Cynigion ychwanegol:

Cwpled caeth yn cynnwys enw bardd

Gwn, mi garwn weld Gerallt
Yn y bath yn cribo'i wallt.

Hen ddynion sy'n barddoni --
Dic Blaenporth yw'n Wordsworth ni.

Mae hiwmor Tydfor o'n tu,
Yn wenau drwy'r gwahanu.

Daw, fe ddaw, deg Dafydd Wyn
O hen wreiddiau ei briddyn.

Rhoed anobaith ac iaith in,
Yn her, trwy gân Aneirin.

Pennill Ymson ar y lleuad

Efallai bod diffygion
Yn rhywle yn fy mhen,
Ond rwy'n siwr fod yr arwyddion
Yn dwedyd "Gas Mark 10".

(Wrth edrych ar y lleuad)

O'th wylio, rhy hawdd yw dy feio
Am roi gwedd anwadal i mi,
Heb gofio 'mod innau mewn cylchdro,
Ac Un digyfnewid wyt ti.

Rwyf yma ar y lleuad,
Bron sythu ac yn oer;
Gwaeth byth, nid oes 'na doiled
Fan yma ar y lloer.

A gwaeth na dim rhaid troedio
Yn boenus efo'n ffon
Pan ddaw yr alwad natur
I'r hanner dywyll hon.

Rwy'n darllen 'Y Goleuad'
A'r 'Sun' yn 'Dyst' o'r lleuad,
 'Seren Gomer' llawn o hwyl,
Rwy'n disgwyl cael diwygiad.

Cywydd (heb fod dros 12 llinell: Dirgelwch'

Dirgelwch Serch yn Aeddfedu

Buom yn un, yn uniad,
A bu hawdd hynt i'n boddhad,
Fel lindysen yn chwennych
Dim ond ffyrdd yr un gwyrdd gwych.

O gael serch i'n glas archwaeth,
Yn gêl, yn ddirgel, fe ddaeth
Lindysen yn adenydd,
Heb awch inni geisio budd
Y gorffennol yn ôl - nid
Wedi i ni drawsnewid
O'r unlliw i holl liwiau'r
Cymhlethdod o ddod yn ddau.

Englyn Cywaith: 'Cymydog'

Yn gytûn cawn cyd-dynnu, - llawenhau'n
Llawn hwyl, ond er hynny
Ef yw'r sawl fel arfer sy'
Hwyrach yn cydalaru.

Cymydog y gwely nesaf mewn ysbyty

Caf, o rannu cyfrinach - ein dwy wâl,
Mai dolen yw'n grwgnach;
Ac nid gwell gennyf bellach
Wrando hwyl hen ffrindiau iach.

Drwy y muriau daw'r morio - o ganu
I ganol fy huno;
Am rannu'r malu mae o
Yn garedig â'i radio.

Caf dy bwys i droi'r cwysi - wyt gymaint
O gymorth mewn cyni,
Ac yr wyt pan ddelo'r gri
Yn gymydog y medi.

Limrig yn ymwneud â 'Bwyta'

I'm gên aeth ein llên gydol llynedd.
Âi'r englyn yn dynn yn y dannedd.
Ac 'Englyn ac Englyna',
Ie, heb atal y bwyta,
Nes cam-drin fy nhin â chynghanedd.

Gofynnais am saws gyda sawr
I helpu y bwyd i fynd lawr.
A hoffech HP?
'Na, Na', d'wedais i --
'Fe dalaf amdano yn awr'.

Mae 'ngheiliog i'n od ers blynydde,
Yn clochdar a dodwy mewn nythe.
'Pam na alwest ti 'nghynt ?
Cei ei fwyta am bunt.'
'Wel, wel, roedd angen y wye!'

Pennill Mawl / Dychan: 'Y Gwasanaeth Iechyd'

Rwy'n swyddog achwyniadau
Er cadw rhegi draw,
Ond gwên, heb blismon arfog
Na chyffur yn fy llaw.
Mae grwgnach a bytheino
Yn ffobia iechyd mawr,
A threisio ac ymosod
Yw'r norm mewn 'sbyty nawr.
Mae'n faes y gad nos Sadwrn
A phoen im bron yw mwy,
A'r nyrsys a'r meddygon
Yn cario craith a chlwy'.

Yn ôl yr adroddiad, a hwnnw'n un llawn,
Mae'r 'sbyty yn holliach a phopeth yn iawn.
Trwy drin y 'stadegau, daeth gwella yn gloi,
Trosglwyddwyd adnoddau, ar ras diymdroi;
Archwiliwyd cyfrifon a'u cafwyd yn iach,
'Sdim feirws compiwter (a'r nam yn un bach).
Yn ôl y ffurflenni, mae gwyrth wedi'i gwneud
(Mae rhaid bod hi'n wir, gan fod pawb yn ei dweud):
Mae gofal gwaith papur mor gyflawn a braf -
'Sdim ots bod dim amser i sieco y claf.

Telyneg : 'Clo'

Rhoed clo ar ddrws hen wreigen
Gan ryw ymyrrwr craff,
A ddwedai fod ei angen
Er mwyn cael 'teimlo'n saff '.

Pan 'nawr, wna hyder gnocio,
Ni chaiff ddod 'mewn i'r ty,
Ond pan gerdd ofon heibio,
Try i mewn yn ddigon hy.

Mae Salem fel tan warchae
A'r iorwg arno'n drwch;
Yr ysgol heb blant crynion
A'r neuadd goffa'n llwch,
A heidiau brith o gogau ha'
Yn nythu trwy'r gymdogaeth dda.

Anheddau paent a cholur
Arwerthwyr biau'r clo,
Ond heb allweddau ieithoedd
I draddodiadau'r fro.
A bachau'r iaith er menter daer
Yn rhydu'n gorn ar ddrysau'r gaer.