Cynigion ychwanegol:

Cwpled caeth yn cynwnys enw sant

Ar ei lwybr, a'r haul o'i ôl,
ynys oer yw un Seiriol.

Mae Cybi a'i weddïau
yn nhir yr haul yn parhau.

Nid yw clwyfau d'amau di'n
rhy euog i Gwenffrewi.

Gwranda ar d'eirfa'n darfod -
rwyt heddiw yn Rhedyw Road.

Yn hoelion a nefolair
ei gweddi mud, gwyddai Mair.

Heb enaid, fyddai Beuno
yn ddim ond ei weddi o.

O hyd, fe all credadun
wadu'r iawn fel Pedr ei hun.

(St Michael - hen label dillad Marks & Spencer, cyn symud ffatrïoedd y cwmni i'r Dwyrain Pell)

Addo siwt o ddefnydd sêl
wna hanger Sant Mihangel.

(ffrae tros arwyddion Saesneg-yn-unig yn ffreutur newydd Eglwys Gadeiriol Tyddewi)

Ni ddaw o faeth Tyddewi
lais i dorf dy eglwys di.

Yno ymysg y cerrig mân,
gafael mae cragen Gofan.

Ti a wêl ddylanwad da'r
Iesu'n y Fam Teresa.

(eglwys wedi ei symud o Bontarddulais i Sain Ffagan)

Eilwaith daw gweddi Teilo
a'i lais rhwng ei waliau o.

Aeth Ffrancis o Assisi
rownd a rownd Ynys Caprî.

Limrig yn cynnwys y llinell "Pan oeddwn ar ganol fy swper"

Pan oeddwn ar ganol fy swper
daeth cnoc ar y drws (gyda'r knocker)
a honno mor uchel
rwy'n si?r bod y lefel
yn bedwar neu bump ar y Richter.

Pan oeddwn ar ganol fy swper
pwy alwodd 'da fi ond y ficer,
a honno mor bert
mewn blowsen a sgert,
a finne heb wisgo fy nhrowser.

Pan oeddwn ar ganol fy swper
fe wylltiodd Jack Russell, y terier,
pan welodd e'r gath
yn yfed ei la'th
a dim byd ar ôl yn y soser.

Dydd Llun wythnos dwytha roedd prinder
o fwyd i'r hen gath ac, mewn tymer,
fe ddaliodd y bwji
a'i fwyta o 'mlaen i
pan oeddwn ar ganol fy swper.

Pan oeddwn ar ganol fy swper
breuddwydiais am chips a biff byrger,
y wraig aeth yn vegan
ac nid dyna'r cyfan -
fe grafodd y crîm o'r crîm cracer.

Pan oeddwn ar ganol fy swper
o chips a ffa pob a biff byrger,
rhaid fu rhedeg ar frys
yn domen o chwys
'rol canfod pen bys yn y braster.

Englyn yn cynnwys y geiriau "er hynny"

Wyt Gymru'r saint a'r breintiau, - er hynny,
gwnest dy ran trwy'r oesau
yn celu'r gwir, coelio'r gau
a gwadu'r diwygiadau.

Cofeb i löwyr Cwm Gwendraeth ym Mhontyberem

"a thra bo'r talcen glo o dan ein tra'dbydd sgrech hwteri'n gryndod yn ein gwa'd" - Arwel John

Un frawddeg ydyw'r neges - ar garreg
a'i geiriau mor gynnes;
er hynny, fe ddaw'r hanes
a'i haenau oer yno'n nes.

Cân(heb fod dros 20 llinell): Buddugoliaeth

Cafodd ewythr i mi wybod ym mis Rhagfyr 1950 ei fod wedi ennill cadair Eisteddfod Aberporth. Oherwydd eira mawr gohiriwyd yr eisteddfod. Yn y cyfamser, bu farw fy ewythr. Dewi Emrys oedd yn beirniadu a dywedodd ef y byddai lliain gwyn - arwydd o fuddugoliaeth ar angau a'r bedd - yn gweddu'n well i gadair y bardd na'r cwrlid du.

Daeth mantell wen yr eira gyda'r wawr
i daflu düwch Rhagfyr hyd y glyn,
roedd geiriau yn gonffeti ar y llawr
a'r bardd yn gwybod bod ei fyd yn wyn.

Ond cwmwl tywyll ddaeth i hofran fry
ac yntau'n colli tir i rym yr haint,
hyd nes gorchfygwyd ef gan angau du
a'i ddwyn ym mlodau'i ddyddiau i blith y saint.

Roedd Dewi Emrys yno'n drist ei wedd,
y bobol yn eu dagrau o bob tu
a'r bardd ym Mrynmoriah yn ei fedd;
roedd eira gwyn, ac yno gadair ddu.

"Rhowch gwrlid gwyn o obaith dros ei stôl,
a deil y gerdd i ganu ar ei ôl."

Pennill dychan - Gwybodusion

"Cymru fydd yn ennill, bois, y ni fydd ar y blaen!"
Y geiriau'n dod o'r galon a'u dweud yn ddigon plaen.
Â'r stiwdio nawr yn dawel, yn dilyn dathlu'r pnawn,
rwy'n si?r bod Grav yn gwybod am ennill y Gamp Lawn.

Nhw oedd y pendifigion gynt,
yn ddawnus hollwybodol,
rhyfeddod oedd fod cymaint dysg
o fewn i fodau dynol.
Fe dorrodd gwawr a darfu ddoe,
fi heddiw sy'n rhagori,
mae pob cyfrinach dan fy mawd -
daeth Google i'w disodli.

Cymysgant y genetau
er lles parhad yr hil
a pheidiwn byth ag amau
na gofyn cwestiynau fil;
y nhw yw'r rhai sy'n gwybod,
y nhw ?yr beth sy'n iawn,
felly ni fydd hi'n syndod
gweld centaur un prynhawn.

Englyn Cywaith - Cadwraeth

bag siopa aml-ddefnydd gan hen wraig

Yn dynn mae'n cydio o hyd - a'i bysedd
dan bwysau ei bywyd
a'i hangen hi bob ennyd:
cario'r bag a charco'r byd.

llestr teuluol

Hen ddarn a'i staeniau arno, - un di-liw
a di-lewyrch drwyddo;
ond yr un ddaw yn ei dro
yn biwter i fab eto.

Telyneg

Llaw

Wyres newydd

A gaf i gyfri, dyma Bibowtyn,
a phwy sydd wedyn - yr hen Dwm Swclyn,
ac yn y canol fe ddaw Rhys Harries
a drws nesa' iddo fo, John Dafis;
mae un ar ôl, Wil bach ydi hwnnw
os edrychi arni, mae pawb ag enw.

Mae eraill hefyd os ei i holi -
cei Feni Feni a Chefnder iddi;
daw Wili Daboth ac Ifan Grogws
a'r bys bach eto, mae pawb yn gwmws.
Gafaela yn dynn, mae teganau drud
yn cadw cwmni i ti yn dy grud.

Fe fyddant yn fodlon ar hyd y daith,
y ffrindiau bach sydd yn cynnal iaith;
tyrd â nhw at ei gilydd i ffurfio llaw
gan ei chynnig hi i bwy bynnag ddaw.
Bibowtyn, Twm Swclyn a'r lleill i gyd,
o ddod at ei gilydd, gallwch newid y byd.