

Y têc awê

O Hong Kong daeth i bob cwm,
gwertha reis, ac wrth reswm,
aml i saig, melys a sur,
os yn fas iawn ei fesur;
chow mein mor ffein ma's o'r ffwrn
yn sydyn ar nos Sadwrn,
cyri oen neu borc ar wib,
a'i sbarion yn gwneud sbarib;
chop suey, chips a soia,
bambw a kung fu a ffa
mewn tin ffoil a'i oil yn lân,
i'm ffido heb ddim ffwdan.

Pennill mawl/dychan : Rhagolygon y Tywydd

'Rôl gwrando'r holl broffwydo sych gan aml un hyd syrffed,
rhyw daro wnaf yn ysgafn iawn ar wydyr ar y pared;
mae'n iawn bob tro, pa un ai storm neu hindda fydd hi fory,
heb angen gwrando'r sêr sy'n cwympo'n gelwydd ar deledu.

Rhyw damaid o wymon a mochyn coed
roi'r tywydd i Taid, a fethon nhw erioed;
aeth rheiny i'r bin pan ddaeth y TV
a Michael a Sian, ond, coeliwch chi fi,
rwyf heddiw'n difaru yn ddi-baid
na etifeddais ffydd fy nhaid.

Cynhesu byd-eang

Un tymor, fe ddaw'r twymo - a'r nwyon
i grynhoi fel amdo
a throi'r cyfan otano
yn dir wast mewn fawr o dro.

Englyn cywaith : Taid/Tad-cu

Llun o'm taid wrth glirio'r hen gartref i'w werthu

Ai gweddi neu gyhuddiad - a welaf
yng ngolau ei lygad, vneu ai drych yw'r edrychiad
a fi'r un synhwyra frad?

Gweld hen lun o'm tad-cu, ac yntau wedi bod yn arddwr, fel ei dad yntau

Un garw, ond gweld blaguryn - a wnaf
yn y wên ddiderfyn
ac ar ei wedd mae gwreiddyn;
gardd ei oes yw'r gruddiau hyn.

Telyneg: Dosbarth

Y dosbarth canol Cymraeg

Weithiau, pan fydda' i'n cofio'r gwir,
mi gofia' i genedlaethau'r tir;

a weithiau, pan fydd ddoe yn ffaith,
mi wela' i'r aberth yn eich gwaith;

rhyw ambell ddiwrnod, ambell dro,
mi ddaw eich llafur eto i go';

ond pan ga' i ras uniaethu'n llwyr
mi wn ei bod hi'n rhy, rhy hwyr

i ddiolch am yr hyn a wnaed
a sylweddoli'r hyn a gaed

oherwydd, os maddeuwch chi,
eich bod o ddosbarth is na mi.