Cynigion ychwanegol:

Cwpled caeth yn cynnwys pentref yng Ngheredigion:

Cawn awel y Cei Newydd
Draw o'r môr i dwymo'r dydd.

Holl liwiau y gorllewin
Gawn fin nos yn Ffos-y-ffin.

Yno, trwy fôr fy einioes,
Yno'n graig mae Tan-y-groes.

Y pysgod fu'n dod bob dydd
Fu cynhaeaf Cei Newydd.

Hen lais ddaw o Daliesin
O'r pair hud i'r efrau prin.

Limrig yn ymwneud â hedfan:

Roedd elfen barcuto yn Ann,
A phrynodd handglider fach wan -
Ac yna wrth hedfan
Deallodd yn fuan
Bod hi'n haws i ddod lawr na mynd lan.

'Rôl Guinness mae 'mola i'n llawn -
Sefyllfa beryglus nawr gawn :
Mae 'ngherbyd tu fas,
Ond hefyd mae'r glas -
'Dwy adain colomen pe cawn.'

Aeth mewn roced i Ajerbaijan,
A rownd y byd mewn catamaran;
Ac yna nos Sadwrn
Wrth rasio i'r Talwrn,
Ca'dd gwdyn ar sgwâr Penrhiwllan.

Stori wir

Mae Arwel ymhell dros ei fifty,
Ac eto yn fachan go heini;
Ond nid rhy urddasol
Oedd syrthio o'r ysgol
Na'r corset i'w ddal at ei gily'.

Englyn yn cynnwys y geiriau: 'nid oes ...'

Ionawr

Mis yw â'r dryw wrth y drws - nid oes hwyl,
A daw salwch feirws;
Ond deil ei wedd wyrthiau tlws
A dau wyneb duw Ionws.

Mae mam ym mro'r tsunami - yn llefain
Drwy'r llif am ei babi;
Er y waedd, er y weddi,
Nid oes neb i'w hateb hi.

Un taliad o'r troadau - ydyw i
Ond nid oes ei heisiau:
Taliad sy'n eiliad yn iau
Yw hon o'n dyled ninnau.

Pennill ymson mewn gêm:

Mor braf yw gwylio'r Sgarlets
Yn curo'r gwyr mewn glas,
A gwledd yw gweld asgellwr
Ar wib â'i gamau bras -
Ond hoffwn drefnu i hwn gwrdd
Â'r diawl fu'n taflu'r bêl i ffwrdd.

Gwaith refferî sydd yn galed -
"Please clean the ball", medde Ding,
A'r teclyn bach hanner lleuad
Ar goll mae y blydi thing.

Ond dyw'r Cardi byth yn ffaelu
Beth bynnag a ddoed a ddêl.
Set waelod fy nannedd dodi
Gosodaf nhw nawr rownd y bêl

Pe croesai y lleian o 'mlaen i
A'r ddarten yn taro ei phen hi;
A phe bawn yn ddi-stop
Yn cael dwy double top,
Fe sgoriwn 'one nun dead and eighty'.

Englyn cywaith: Addurn

Er rhodres, tair yw'r oedran - i dyllu'r
Glust a wella'n fuan -
Anghofir sgrech y fechan
Yn ei rhwysg, chwaraeai'i rhan.

Ym mar y ddawns mae mor ddel - â phobun
A phobia i'w harddel -
Ond pan ddaw'n ddydd fe fydd fel
Ysborion y bin sbwriel.

Rhiniol wawn o'i oeri'n wlych - wna donnau
O sidanwe gorwych;
O'i wead chwiliaf lewych
Drwy fêl yr haul - drifl yr ych.

Telyneg: Rhent

A'i binnau, têp a'r lasys
Begerai'r rhesi llwm,
Â'i ddyrnau glas yn gafael
Dimeiau prin y cwm.

O weld y weddw'n ddagrau
I gadw'r beiliff draw,
Ei gardod drodd yn ennaint
Wrth iro cledr ei llaw.

Mi alwai'r porthmyn heibio
I brynu'r da a'r wyn,
A 'nhad yn gorfod gwerthu
O hyd yn fawr ei gwyn;
Ac yna, mynd â meddwl clir
I dalu'r rhent i'r meistr tir.

Ond mae 'na daliad arall
A hwnnw ddim yn rhad,
Sef treth o egwyddorion
I warchod ein cefn gwlad -
A gadael, wedi dydd ein bod,
Y wlad yn well i'r sawl sy'n dod.