दल विवाद यथाशीघ्र निरूपण गर्न पाँच पूर्व प्रमुख आयुक्तको आग्रह, ढिलाइले निर्वाचन आयोगको साखमा असर पर्नसक्ने चिन्ता
नेपालका पाँचजना पूर्व प्रमुख निर्वाचन आयुक्तहरूले निर्वाचन आयोगले राजनीतिक दलको विवाद निरूपणमा ढिलाइ गरेको भनी उठेका प्रश्नहरूले आफूहरूलाई गम्भीर बनाएको जनाएका छन्।
बुधवार एउटा संयुक्त वक्तव्य जारी गर्दै पूर्व प्रमुख निर्वाचन आयुक्तहरू सूर्यप्रसाद श्रेष्ठ, भोजराज पोखरेल, नीलकण्ठ उप्रेती, अयोधीप्रसाद यादव र पूर्व कार्यवाहक प्रमुख निर्वाचन आयुक्त दोलखबहादुर गुरुङले त्यस्तो चिन्ता व्यक्त गरेका हुन्।
उनीहरूले आयोग अनिर्णयको बन्दी बन्दा मुलुकको राजनीतिक प्रक्रिया र आयोगको साखमा पर्नसक्ने असरलाई विचार गर्न आग्रह गरेका छन्।
बीबीसीसँग कुरा गर्दै पूर्व प्रमुख आयुक्त उप्रेतीले भने, "निर्वाचन आयोगले आफ्नो मैदानमा आएको भकुण्डोलाई चाँडोभन्दा चाँडो दलहरूतर्फै फर्काइदिनुपर्छ। तर त्यो नगरेको देखिएकाले हामीले संयुक्त वक्तव्य जारी गरेका हौँ।"
बुधवारमात्रै नेपाल कम्युनिस्ट पार्टीको प्रचण्ड-माधवकुमार नेपाल समूहले आफ्नो दलको आधिकारिकता विवादबारे तत्काल निर्णय गर्न आयोगको ध्यानाकर्षण गराएको थियो।
तस्बिर स्रोत, EPA
