'के देशमा साँच्चै केही नभएकै हो?' भन्दै प्रधानमन्त्रीले सुनाएको वर्ष दिनको प्रगतिमा के-के छ?

प्रधानमन्त्रीका रूपमा आफ्नो तेस्रो कार्यकालको एक वर्ष पूरा गरेको अवसरमा मङ्गलवार जनताका नाममा गरेको सम्बोधनमा पुष्पकमल दाहाल प्रचण्डले देशमा "हीनताबोध" र "नकारात्मकता" फैलिरहेको भन्दै त्यसलाई "चिन्ताजनक" बताएका छन्।

त्यसले "समाजको सिर्जनशीलता मारिरहेको" भन्दै उनले त्यसलाई "नियोजित" भएको आरोप समेत लगाए।

मङ्गलवारको सम्बोधनको सुरुमै प्रचण्डले "के देशमा साँच्चै केही नभएकै हो?" भनेर आफ्ना विवरण सुनाउन थालेका थिए।

प्रचण्डले "देश असफल नभए पनि आफ्नो हुटहुटी अनुसार परिणाम नआएको" बताएका छन्।

जसक्रममा उनले आफ्ना प्रगतिदेखि सत्ता नेतृत्वको नयाँ वर्षका लागि गर्न चाहेका कुराहरू समेत प्रस्तुत गरे। कतै उनले आत्ममूल्याङ्कनहरू समेत गरेका छन्।

प्रधानमन्त्रीले देखेका प्रगति के हुन्?

उनले गर्न चाहेका कुरा के छन्?

चुनौती

प्रधानमन्त्रीले आर्थिक वृद्धिदर सोचेकोभन्दा कम भएको स्वीकारेका छन्।

उनले समयमा आयोजनाहरू पूरा नहुँदा नकारात्मक भाष्य मात्र नबनीकन तिनको लागत बढेको र जनताले सास्ती खेप्नुपरेको बताएका छन्।

उनले ठुलो खर्च भएका पोखरा र भैरहवा विमानस्थललाई पूर्ण सञ्चालनमा ल्याउन नसकिएको बताएका छन्।

काठमाण्डू विमानस्थल सहित तिनलाई सार्वजनिक निजी साझेदारीमा ती विमानस्थल सञ्चालनमा ल्याउनेबारे आफूले सोचिरहेको पनि प्रधानमन्त्रीले बताए।

मेलम्चीको पानी काठमाण्डूवासीले उपयोग गर्ने सपना अधुरो रहिरहेको अवस्थाबारे समेत आफूले बुझेको भन्दै त्यस 'भाष्यलाई गलत साबित गर्ने' चुनौती रहेको बताए।

आफूहरूलाई 'असफल हुने छुट नभएको' बताउँदै उनले मन्त्रिहरूलाई लक्षित गर्दै भने: "कार्यक्षमता प्रमाणित गर्न नसके कसैले पनि अब ठाउँ ओगटिरहनु हुँदैन, छाडिदिनुपर्छ। यो मैले अरूलाई दिएको उपदेश मात्र होइन, आफैँसँग गरेको वाचा पनि हो।"

राजनीतिक विश्लेषक झलक सुवेदीको टिप्पणी: प्रधानमन्त्रीले भनेजस्तो आशा गर्नुपर्ने स्थिति देशमा छैन

प्रधानमन्त्रीले भनेजस्तो आशा गर्नुपर्ने स्थिति देशमा छैन। 

जनतामा निराशा छ र विभिन्न शक्तिहरूले त्यसलाई आफ्नो पक्षमा पार्ने प्रयास गर्छन्। 

गत वर्षको चुनावमा स्वतन्त्र उम्मेदवार र राष्ट्रिय स्वतन्त्र पार्टीले त्यही निराशालाई प्रयोग गरेर शक्ति आर्जन गरेका थिए। 

अहिले गणतन्त्रविरोधीहरू, धर्म निरपेक्षताका विरोधीहरू समेत सलबालाइरहेको देखिन्छ र त्यसको निम्ति निराशालाई नै हतियार बनाएको देखिन्छ।

यसमा अरूलाई गाली गर्नुभन्दा पनि स्थानीय तहदेखि नै सरकारमा रहनेहरूले जनताको पक्षमा काम गरेको देखिनेगरी सेवा प्रवाह र नतिजा दिन सक्नुपर्छ।

नक्कली शरणार्थी लगायतका केही घटनाहरूमा सकारात्मक अनुसन्धान भए पनि त्यसको अन्त्यतिर शङ्कास्पद वा त्यसलाई कमजोर बनाउन खोजिएको जस्तो सन्देश गएको छ। 

आज सम्बोधनमा प्रधानमन्त्री अझै प्राथमिकतामा अल्मरिइरहेको देखिन्छ। प्रदेश सरकारलाई गति दिने कुरामा अस्पस्टता देखिन्छ। 

औद्योगिक विकास र रोजगारीमा पनि प्राथमिकतामा नपरेको देखिन्छ। तर ३२ जनाको दलको नेताले बहुमतको सरकार चलाइरहँदा प्रचण्डबाट अपेक्षा गर्ने कुराका समेत केही सीमितता छन्। 

सरकार समाजवादी हो कि पूँजीवादी हो की उदारवादी हो वा कता जान लागेको हो भन्ने स्पष्ट छैन।

प्रधानमन्त्रीमा तेस्रो कार्यकालका महत्वपूर्ण घटनाक्रम

बीबीसी न्यूज नेपाली यूट्यूबमा पनि छ। हाम्रो च्यानल सब्स्क्राइब गर्न तथा प्रकाशित भिडिओहरू हेर्न यहाँ क्लिक गर्नुहोस्। तपाईँ फेसबुक, इन्स्टाग्राम र ट्विटरमा पनि हाम्रा सामग्री हेर्न सक्नुहुन्छ। अनि बीबीसी नेपाली सेवाको कार्यक्रम बेलुकी पौने नौ बजे रेडिओमा सोमवारदेखि शुक्रवारसम्म सुन्न सक्नुहुन्छ।