Cynigion ychwanegol:

Fe dyrr pladur ddoluriau
Weiryn hen a'r gweiryn iau.

Mae'r bladur segur heb si
Yn hel medel i'r medi.

Rhin y dur yn ei waed oedd
A rhwd ei bladur ydoedd.

I'r pit â'r aflan a'r pur
A gwib y blydi bladur

Pennill Mawl/Dychan: "Cyfraith Gwlad"

Mae un bobi yn rhodio 'n
Well na phedwar mewn Volvo.

Dwylo gynt y glust fu'n curo
Ar gompiwter nawr yn teipo.

Meddygyniaeth ienctid ffôl
Hen fobi gynt a'i gic penôl.

Cyfiawnder ddaw o ddellni
A'i chosb yng nghic ei throed,
Ei natur mor anystwyth,
Ystyfnig fel erioed.
Afrosgo ac aflafar
A bastwn gaiff bob oed,
A'r marc ar gefn - medd
Rowan Fydd Shira gyda'r Groes.
Ei bwyd yw gwair tystiolaeth
O'i gnoi, yw'r gwir a ddaw
Drwy'r erlyn ac amddiffyn
I'r dafol sydd mewn llaw.
Dal pwysau ein camweddau
Ei bach, a ddeil yn gref.
Hen asyn ydyw'r gyfraith ¬
A Saesneg ydyw'r fref.

The law is an ass

Mi af ar gefn yr asyn tra byddo'n rhodio'n braf,
Ond pan fydd o'n gwallgofi, dod ymaith wedyn wnaf;
Ac os i'm brawd mawr weled fi'n rhoddi cic i'w dîn,
Caf orig fach i orffwys yn stablau llawn y cwîn.
Fan honno mi gaf addysg gan rai fu mewn ers tro,
A phan y troir fi allan, mi fyddaf yn ass-sbo.

Englyn yn cynnwys dau anifail

O! fran hardd, 'rwyt wefr o naws - hudolus,
a'r delaf o'r lliaws,
rhanna gainc heb ddam o gaws
llawn cân â llwynog hynaws.

Puteiniaid a laddwyd gan Steve Wright yn Ipswich

Unwaith y crwydra'r oenig - i feysydd
Anfoesol, colledig,
Fe ddaw'r cadno rhyw orig
Mwy i'r "gêm" a rhwygo'i gig.

Limrig yn cychwyn â'r llinell: "Fe welais ryfeddod yn Hermon"

Fe welais ryfeddod yn Hermon.
Fe welais un arall yn Seion:
Ar y cwrw mae'r bai,
Ac ar ôl peint neu ddau
Rwy'n gweld rhyfeddodau yn gyson.

Fe welais ryfeddod yn Hermon:
Y Meuryn yn hael mewn ymryson,
Y n rhoi deg mas o ddeg
Am bob tasg, chware teg -¬
Mae rhyddid i ddyn ei freuddwydion.

Mi welais ryfeddod yn Hermon
Doedd y bwyd ddim cweit lan i'r safon;
War y llynedd llond sach
O bics melyn bach
A sangwejis crimp a smel samon.

Mi welais ryfeddod yn Hermon
Noethlymynwyr erlydwyd un noson.
Diflannant i'r nos,
Ar ôl: ond dau ddros
A dau goler rownd a gardyson.

Cywydd (heb fod dros 12 llinell): "Ffarwelio"

Ffarwelio mewn hosbis

Gair o wae ac iaith y gro
A hawlir gan 'ffarwelio'.
Mae gennym iaith amgenach,
Cawn nesáu trwy bethau bach .¬
Golchi, bwydo, trafod rhydd
A gwylio dros ein gilydd.
Yn nes o hyd trwy'n mân sôn,
Awn i hwyl, mynnwn hawlio'n
Geirfa olaf: 'gorfoledd',
Nid 'gro' a 'huno mewn hedd' ,
'Dere 'daf, nid 'oriau du'
Ac 'uno', nid 'gwahanu'

(morwr ieuanc)

Yn y dwfn dan grych y don
Roedd heidiau o freuddwydion,
A'r heulwen dry'r hualau
Y n fodd i hwyl ufuddhau.

Fel enaid yr aflonydd
Ar y don mae'r galon gudd,
Yno flas solas ei sêl
A chawg aur cylch y gorwel.

Hwylio o hafan aelwyd
1 ferw y llanw llwyd,
A'i ddoeau rhydd ar ei ôl
Yn eiddo'r lli tragwyddol.

Englyn Cywaith: "Llythyr"

Llythyr oddi wrth y Weinyddiaeth

Nid cymen yw amlennu -- mwd ei draed,
Lliw ei waed a'r lludu;
Gyrrwyd arch ei geiriau du
Yn dila'n ôl i'w deulu.

Fel ymbilgar garcharor - amneidiais
Am nodyn wrth ddoctor;
Yna ei ddal ger y ddôr
Yn rhegi ofn yr agor.

Telyneg: "Bwlch"

Mae'r hen hen iet yn gwegian
A'r postyn heb 'r un nerth,
Ond daeth dyn draw â'i bethau
I lenwi bwlch y berth.

Mae'i iet o bîn yn newydd
Caiff farnis yn y man
Ond gwelaf fod 'r uniadau
Yn llac dan ryw lud gwan.

Nid yw ei bostyn beiddgar
Yn ddwfwn yn y tir,
A serch ei olwg gadam
Mi wn na saif yn hir.

Bu'r gaeaf heb dosturi
A'r blewyn glas yn brin,
A chur oedd gweld diadell
Mewn cystudd ar y bryn,
Yn disgwyl am ryw fanna drud
A'u hwyneb at y bwlch i gyd.

Ond heibio ddaeth y gwcw
A'i hawel fwyn i'r fro,
I agor drws y rhewgell
A'i hallwedd yn y clo,
A'r rhai fu'n ddof drwy'r tymor llwyd
Yn troi eu cefnau ar y glwyd.