طالبان: تاجیکستان در امور ما مداخله می‌کند

به گزاش رسانه‌ها مقامات دولت طالبان در واکنش به اظهارات امام‌علی رحمان می‌گویند که تاجیکستان در امور افغانستان مداخله می‌کند. به گفته مقامات دولت طالبان "تاجیکستان در امور ما دخالت می‌کند، برای هر اقدامی عکس‌العملی وجود دارد."

رئیس جمهوری تاجیکستان سه روز پیش که در هفتاد و ششمین اجلاس مجمع عمومی سازمان ملل متحد، از راه دور صحبت می‌کرد گفت در حالی که نمی‌خواهد در امور داخلی افغانستان مداخله داشته باشد، ولی باور دارد که برای حل مسائل سیاسی و امنیتی این کشور، باید انتخابات برگزار شود و دولتی با مشارکت همه اقوام، به میان بیاید.

در همین اجلاس مجمع سازمان، عمران خان، نخست وزیر پاکستان در سخنان خود اما از جهان خواست که بخاطر مردم افغانستان با طالبان تعامل کنند. آقای خان، قبلا و در جریان نشست سازمان هماهنگی شانگهای که در دوشنبه، پایتخت تاجیکستان، برگزار شده بود، به رئیس جمهوری تاجیکستان وعده داده بود که با مقام‌های طالبان در مورد دخیل ساختن تاجیکان، ازبکها و هزاره‌های افغانستان در دولت طالبان، صحبت خواهد کرد.

معاون نخست وزیر دولت طالبان در حالی از اظهارات رئیس جمهوری تاجیکستان انتقاد کرد که همه کشورهای ناظر بر وضعیت افغانستان خواستار ایجاد دولت همه شمول در افغانستان شده اند.

گروه طالبان دولت خود را به رهبری محمد حسن آخوند اعلام کرده است. در میان اعضای کابینه اعلام شده از سوی طالبان، برخی از اعضای "شبکه حقانی" که در فهرست گروه‌های تروریستی آمریکا قرار دارد، سمت‌های کلیدی را به خود تخصیص داده است. بیشتر از ۹۰ درصد کابینه طالبان را پشتون‌ها تشکیل می‌دهند و تا حال هیچ زنی در کابینه و یا سمت‌های بالای اجرایی دیگری معرفی نشده‌است. البته سخنگویان طالبان می‌گویند که این کابینه در حال حاضر نقش سرپرستی وزارتخانه‌های کلیدی را با هدف کنترل اوضاع و جل.گیری از هرج و مرج، در دست دارند.

دولت طالبان تاکنون از سوی هیچ کشوری به رسمیت شناخته نشده است؛ اما بسیاری از کشورهای جهان خواهان کمکهای بشر‌دوستانه به این کشور و جلوگیری از ایجاد یک بحران انسانی هستند.