Rachmaninov 2 gyda Martyn Brabbins

Grace Williams
Elegy for Strings5’

Carl Nielsen
Concerto i’r Ffidil34’

EGWYL: 20 munud

Sergey Rachmaninov
Symffoni Rhif 258’

Martyn Brabbins arweinydd
Liya Petrova ffidil

Bydd y cyngerdd yn Abertawe yn cael ei recordio gan BBC Radio 3 i’w ddarlledu ar raglen Radio 3 in Concert yn y dyfodol. Bydd ar gael am 30 diwrnod ar ôl ei ddarlledu drwy BBC Sounds, sydd hefyd yn cynnig podlediadau a chymysgedd o gerddoriaeth i chi.

Ysgrifennwyd The Elegy for Strings yn gynnar yn ystod gyrfa Grace Williams, yn fuan ar ôl gorffen ei hastudiaethau gyda Ralph Vaughan Williams yn Llundain ac Egon Wellesz yn Fienna. Yn ystod y cyfnod ffurfiannol hwn, roedd y ddwy duedd sy’n sail i allbwn diweddarach y cyfansoddwr wedi dechrau datblygu: ar un llaw, roedd ei defnydd o alawon gwerin traddodiadol Cymreig yn ysbrydoliaeth ac, ar y llaw arall, roedd hi’n rhoi’r idiomau modernaidd a gafodd drwy ei blynyddoedd o hyfforddiant ar waith.

Er bod yr agorawd cynharach Hen Walia (1930) yn rhaglunio gweithiau Williams a ysbrydolwyd gan gerddoriaeth werin, mae’r Elegy yn dangos meistrolaeth gynnar y cyfansoddwr o’r iaith fodernaidd. Mae’r gerddoriaeth yn seiliedig ar y tri nodyn cyntaf sy’n cael eu chwarae gan yr ail ffidil a’r fiolâu, sy’n gweithredu fel yr hedyn ar gyfer trawsnewidiadau dilynol. Ar ôl cyrraedd uchafbwynt dros ffidlau trawsacennog a llinynnau is anghyseiniol, mae’r trawiadau cychwynnol yn dod yn ôl i’r wyneb gyda phroffil rhythmig tebyg ar y ffidlau cyntaf, gan fod yn arwydd o ailadrodd sy’n arwain yn raddol at y cord cytseiniol y mae’r darn yn gorffen ag ef.

^{Nodyn y rhaglen © Kelvin H. F. Lee}

1 Praeludium – Allegro cavalleresco
2 Poco adagio – Rondo (Allegretto scherzando)

Liya Petrova ffidil

Un tebygrwydd prin y gellir ei olrhain rhwng Carl Nielsen a’r cyfansoddwr Nordig Jean Sibelius a oedd yn cydoesi ag ef, yw’r ffaith bod y ddau gyfansoddwr fel ei gilydd wedi dechrau fel chwaraewyr ffidil. Yn wahanol i Sibelius, ni chafodd Nielsen offeryn hyfryd yn rhodd gan ewythr egsotig a oedd yn fordeithiwr. Yn hytrach, chwaraeodd hen ffidl oedd wedi gweld ei dyddiau gwell fel rhan o fand dawns teithiol ei dad.

Flynyddoedd yn ddiweddarach, canfu Nielsen ei hun yn chwarae yng Ngherddorfa Frenhinol Denmarc, a oedd ychydig yn fwy mawreddog, yn Copenhagen. Roedd yn aelod o’r ensemble am 16 mlynedd; er, wrth i amser fynd heibio, roedd yn gweithio fwyfwy fel arweinydd yn hytrach nag fel ail feiolinydd. Ond, fel Sibelius, roedd Nielsen yn teimlo rheidrwydd i fanteisio ar ei brofiad ymarferol ar y ffidil drwy hyrwyddo’r traddodiad o goncerti ar gyfer yr offeryn a oedd wedi blodeuo yn y ganrif flaenorol. Rhywdro ar ôl 1905, dywedodd Nielsen wrth ffrind ei fod wedi meddwl am ysgrifennu concerto i’r ffidil ‘bob dydd dros y chwarter canrif diwethaf’. Yna, yn 1910, cafodd Nielsen yr ysbrydoliaeth ddynol yr oedd ei hangen arno. Dychwelodd y feiolinydd Peder Møller, a oedd yn fethdalwr dramor, i’w wlad enedigol i fod yn arweinydd Cerddorfa Frenhinol Denmarc.

Yn ystod gwanwyn 1911, ar wahoddiad Nina, gweddw Edvard Grieg, teithiodd Nielsen i Norwy, lle bu’n aros yn Troldhaugen, y tŷ yr oedd y cyfansoddwr o Norwy wedi’i adeiladu y tu allan i Bergen. ‘Allwch chi ddim dychmygu pa mor hyfryd yw hi yma,’ ysgrifennodd Nielsen at ei deulu. ‘Gallwn rwyfo o gwmpas yr ynysoedd a’r cilfachau bach rhamantus … a dychmygu mai ni yw’r unig bobl yn y byd.’ Yno, dechreuodd Nielsen weithio ar y concerto newydd. Yn ôl yn Nenmarc ym mis Medi, cafodd ei orfodi i roi ei bin ysgrifennu i lawr a chodi ei faton wrth i ymarferion cerddorfaol ailgychwyn. Nid tan fis Rhagfyr y trodd yn ôl at ei Goncerto i’r Ffidil unwaith eto. Ar 28 Chwefror 1912, rhoddodd Møller berfformiad o’r gwaith gorffenedig am y tro cyntaf, gyda Nielsen yn arwain.

Mae dwy ran i’r gwaith, ac mae’r ddwy i bob pwrpas yn cynnwys dau symudiad, un araf ac yna un cyflym. Mae’n cael ei lansio gan gadenza swta (y cyntaf o dri) sy’n rhagflaenu harddwch difrifol y Praeludium. Os yw’r gerddoriaeth hon yn achosi anadlu dwfn, wrth sôn am yr amgylchedd hyfryd, eang, a ddisgrifiodd Nielsen yn ei lythyr o Troldhaugen, efallai bod ‘alaw fawr’ yr Allegro calvalleresco (‘allegro bonheddig’) yn dweud rhywbeth am y ffurfiannau anferth o greigiau sy’n ffinio â bae Nordåsvannet, gerllaw Troldhaugen.

Yr ‘alaw fawr’ honno yw’r agosaf y daw Nielsen at gydnabod traddodiad Rhamantaidd y concerto i’r ffidil mewn cerddoriaeth sydd fel arall yn neo-Glasurol, yn ddirodres ac yn nodweddiadol wrth-Ramantaidd. Ac, er gwaethaf ei ehangder, mae’r alaw yn cael ei chyflwyno gyda tharo a gwrthdaro sy’n newid sylfeini’r darn. Yn fuan ar ôl i’r unawdydd ymgymryd â hi, mae’n mynd i drafferthion: nid yw’r gerddorfa’n barod i oddef lled-arwriaeth yr unawdydd ac mae’n ei orfodi i fynegi’r thema mewn ffordd fwy diymhongar, fel cân syml i’w rhannu.

Mae Rhan 2 yn dechrau gydag arwydd penodol o neo-Glasuriaeth wrth i unawd obo ddatgan y ffigur pedwar nodyn sy’n gysylltiedig â’r enw Bach. Wrth i’r Adagio barhau, mae’n ymddangos bod y gerddoriaeth yn cynyddol fyw yn y byd sain brau a choblynnaidd a fyddai’n dod yn nodweddiadol o Nielsen, gan chwarae’n amwys gyda chyweiriau lleddf a llon. Mae hynny’n parhau â ffantasïau a gemau’r Allegretto scherzando, lle mae’r chwaraewr ffidil gwerinol o blentyndod Nielsen yn cael rhagflas o’r gwrthdaro a fyddai’n ffrwydro’n fuan yn ei sgorau.

Roedd y cyfansoddwr ei hun yn cymharu’r symudiad olaf hwn â ‘diogyn yn gwenu’n daer ar ddiwrnod gwell’. Mae ei brif thema sionc, a gyflwynwyd gan yr unawdydd ar y dechrau, yn cael ei hysgwyd o’i hysmaldod ddwywaith gan gerddoriaeth gwbl wahanol. Ychydig dros hanner ffordd drwy’r broses, mae’r unawdydd yn troi tuag i mewn am gadenza mwy crisialaidd fyth, a thebyg i Bach, lle mae’r brif thema wedyn yn dod i’r amlwg dros linynnau cerddorfaol pizzicato. Mae’r sgwrs hwyliog rhwng yr unawdydd a’r gerddorfa – sydd ar un adeg yn cyflwyno gweddnewidiad chwareus o’r alaw fawr honno o Ran 1 – yn parhau tan y bar terfynol.

^{Nodyn y rhaglen © Andrew Mellor}

EGWYL: 20 munud

1 Largo – Allegro moderato
2 Allegro molto
3 Adagio
4 Allegro vivace

Daw Ail Symffoni Rachmaninov o’i ddegawd mwyaf cynhyrchiol, pan oedd eisoes yn enwog yn rhyngwladol, yn bianydd ac yn arweinydd meistrolgar yn Opera Bolshoi. Gan fod arno angen cyfnod sabothol i ganolbwyntio ar gyfansoddi, symudodd i Dresden, a oedd yn ei ddenu ar gyfrif ei fywyd cerddorol cyfoethog a’i dawelwch cymharol. Byddai cyfansoddi symffoni newydd uchelgeisiol yn galluogi Rachmaninov i fwrw allan atgofion chwerw o’r perfformiad cyntaf o’i Symffoni Gyntaf yn 1897, a dderbyniwyd gyda gwawd a diffyg dealltwriaeth. Pan dderbyniwyd yr adolygiadau, roedd yn falch iawn bod yr Ail yn cael ei hystyried yn ‘ddofn a phrydferth’. Cafwyd y perfformiad cyntaf yn 1908 gan Rachmaninov ei hun, a chafodd ei mabwysiadu’n gyflym gan Arthur Nikisch ac arweinwyr mawr eraill.

Mae cyflwyniad Largo'r symudiad cyntaf yn cyfateb i'r cysylltiadau poblogaidd y mae cerddoriaeth Rachmaninov wedi'u casglu: hiraeth ac eangderau mawr Rwsia. Yr hyn sy’n cael ei anwybyddu fel arfer yw natur arloesol yr ysgrifennu. Mae'r cyflwyniad yn tyfu o fotiff cychwynnol yn y synau bas, un o nifer o ymadroddion tebyg i siant gan Rachmaninov. Mae gweddill y cyflwyniad yn llawn estyniadau, cywasgiadau neu wrthdroadau o’r motiff, ond yn swnio’n naturiol yn hytrach na phedantig. Mae’r gwead cerddorfaol yn mynd yn rhyfeddol o gymhleth (efallai o dan ddylanwad Richard Strauss, a’i opera Salome yr oedd Rachmaninov newydd ei chlywed).

Mae Allegro’r symudiad cyntaf yn cyflwyno ymdeimlad o fwy o yriad rhythmig, ond mae’r holl themâu’n dal i gydberthyn i’w gilydd ac yn deillio o’r motiff cychwynnol. Torrir ar y cymalau sy’n cwympo’n bruddglwyfus gan ymchwyddiadau tuag i fyny, ac rydym ar drugaredd y tonnau hyn, yn fawr ac yn fach (tua’r cyfnod hwn, ysgrifennodd Rachmaninov ei gerdd symffonig The Isle of the Dead, sy’n portreadu tonnau’r môr yn benodol).

Mae’r ail symudiad yn scherzo, math o ddawns ddieflig. Mae’r themâu’n bigog ac yn onglog, ac eto mae eu hamlinellau’n dal i fod yn gysylltiedig â deunydd y symudiad cyntaf, fel pe baent yn cael eu hystumio gan Mephistopheles. Erbyn hyn, mae’r motiffau’n debyg yn fras i’r siant Dies irae a ddefnyddiodd Rachmaninov yn llawer o’i brif weithiau fel symbol o farwolaeth. Mae canolbwynt y symudiad yn syndod mawr, yn adran ffiwg groch a didrugaredd. Roedd yn briodol bod y Symffoni’n cael ei chyflwyno i Sergey Taneyev, y damcaniaethwr a’r cyfansoddwr, a oedd wedi bod yn athro ffiwg ar Rachmaninov.

Mae’r trydydd symudiad yn rhyfeddod, ac mae ei alaw agoriadol mor ddeniadol nes iddi gael ei mabwysiadu’n ddiweddarach fel cân bop (‘Never Gonna Fall in Love Again’ gan Eric Carmen, 1975). Roedd Rachmaninov yn ddylanwad mawr ar sawl sgôr ar gyfer ffilmiau cyfoethog Hollywood, ac mae'n anodd i wrandawyr heddiw glywed y symudiad hwn o'r newydd. Ond mae’n werth gwneud yr ymdrech: mae llawer o waith cyfansoddi cymhleth y tu ôl i awyrgylch persawrus yr olygfa ramantus sydd ymhlyg.

Mae’r diweddglo’n ddathliad bywiog sy’n cael ei yrru gan rythmau tarantella. Mae’n ddigon cynhwysfawr i gynnwys atganau lliwgar ac adleisiau o’r symudiadau blaenorol, ond ei brif rôl yw chwalu’r holl amheuon a chysgodion. Un llwyddiant trawiadol o ran cyfansoddi yw’r darn ingol sydd wedi’i adeiladu’n gyfan gwbl o raddfeydd disgynnol, mewn llu o amrywiadau rhythmig gwahanol.

^{Nodyn y rhaglen © Marina Frolova-Walker}

Helpwch ni i wella ein rhaglenni ar-lein.
A fyddech cystal â rhoi 5 munud o’ch amser i roi eich barn ar y nodiadau hyn drwy lenwi’r arolwg hwn?Arolwg Rhaglenni

Digwyddiadau eraill a all fod at eich dant ... 

Boed i’r Holl Fyd Ganu ym mhob Cwr

Nos Wener 22/3/24, 7.30pm
Neuadd Hoddinott y BBC, Caerdydd

NunesGarcia Agorawd ‘Zemira’
J. S. Bach Cantata Rhif 82, ‘Ich habe genug’
Haydn Symffoni Rhif 26, ‘Lamentatione’
Vaughan Williams Five Mystical Songs

Harry Bicket arweinydd
Julien Van Mellaerts bariton
Corws Cenedlaethol Cymreig y BBC

GOGONEDDUS | YSBRYDOL | SWYNGYFAREDDOL

Mae ysbryd y Pasg, er ei fod yn gynnil, yn treiddio drwy’r cyngerdd hwn, gyda Harry Bicket yn dychwelyd i arwain Cerddorfa a Chorws Cenedlaethol Cymreig y BBC. Y cyfansoddwr o Frasil, José Maurício Nunes Garcia, fydd yn dechrau’r noson gyda’i Agorawd Zemira, ac mae’r bariton anhygoel, Julien Van Mellatens, yn perfformio Ich habe genug gan Bach. Mae’r gwaith hwn yn gwbl addas ar gyfer unrhyw gyngerdd y Pasg, gyda thestun sy’n adrodd hanes puro Mair ac yn cyhoeddi ei hawydd i ddianc rhag trallod y ddaear yn ôl at Iesu.

Nid oes llawer yn gwybod mai ar gyfer y Pasg y cafodd Symffoni Rhif 26 Haydn ei hysgrifennu, er pan edrychwn yn ddyfnach ar y gerddoriaeth, mae llawer o awgrymiadau amlwg. Cafodd ei hysgrifennu mewn Sturm und Drang (storm a straen) nodweddiadol, mae’r awyrgylch dymhestlog a’r cywair lleiaf yn sail i ddyfyniadau o ganeuon plaen Wythnosau'r Dioddefaint, sy’n fwy perthnasol i eglwys na’r neuadd gyngerdd. Hefyd ar gyfer y Pasg, ysgrifennwyd Five Mystical Songs gan Vaughan Williams, sy’n gosod testun o The Temple: Sacred Poems gan y bardd a’r offeiriad o Gymru, George Herbert. Yn ysbrydol ac yn uniongyrchol wrth gyflwyno, mae’r pum symudiad yn cyferbynnu o ddistaw a myfyriol i floeddiadau o ganmoliaeth buddugoliaethus.

Concerto i Gerddorfa gan Bartók

Nos Iau 9/5/24, 7.30pm
Neuadd Hoddinott y BBC, Caerdydd

Nos Wener 10/5/24, 7.30pm
Neuadd Brangwyn, Abertawe

Caroline Shaw The Observatory première y DU
Ravel Concerto i’r Piano yn G fwyaf
Bartók Concerto i Gerddorfa

Giancarlo Guerrero arweinydd
Sergio Tiempo piano

LLIWGAR | DEINAMIG | GAFAELGAR

Cafodd The Observatory gan Caroline Shaw (sy’n cael ei berfformio am y tro cyntaf yn y DU) ei ysbrydoli gan daith i Arsyllfa Griffin ger Hollywood Bowl; mae’n archwilio ffyrdd newydd o edrych ar y bydysawd, yn cyfuno’r hen a'r newydd gydag anhrefn ac eglurder, mewn llif ymwybod sy’n procio ein chwilfrydedd.

Bydd concerto atmosfferaidd Ravel i’r piano, sy’n gymysgedd gyfoethog o delynegiaeth, offeryniaeth atgofus a darnau piano meistrolgar, yn cael ei berfformio gan y pianydd penigamp, Sergio Tiempo, wrth iddo ymddangos am y tro cyntaf gyda BBC NOW. I gloi’r rhaglen syfrdanol hon, mae’r feistrolaeth ryfeddol yn parhau yng Nghoncerto gwych Bartók i Gerddorfa, gyda’i adleisiau o gerddoriaeth werin, dan arweiniad Giancarlo Guerrero, yr arweinydd o Costa Rica sydd wedi ennill Gwobr Grammy.

Cyngerdd Cloi’r Tymor

Nos Iau 6/6/24, 7.30pm
Neuadd Hoddinott y BBC, Caerdydd

Nos Wener 7/6/24, 7.30pm
Neuadd Brangwyn, Abertawe

Dvořák Concerto i’r Soddgrwth
Jennifer Higdon Blue Cathedral
Dawson Negro Folk Symphony

Ryan Bancroft arweinydd
Alisa Weilerstein soddgrwth

YSBRYDOLEDIG | EICONIG | AMRYWIOL

Mae Alisa Weilerstein, y chwaraewr soddgrwth byd-enwog, yn ymuno â Cherddorfa Genedlaethol Gymreig y BBC yng nghyngerdd olaf y tymor ar gyfer un o'r concerti i'r soddgrwth mwyaf poblogaidd. Wrth i Dvořák edrych yn ôl ar ei fywyd llawn mwynhad ond hefyd yn llawn colled, disgleiria ei arbenigedd alawol, ei egni bywiog a’i gariad at gerddoriaeth gwerin ei famwlad. Yn yr un modd, mae dyfeisiadau cerddorol greddfol, offeryniaeth gyfoethog, ac archwiliad o’r gadeirlan ‘fel drws symbolaidd i mewn ac allan o’r byd hwn’ yn llwyfan ar gyfer awyrgylch breuddwydiol, synfyfyriol, arallfydol yn Blue Cathedral gan Jennifer Higdon.

Dychmygwch hyn: Mis Tachwedd 1934, yn Neuadd Carnegie a symffoni newydd sbon yn cael ei chyflwyno, gan dderbyn cymeradwyaeth frwd gan y gynulleidfa a’r cyfansoddwr diymhongar yn ymgrymu. William Dawson oedd y cyfansoddwr hwnnw, dyn Americanaidd-Affricanaidd 35 oed, a oedd wedi ffoi o’i gartref yn 13 oed er mwyn gwireddu ei freuddwyd o astudio cerddoriaeth; a’r darn oedd y Negro Folk Symphony. Aeth Dawson ati i gyfansoddi cerddoriaeth synhwyrus a gonest a oedd ‘yn amlwg ddim yn waith gan ddyn gwyn’ a chafodd ei ysbrydoli gan gerddoriaeth werin negroaidd yr oedd wedi’i dysgu pan oedd yn blentyn bach. Pwy well i arwain y symffoni hon, sydd wedi’i chreu’n fedrus ac sy’n llawn emosiwn, na’n Prif Arweinydd Ryan Bancroft?

Bywgraffiadau

Martyn Brabbinsarweinydd

Mae Martyn Brabbins yn Gyn-Gyfarwyddwr Cerdd Opera Cenedlaethol Lloegr. Ac yntau’n ffigwr o bwys ac yn ysbrydoliaeth ym myd cerddoriaeth Brydeinig, mae wedi cael gyrfa brysur ym myd yr opera, ers ei ddyddiau cynnar yn y Kirov ac yn fwy diweddar yn La Scala a’r Bayerische Staatsoper, yn ogystal ag ymddangosiadau rheolaidd yn Lyon, Amsterdam, Frankfurt ac Antwerp.

Mae’n ymddangos fel arweinydd gwadd gyda cherddorfeydd rhyngwladol blaenllaw, gan gynnwys y Royal Concertgebouw, Cerddorfeydd Symffoni Metropolitan Tokyo a San Francisco a Deutsches Symphonie-Orchester Berlin, yn ogystal â’r Philharmonia, Cerddorfa Symffoni’r BBC a’r rhan fwyaf o brif gerddorfeydd eraill y DU. Mae’n ffigwr poblogaidd ym Mhroms y BBC, a gomisiynodd 14 o gyfansoddwyr byw i ysgrifennu teyrnged pen-blwydd iddo yn 2019. Mae’n adnabyddus am ei gefnogaeth i gyfansoddwyr Prydeinig ac mae wedi arwain cannoedd o premières ledled y byd. Mae wedi recordio bron i 150 o gryno-ddisgiau hyd yma, gan gynnwys operâu llwyddiannus gan Korngold, Birtwistle a Harvey. Y llynedd, derbyniodd Wobr Arweinydd y Gymdeithas Ffilharmonig Frenhinol am ei gyfraniad ‘anferth’ i fywyd cerddorol y DU.

Bu’n Brif Arweinydd Cyswllt Cerddorfa Symffoni BBC yr Alban (1994–2005), Prif Arweinydd Gwadd y Gerddorfa Ffilharmonig Ffleminaidd Frenhinol (2009–15), Prif Arweinydd Cerddorfa Ffilharmonig Nagoya (2012-16), a Chyfarwyddwr Artistig Gŵyl Gerddoriaeth Ryngwladol Cheltenham (2005–7). Mae’n Athro Arwain y Tywysog Cydweddog yn y Coleg Cerdd Brenhinol, yn Athro Gwadd yng Nghonservatoire Brenhinol yr Alban, ac yn Gynghorydd Artistig i Gymdeithas Gorawl Huddersfield; ers blynyddoedd lawer mae wedi cefnogi’r gwaith o greu cerddoriaeth broffesiynol, amatur a cherddoriaeth gan fyfyrwyr ar y lefel uchaf yn y DU.

Liya Petrova ffidil

Cafodd y feiolinydd Liya Petrova o Fwlgaria sylw rhyngwladol pan enillodd Gystadleuaeth Carl Nielsen 2016 yn Nenmarc.

Mae hi wedi ymddangos fel unawdydd gydag ensembles gan gynnwys yr Orchestre de Paris, Orchestre Philharmonic de Radio France, Brwsel, Kansai, Lwcsembwrg, Monte Carlo, Netherlands Radio a cherddorfeydd Ffilharmonig Brenhinol, Antwerp, Bournemouth, China State, Flanders, Odense a cherddorfeydd Symffoni Wrocław, Hong Kong Sinfonietta, Staatskapelle Weimar a Sinfonia Varsovia, ymysg eraill. Mae hi wedi gweithio gyda phrif arweinwyr, gan gynnwys Elim Chan, Stanislas Kochanovsky, Duncan Ward, Philippe Herreweghe, Krzysztof Penderecki, Tan Dun, Nikolaj Szeps-Znaider, Catherine Larsen-Maguire, Martyn Brabbins, Alexander Liebreich, Mihhail Gerts, Kristiina Poska, Yan-Pascal Tortelier, Xian Zhang, Roberto Minasi, a Jesús López Cobos.

Fel cerddor siambr, mae hi wedi perfformio gydag Alexandre Kantorow, Beatrice Rana, Emmanuel Pahud, Pablo Ferrandez, Martha Argerich, Yuri Bashmet, Mischa Maisky, Renaud and Gautier Capuçon, Augustin Dumay, James Ehnes, Nicholas Angelich, Frank Braley, Yuja Wang, Gérard Caussé, Antoine Tamestit, Bruno Philippe ac Aurélien Pascal.

Mae’n ymddangos yn rheolaidd mewn gwyliau cerddoriaeth siambr, gan gynnwys Mecklenburg-Vorpommern, Rheingau, Ludwigsburger Schlossfestspiele, Aix-en-Provence Easter, La Folle Journée, La Roque d’Anthéron a’r Rencontres Musicales d’Evian.

Mae ei recordiadau’n cynnwys concertos gan Beethoven, Nielsen, Prokofiev a Walton, sydd wedi cael clod mawr gan feirniaid.

Ganed Liya Petrova i deulu o gerddorion ac astudiodd gydag Augustin Dumay yn y Chapelle Musicale Reine Elisabeth ym Mrwsel, Antje Weithaas yn Hochschule für Musik Hanns Eisler Berlin a Renaud Capuçon yn yr Haute Ecole de Musique yn Lausanne.

Mae hi’n chwarae ‘Rovelli’ Guarneri del Gesù 1742, diolch i gefnogaeth ei noddwr hael.

Cerddorfa Genedlaethol Gymreig y BBC

Ers 90 mlynedd a mwy, mae Cerddorfa Genedlaethol Gymreig y BBC wedi chwarae rhan ganolog yn nhirwedd ddiwylliannol Cymru, ac mae ganddi rôl unigryw fel cerddorfa ddarlledu a cherddorfa symffoni genedlaethol. Yn rhan o BBC Cymru Wales, ac yn cael cefnogaeth gan Gyngor Celfyddydau Cymru, mae’r gerddorfa’n perfformio amserlen brysur o gyngherddau byw ledled Cymru, gweddill y Deyrnas Unedig a’r byd.

Mae’r gerddorfa’n llysgennad dros gerddoriaeth Cymru, ac mae’n hyrwyddo cyfansoddwyr a cherddorion cyfoes. Mae modd gwrando ar gyngherddau’r Gerddorfa’n rheolaidd ar draws y BBC: ar Radio Cymru, Radio Wales a Radio 3.

Mae BBC NOW yn gweithio’n agos gydag ysgolion a sefydliadau cerddoriaeth ledled Cymru ac yn cynnal gweithdai’n rheolaidd, ochr yn ochr â pherfformiadau a chynlluniau i gyfansoddwyr ifanc i ysbrydoli ac annog y genhedlaeth nesaf o berfformwyr, cyfansoddwyr ac arweinwyr y celfyddydau.

Mae ein stiwdio bwrpasol wedi’i lleoli yn Neuadd Hoddinott y BBC ym Mae Caerdydd, ac mae’n darparu’r lle perffaith ar gyfer cyngherddau ac yn ganolfan ddarlledu ar gyfer y gerddorfa. Gallwch chi ddisgwyl mwy o gyngherddau BBC NOW sy’n cael eu ffrydio’n fyw, a chynnwys wedi’i recordio ymlaen llaw, fel rhan o’i ‘Chyfres o Gyngherddau Digidol’ poblogaidd.

I gael yr holl wybodaeth, ewch i wefan Cerddorfa a Chorws Cenedlaethol Cymreig y BBC: bbc.co.uk/now

Noddwr
Ei Fawrhydi Y Brenin Charles III ^{KG KT PC GCB}
Prif Arweinydd
Ryan Bancroft 
Arweinydd Llawryfog
Tadaaki Otaka ^CBE
Cyfansoddwr Cysylltiedig
Gavin Higgins
Cyfansoddwr Cydweithredol
Sarah Lianne Lewis

Ffidlau Cyntaf
Lesley Hatfield blaenwr
Nick Whiting blaenwr cyswllt
Martin Gwilym-Jones is-flaenwr
Gwenllian Hâf MacDonald
Terry Porteus
Carmel Barber
Anna Cleworth
Juan Gonzalez
Rebecca Totterdell
Emilie Godden
Zhivko Georgiev
Amy Fletcher
Gary George-Veale **
Barbara Zdziarska **

Ail Ffidlau
Anna Smith *
Paul Medd
Ros Butler
Sheila Smith
Ilze Abola
Lydia Caines
Joseph Williams
Beverley Wescott
Roussanka Karatchivieva
Katherine Miller
Vickie Ringguth
Sebastian Canellis **

Fiolâu
Yukiko Ogura ‡
Alex Thorndike #
Tetsuumi Nagata
Peter Taylor
Robert Gibbons
Lydia Abell
Anna Growns
Daire Roberts
Catherine Palmer
Lowri Thomas

Soddgrythau
Alice Neary *
Raphael Lang
Sandy Bartai
Carolyn Hewitt
Keith Hewitt
Rachel Ford
Alistair Howes
Kathryn Graham **

Basau Dwbl
David Stark *
Christopher Wescott
Evangeline Tang
Richard Gibbons
Antonia Bakewell
Thea Sayer **
Callum Duggan **

Ffliwtiau
Matthew Featherstone *
John Hall †
Lindsey Ellis

Piccolo
Lindsey Ellis †

Oboau
Steve Hudson *
Ross Williams
Amy McKean †

Cor anglais
Amy McKean

Clarinetau
Nick Carpenter *
Aaron Hartnell-Booth
Lenny Sayers

Clarinet Bas
Lenny Sayers †

Baswnau
Jarosław Augustiniak *
Verity Burcombe

Cyrn
Tim Thorpe *
Meilyr Hughes
Neil Shewan †
Samuele Bertocci
John Davy

Utgyrn
Philippe Schartz *
Robert Samuel
Corey Morris † ++ 

Trombonau
Donal Bannister*
Jake Durham

Trombôn Bas
Darren Smith †

Tiwba
Anders Swane

Timpani
Steve Barnard *

Offerynnau Taro 
Phil Hughes ‡
Andrea Porter
Rhydian Griffiths
Harry Lovell-Jones

* Prif Offerynnwr yr Adran
† Prif Offerynnwr
‡ Prif Offerynnwr Gwadd
# Prif Offerynnwr Cynorthwyol
** Rachmaninov yn unig
++ Prif Offerynnwr yn y Nielsen

Roedd y rhestr o aelodau’r gerddorfa yn gywir wrth fynd i’r wasg

Cyfarwyddwr Lisa Tregale
Rheolwr y Gerddorfa Vicky James
Rheolwr Cynorthwyol y Gerddorfa Nick Olsen
Cydlynydd y Gerddorfa, Gweithrediadau Kevin Myers
Cydlynydd Busnes Caryl Evans
Gweinyddwr y Gerddorfa Eleanor Hall +
Pennaeth Cynhyrchu Artistig Matthew Wood
Rheolwr Artistiaid a Phrosiectau Victoria Massocchi **
Llyfrgellydd y Gerddorfa Katie Axelsen(yn llenwi dros gyfnod tadolaeth)
Cynhyrchydd Mike Sims
Cynorthwyydd DarlleduKate Marsden
Pennaeth Marchnata a Chynulleidfaoedd Sassy Hicks
Cydlynydd Marchnata Amy Campbell-Nichols +
Cynhyrchydd Digidol Yusef Bastawy
Cydlynydd Cyfryngau Cymdeithasol Harriet Baugh
Cynhyrchwyr Addysg Beatrice Carey, Rhonwen Jones **
Goruchwylwyr Sain Simon Smith, Andrew Smillie
Rheolwr Busnes Cynhyrchu Lisa Blofeld
Rheolwr Llwyfan a Thechnegol Steven Brown +
Rheolwr Llwyfan a Thechnegol Cynorthwyol Josh Mead
Prentis BBC Cymru Jordan Woodley

+ Aelod o’r Tîm Gwyrdd
** Fforwm Amrywiaeth a Chynhwysiant