Cynigion ychwanegol:

Cwpled caeth yn cynnwys y gair 'calon':

Os rhinweddol yw golud
Calon lân, fe gân i gyd.

Pennill Mawl/Dychan: Camera Cylch Cyfyng:

Fe welai hwn yn eglur
Bob lleidr yn y lle.
Yr unig un na welodd
Yw'r un a aeth ag e
O gornel stryd un noson,
Sy'n profi ei bod hi'n haws
Tynnu allan lygad
Brawd Mawr na thynnu'r trawst.

Englyn yn cynnwys y llinell: 'Rhyw ladd yn rhywle o hyd'

Lle afiach bellach yw'r byd, - stori drist
Rhyw drais yw ein bywyd,
Eithafiaeth byth a hefyd,
Rhyw ladd yn rhywle o hyd.

Difa'r rhai gwanna' i gyd - fu crefydd
Y cryf ers y cynfyd,
Mae trwy'r glob, lle bo bywyd,
Rhyw ladd yn rhywle o hyd.

Cân (heb fod dros 20 llinell) : Breyddwyd (io)

'Wy'n amal yn breuddwydio am gael pwere Duw
I wneud fy myd yn ddifyr, - a gwella'n ffordd o fyw,
Cael llyged X ray miniog, rhai jest fel Siwperman,
I weld drwy flows y fenyw sy'n byw drws nesa lan,
Cael bod yn anweledig, mynd mewn i'r Steddfod am ddim,
Barddoni gystel â bois Parcnest, a chael mwy o gorone na Jim,
Taenu mantell dros y Teifi fel nad oes na Gardi mên,
Creu ffatri creu asgellwyr a phob un yn edrych fel Shane,
Uno ein timau rhanbarthol fel nad oes na Dwrcyn na Jac,
Cael menyw lot pertach na Rhiannon y wraig, o jawl ma hi'n ishte'n y bac,
Rhwng Gwalia fach a Lloegr- creu ffos i lawr y ffin
A hwylio ein gwlad i'r Bahamas gan ganu GOD save the cwîn,
Ond mae'r freuddwyd agosa i 'nghalon yn dibynnu yn fawr arno FO,
Sef bod Crannog yn cael mynd i'r ffeinal a chael deg gyda'r Meuryn bob tro.
Ond na! ma' hynny yn farus - gofyn am farcie llawn,
Mae'n siwr base naw a hanner yn siwtio Crannog yn iawn,
Ag yffach! wrth feddwl am funud - sdim ots os gawn NI one point t?,
Yr unig beth sy'n bwysig yn awr yw bo NI yn ca'l lot fwy na NHW.

Limrig yn ymwneud â salwch:

'Wy'n sâl yn ysbyty Nantgarw
Yn teimlo yn wan ac yn arw,
Mae'n llygaid ar gau,
Mae 'nghorff fel y clai,
O sorry, 'wy jest wedi marw.

Un sâl am lefafu odd Mafi,
Odd hi'n byw gyda'i bfawd yn y Bafi,
Odd e ddim lot gwell
'Da pob 's' yn troi'n 'll'
A'i enw odd Llam Llimllon Pafi.

D - d - diodde ma Sh - Sh - Sh - Sian,
Ma hi'n ff - ff - ff - ffaelu yn lân
A g - g - gweud dim
Heb swn'o fel hyn,
Ond mae'n iawn pan yn morio mewn cân.

Anghywir yw rhoi yr ac-EN
Ar ddiwedd gair yn lle'r go-BEN,
Sal-WCH yw'r cwb-WL
A 'na chi'r trwb-WL
Wy'n neud e fy hun now and AGen.

Roedd teulu o ardal Treboeth
Yn cynnal eu barbeciw'n noeth,
Ond ffeindiodd merch flewog
Bod ffreio heb ffedog
Rhy agos i'r tân ddim yn ddoeth.

Englyn Cywaith: Clo

Heddiw mae'r hir gaethiwed - wedi llwyr
Dw'llu llwybr ymwared
Fel pan fydd yn rhydd ni rêd
I gyrraedd drws agored.

Er y glaw ar y gleien - a gwywo
O'r Gaeaf bob deilen
Eilwaith fe ddaw yr heulwen
Ar wely oer lili wen.

Telyneg : Llythyr

Y tresi heb eu cribo
A'r brat tu-fewn-tu- fa's
Y llenni heb eu tynnu
A'r sbectol yn ei chas.

Ac amlen drudwy'r pryder
Yn llwch y silff ben tân
Yn disgwyl llygad cliriach
I'w hagor 'nes ymla'n'.

Telyneg : Llythyr

Sgrifennai ef yn gyson
A rhannu, un wrth un,
Pob clec a chlonc y pentre
A'i stori ef ei hun.

Yn awr, er yr hwylustod,
Edliw mae'r sgrîn bob tro
Bod cyfeiriadau'i rwydwaith
Yn hwy na'i neges o.