Cynigion ychwanegol

Cwpled caeth yn enwi pentref yng Ngwynedd

Aeth afon ein hiaith hefyd
Yn oer a hesb gerllaw Rhyd.

Lôn Traws a'r haul yn trosi'r
Rhos yn aur. Ar ras o'n i.

Yn addas iawn, un Hedd sydd,
Ei enw yw Trawsfynydd.

Ei stori hi ddaeth i'n rhan
O adfyd bro Rhosgadfan.

Tywyn sy'n dal yng Ngwynedd
Ond Deio, fo sy'n ei fedd.

Lle afiach ydy Rachub,
Yn y glaw mae'n lle go wlyb.

Gwawr o liw ac awyr las
Yw'r heulwen draw yn Rhiwlas.

Pennill Ymson: Prawf gyrru

O damia! Dwi'n sownd wrth din Mansel.
Gallwn regi, ond beth fyddai'r iws,
â methiant yr ugain tro olaf
yn hunllef sy'n llwyd ac yn biws.

(yng nghwmni arholwraig)

O! beth pe bawn yn cowlio pan ddwêd y ferch 'Turn right'
A throi i'r chwith a landio yn llidiart nymbar eight.
Oherwydd rhaid cydnabod bod ynof wendid mawr -
Yr wyf yn camddehongli cynghorion lu bob awr.
A phan fydd hi yn mynnu fy mod yn codi gêr
Rhaid bod yn bur ofalus, gall pethau fynd yn flêr!

Cywydd (heb fod dros 12 llinell): Peiriant

Parry-Thomas a Babs

Ar draeth coffadwriaethau
Mae ddoe yn cofio am ddau,
Yr olwyn a'r athrylith
Ar ras mor gyflym â rhith.

Peiriant, a pheiriant ei ffydd,
A dyn yn hel adenydd,
Y gyrrwr am y gorau,
Awr y bri heb ofni'r brau.
Ond un glec yw ei record,
Torri cýt yn torri cord.
A'u her i ni? Ceisio'r nod,
Y diwedd nad yw'n dywod.

Y 'Singer Vogue' (peiriant gwnïo fy mam)

Ag ing rwy'n cofio'r Singer -
un hawdd, yn barod am her.
Difai wrth ddirwyn 'dafedd,
un gwiw oedd, ein ceffyl gwedd.
O bell, clywn ei gnocella
yn daer, yn chwim - y gwas da
a dof. Teiliwr atgofion
ein byw oedd hwn yn y bôn.
Yr oedd, yng nghanol yr hwyl,
Llaw un, â'i llywio annwyl.

Cân (heb fod dros 20 llinell): Cynddaredd ffordd

Ro'n i'n wyllt, yn lloerig - sôn am siwrne'; diolch fyth,
yn wir, am gwmni'r hogie'.
Stiwdents y byd 'di troi allan am wers,
Pob car dwy litr yn llusgo fel hers -
a wedyn, y diawled, yn mynd ati i spîdo
ar bob darn syth lle roedd hi'n bosib pasio!

Ceir yn fy fflachio wrth basio Bae Colwyn
a finne, ar bum deg, yn dilyn gorchymyn!

'Escorts' coch orlawn â'u hegsôsts yn rhechu,
Cyrraedd tre' Dinbych ar afon o slyri.

Roedd un â dawn i dorri rheolau - yn gyson - wrth
gyrraedd y goleuadau.

Rhois gorn, daeth allan, a sefyll yn y bwlch
rhwng bonet a b?t, a rhoi clamp o guwch.

Fe ddaeth at sil y ffenest a chodi'i ffon yn hy,
A throi ei phen yn swta ac edrych arna'i'n ddu.
Hen wreigan digon haerllug, a throdd y cyfan yn gas
Pan rwygodd fy nwy weipar a chrafu'r paent drud glas.

Ond pan fydd f'enaid yn terfysgu, a phethau'n mynd yn drech,
Dwi'n gwybod y caf i gysur wrth droi at drac un deg chwech.

A daw chwa o ganu tawel, i'm suo i o bell.
Hen gr?ners Llanbêr tangnefeddus, yn gwneud i mi deimlo'n well.Elinor Gwynn

Limrig: 'Un noson wrth ymyl Bethesda'

Un noson wrth ymyl Bethesda
Symudwyd siop Spar i Awstralia
Am fod pob potel sôs
Ar bob silff, ddydd a nos,
Yn sefyll â'i phen ucha'n isa'.

Un noson wrth ymyl Bethesda
Gwelais ddyn yn cuddio ei ffrwytha'
Yn graff, â'i benelin,
Fe gelodd ei eirin
Ac â gwên ymguddiodd fanana.

Pennill Mawl/Dychan: Y Tîm arall

Dyma gynnyrch tir Bro Alaw
O'r ardd decaf ger y llyn,
Richard, Geraint ac Arwyn,
Sian, Iwan a John Wyn,
Yn rhesaid o blanhigion
Edmygais hwy yn syn,
Un blodyn telynegol o ddel
A'r lleill yn debyg i chwyn.

Telyneg: Prinder

Mae'r llygaid rhwth yn cymell
Rhyw wyrth o fol y sgrîn,
Ei ddwylo yn ymestyn
A blaenau'i fysedd crin
Yn daer am deimlo'r briwsion mân
Yn mwytho'i groen fel cawod lân.

O flaen ei gyfrifiadur
Mae'n pwyo'r wyddor flin,
Yn blentyn oes Fyd Eang
A'i Gwe heb ffrâm na ffin;
Â'i gol yn llawn o geriach drud
Mae'n dal i grefu mwy o hyd.