Cynigion ychwanegol:

Cwpled caeth yn cynnwys enw lle yn Iwerddon:

Dyhead i siarad sydd
yn Stormont wedi'r stormydd.

Dewch i weld un wlad a cham
ei hanes yng Nghilmainham.

Yn naear Connemara
Waldo ei hun fu'n gweld ei ha'.

Loes i rai yn y Falls Road
yw i derfysg gael darfod.

Rhyw hedd sy'n gyfareddol,
dyna gawn yn Donegal.

Mae inni mwy'n Omaha
naws y nos a'n hynysa.

Daw dy air i dre' Derry,
daw'n dy iaith dy Lundain di.

Limrig yn ymwneud â ffonio:

Rhoed arno yr enw 'ffôn mudol'
sy'n gelwydd a gwir gamarweiniol.
Er dweud fod o'n fud,
mae o'n canu o hyd
fel tasa y byd yn y diafol.

Englyn yn cychwyn â'r geiriau "Rwyf heno..."

Miles, hysbyseb NSPCC

Rwyf heno'n dy wylio di - yn nesàu
wrth i'r sain ddistewi;
daw'r glatsien rhwng rhaglenni
i wylo'r nos ein parlwr ni.

Cân(heb fod dros 20 llinell): Problem(au)

"Mae hwn yn edrych yn rhywbeth rhwydd iawn,"
meddai Mari'r wraig 'cw un prynhawn.
"Dim ond gosod y rhifau o un i naw
yn groes ac i lawr - mae'n hawdd fel baw."
A dyna fu cychwyn yr helynt mawr -
roedd hi'n iawn ar draws, ond nid ar i lawr.
Ymhen ychydig, fel arall, a'i thymer yn codi,
yn wir, ymhen tipyn, roedd hi'n difaru fy mhriodi.

Mae hi'n stwbwrn fel mul - mae hi yna o hyd
dair wythnos ymlaen, a daeth newid byd.
Rwy' nawr yn siopa a glanhau a chwcio,
bwydo'r gath a'r ci a gwneud y smwddio.
Rwy'n deall yr Hoover a'r tymbl-dreiar
ac mae 'nghartre clyd i bellach yn garchar;
dim mynd ma's am beint a sgwrs yn y Ship,
dim cwrdd â'r bechgyn ac ambell i drip;
dim bowls a dim golff - dw i ddim yn mynd allan
'm ond lawr i Tesco, heb gyfle i loetran.

Onid dyma fu'n hanes ni, blant y llawr?
Y broblem fach yn creu y rhai mawr.

Cywydd(heb fod dros 12 llinell) yn dechrau â "Do, bu..."

D?r

Ymweliad â man bedyddio Iesu Grist yng ngwlad Yr Iorddonen

Do, bu Ef fan hyn hefyd
a daw'r ias o'r d?r o hyd;
un byw yw'r ffos lle bu'r ffydd,
a'i bwdel lle bu bedydd.

Yn y rhyd, mae ffrwd yr ha'
a thonnau gwyn Bethania
yn troi'r llif dros y tir llwm
i lanw dau fileniwm.

Mae'r anwedd fel môr ynom
nes i lais sibrwd shalom,
a gweled crychau'r credo
yn y don, lle bu Ef, do.

Pennill ymson wrth unrhyw fynedfa:

Fe fûm, fel twrnai, lawer tro,
yn pledio ger ustusiaid bro
tros rai dieuog, gan ymroi
i'w cadw nhw rhag cael eu cloi.
Ond heno, Pedr, gwranda di,
rwy'n pledio nawr fy achos i;
does dim i'w wneud ond mentro'n ewn
i geisio cael fy hun i mewn.

Tu allan i'r ddeintyddfa

Rhyw drafferth fu i'w tyfu,
a thrafferth fydd i'w tynnu
os na wnaf fynd, yn ddiymdroi,
er mwyn cael cnoi yfory.

Wrth fynediad i fedd Tutankamun

Fel y Cofi o'r blaen, rwy'n sefyll yn syn,
nid pawb sy'n gyfartal yn farw ffordd hyn;
rhaid bod aur yn cyfrif i rai'n yr hen fyd,
mae'r un gladdwyd yma ar grwydyr o hyd.

Englyn cywaith - Niwl

Gwraig yn dioddef o glawcoma

Oedodd y tarth ym Medi - a'i gwmwl
yn gymysg amdani,
yr anwedd ara'n cronni
ar wydr oer ei Hydre' hi.

Y cof

Rhyngof a sgrîn y cofio - fe welaf
ei olau'n edwino;
pelydrau'r ffilmiau ar ffo
yn rhy eiddil i dreiddio.

Telyneg: Bwrdd

Bwrdd adar

Mi fûm yn hulio'n gyson
ddanteithion arno fo,
cnau i'r hen ditw tomos
a chrwst i'r 'deryn to;
holl deulu'r berth oedd yno'n
ciniawa yn gytûn,
a meddwl wnes weld diolch
yn llygad ambell un.

Mae'n amser cinio hefyd
ar arall yn y wig,
a'i bantri yn gorlifo
o'm dewis hael o gig;
wrth estyn yno'n sydyn
i'r seigiau gyda blas,
mi wn im weled diolch
yn llygad y gwalch glas.