Cwps v Ffair Rhos
Dyma gynigion y timau yng ngornest Talgarreg
Cwps
Ffair Rhos
Cwpled caeth ar yr odl "ws"
Hin arw ddaw â chorws
O adar hy' at y drws.
Iwan Bryn James
8 1/2 Pwynt
Cwpled caeth ar yr odl "ws"
I'r un sy'n sgubo'r storws
Cas a braf yw coes y brws.
8 Pwynt
Pennill Ymson wrth dalu bil
I hen gymydog ...
Mi dalaf, mi dalaf y cwbwl
Heb eiliad, run eiliad o drwbwl.
Ar ôl i chi brisio yr eiddo
Mi ddyblaf yr hyn maen nhw ishio
Am garped lime-green ac am soffa
Am fi-dê a bath mewn magenta ...
Fydd gwerth yr holl dai yn yr ardal
Yn dyblu o'u gweld nhw yn gadal.
Mi dalaf, mi dalaf a phleser
I symud 'r hen Lyn Ebeneser!
Arwel Jones
8 Pwynt
Pennill Ymson wrth dalu bil
Drwy'r post daeth y bil cerdyn Visa
Ynghyd ag atgofion di-ri
Cyffro cariadon wrth gerdded y stryd
Ond nawr talu'r pris yr wyf i.
Esgidiau o Gucci a bag o Chanel
A ffrog fach o Prada ges i
Dwy botel o Chablis i swper fin nos
A meddwi ar dy gwmni di.
Ond wedi'r penwythnos rhamantus
Ym mhrif ddinas serch - gay Paris
Yn ol yr es i at y bil ar y mat
Ac yn ol at dy wraig yr es ti
8 1/2 Pwynt
Penill telyn yn dechrau a'r geiriau "Nid yw..."
Nid yw breuddwyd byth yn freuddwyd
O gael deffro ynddi hi,
Troi gwirionedd byw yn freuddwyd
Yw cael deffro gyda thi.
Arwel Jones
9 Pwynt
Penill telyn yn dechrau a'r geiriau "Nid yw..."
Nid yw gweld y wennol gynta'
Yn sicrwydd bod y Gwanwyn yma
Mwy na chesair yn diflannu
Pan fod gwên yr haul yn t'wynnu
8 1/2 Pwynt
Cywydd (Heb fod dros 12 llinell): Tref
Y mae'r bysgar a'i gariad
ar lawr oer, a'u halaw rad
yn dwyn y sêr dan eu siôl
yn geiniogau unigol;
tra bo'r siopwyr hwyr ar ras
herciog rhwng pob un pwrcas.
Mae'r caffis mwmial isel
yn saib o hyd, am ryw sbel,
a daw y llu rhag byd llaith
gwylanod y glaw uniaith
i fochel rhag yr helynt,
yn oer i gyd wedi'r gwynt.
Dafydd John Pritchard
9 Pwynt
Cywydd (Heb fod dros 12 llinell): Tref
Deil y don i lifo'n las
I'r lan o dan Pen Dinas,
A deil hud y machludiad
Ym min hwyr ar y Promenad.
A chwa o Erin yn chwarae
A llenwi baneri'r Bae.
Ceir Llyfrgell a Chastell chwal
Hefyd, a Choleg dihafal.
Hyn a gwylaidd drigolion
Sawra bunt, Cardis I'r bon.
Tra bo Aber bydd gwerin
Dirf, a'u hiaith yn hallt ar fin.
8 Pwynt
Limrig yn ymwneud a meddwi
Mae ambell i bâr yn y byd 'ma
Nad ydyn nhw'n wir mo'r prydfertha
'Mae cariad yn ddall,'
Meddai'r naill wrth y llall
Trwy botel fach arall o fodca.
Arwel Jones
8 Pwynt
Limrig yn ymwneud a meddwi
"Diawch mae coesau gan lemons ffordd hyn"
Meddai meddwyn wrth farman reit syn.
Meddai hwnnw, gan dasgu,
"Y diawl, ti di gwasgu'r
Caneri I mewn I dy jin"!
9 Pwynt
Englyn cywaith: Gwydr
Winciai, mor glir â'r wirod, - a llyncais
Ag awch llanc o'i geudod
Yn chwil fawr, a chael ei fod
Yn gelwydd hyd y gwaelod.
Huw Meirion Edwards
9 Pwynt
Englyn cywaith: Gwydr
Yn wargam wedi'i fframio - yn ei phoen
Yn ffenest y patio,
Ac araf araf glirio
Er y cur, mae paenau'r co'.
9 Pwynt
Can (hen fod dros 20 llinell): Siopa
(Ar ôl clywed cymaint o sôn fod Cymru ar werth penderfynais fynd allan i'w phrynu).
Af i chwilio amdani i'w phrynu yn ôl,
Mae ar werth yn rhywle mi fentraf,
Yn Lidl, neu Argos, B-Wise, neu Spar,
Yn y Co-op neu Peacocks fe'i ceisiaf.
Neu 'falle siop lyfre fel W.H.Smith,
Ydy'n bosib ei bod mewn lle felly?
Ond 'sdim sôn am Gymru mewn unrhyw siop fawr,
Na pharch i'r Gymraeg o ran hynny.
Mewn siop lyfrau ail-law, yn y llanast a'r llwch,
A'i yno 'mysg hen drugaredde,
Y ffeindia i 'ngwlad? A'i yng nghanol y cawl,
Sydd yn nodwedd o'r siopau Hen Bethe?
Naw wfft i'r holl siopa. Fe flinais yn lân,
Ar chwilio am le mor ddigalon;
Rhyw le dan ei sang gan ormodedd o feirdd,
Gwleidyddion ail-law a chantorion.
Gwlad a wrthododd yn lân dyfu lan,
Gwlad sy'n ei chlytiau yn strancio...
Diawch...Fe af draw i siop Mothercare
Rwyn siwr o'i darganfod hi fan 'no.
Dafydd Morgan Lewis
9 Pwynt
Can (hen fod dros 20 llinell): Siopa
Does dim a all blesio menyw yn fwy
Na siopa ynghanol y dre'
'Gorwyd siop newydd sbon a hon ar dri llawr
Rhaid oedd rhuthro ar unwaith I'r lle.
Canys yno ceid arch-farchnad dynion
Y cyntaf o'i math yn y wlad
Tri llawr yn llawn o ddanteithion i fi
Gael profi er budd fy mwynhad.
Roedd arwydd ar ddrws y llawr cyntaf
Yn darllen yn union fel hyn-
"Yma ceir dynion o ansawdd reit dda -
Gwaith t, magu'r plant, gwagio'r bin"
" O grêt!" meddwn i, ond tybed oes gwell?
Cyrhaeddais y llawr nesaf un
Yno roedd dynion golygus a chall
Yn weithgar a chefnog a " keen!"
Ond ysfa i esgyn a ddaeth 'to i'm rhan
Gan feddwl fod gwell ar lawr tri.
Ond siom y llawr gwag a'r arwydd yn dweud
Nad oedd modd plesio menyw fel fi!
8 1/2 Pwynt
Ateb Llinell ar y pryd
A ddylid gwahardd hela
Yn dy brîffs a'th wyndybra?
0 Pwynt
Ateb Llinell ar y pryd
A ddylid gwahardd hela
Yn glir, yn wir, bloeddiwn "NA"
1 Pwynt
Telyneg mewn mydr ac odl
(Beslam)
Rwy'n mynd i'r ysgol heddiw
A llyfr yn fy llaw,
A'i lond o hud a lledrith
Yn lliwio fory ddaw.
Teulu mawr a thy bach twt
Yn baent ar flaen y mysedd
A milwyr bach gemau bwrdd
Sy'n ffrindie yn y diwedd.
Creu teyrnas ddiniweidrwydd
Bob dydd o fricie lego
A chwarae mig mewn dyddie da
Heb weld yfory'n cuddio.
* * *
Ond dacw hi yn dwad
Dro y gamfa wen
Rhywbeth yn ei ffedog
A mwgwd ar ei phen
* * *
Heno, heno, hen blant bach
A'u dwylo gwan yn erfyn
Heno, heno, hen blant bach
Ar drothwy nos di- derfyn.
Fory, fory, hen blant bach
Mae sgrech drwy'r ty bach twt
Y soldiwrs plastig dros bob man
A chyrff yn ddolis clwt.
* * *
Mynd i'r ysgol heddiw
A llyfr yn fy llaw,
A'i lond o straeon arswyd
Bwganod fory ddaw.
Mari Stevens
10 Pwynt
Telyneg mewn mydr ac odl
(Ar y ffordd I'r gem bel-droed Cymru v Pwyl - Hydref 13eg 2004)
A minnau gyda'r dorf yn bloeddio'n groch
Ar noson fwyn o Hydref yng Nghaerdydd,
A sain undonog utgyrn uchel groch
I lawr stryd y Frenhines, gwefr sydd.
Mae stadiwm y Mileniwm yn nesáu
A dawnsio yn ei golau a wna'r Taf.
Fy llaw ar docyn aur sy'n dynn ar gau
A chyn bo hir gwireddu breuddwyd gaf.
Ond wrth droi heibio'r Angel - gwelais ef
Yn eiste'n fwndel unig yn y nos.
A chlywais yn y swn, ei egwan lef
Yn gofyn " Ceiniog syr , i ddyn mewn ffos?"
Fy nghyffro i yw'r 'sblander ochor draw,
A'i gyffro ef yw'r newid yn ei law.
9 Pwynt
Englyn ar y pryd: Anaf Nid iaith y gorymdeithio- yn un rheng 9 Pwynt CYFANSWM Y PWYNTIAU: 79 1/2 PWYNT CYNIGION ERAILL Cwpled caeth ar yr odl 'ws' Hen boen yw Mansel a bws Pennill Telyn yn dechrau â'r geiriau 'Nid yw ...' Nid yw'r orsaf heno'n adfail Limrig yn ymwneud â meddwi Fy mwriad bnawn heddiw 'di priodi Dafydd Morgan Lewis
Ond rhai nad ynt yno
All finiocau llafn y cô
A dynn y gwad ohono.
I Astra ar riw Wstrws.
Nid yw'r capel 'di gwacáu
Mae 'no ganu unwaith eto
Ymhell tu hwnt i amser cau.
Fy Mlodwen yng nghapel y Gelli
Felly sut yn y byd
'Mod i'n fflat ar fy hyd
Mewn tafarn fach glyd yn Kilkenny.
Englyn ar y pryd: Anaf
O'n hanfodd mae gwahanfur,- yn ei gwsg
Gwelaf gysgod pladur
Heb un gwyn o'i boen a'i gur
Ei dawelwch yw'n dolur.
9 Pwynt
CYFANSWM Y PWYNTIAU: 78 1/2
Chwilio
Amserlen
Ar yr awyr nawr
05:00Richard Rees
Richard Rees yn cyflwyno'r gerddoriaeth orau o bob cyfnod, o'r 70au a'r 80au hyd heddiw.
