Y gweinidog tai yn hyderus gyda TAN 20
Mynegodd y Gweinidog Tai ac Adfywio, Carl Sargeant, ei hyder yng nghyhoeddiad y llywodraeth ar TAN 20 sy'n rhoi cyngor ar sut y dylai'r system gynllunio ymdrin â'r iaith Gymraeg.
Bu Mr Sargeant yn ateb cwestiynau'r aelodau ar 9 Hydref, 2013.
Yn ôl y gweinidog fe allai'r system gynllunio "helpu i greu'r amodau cymdeithasol ac economaidd sy'n rhoi cyfle i bobl siarad Cymraeg".
Dywedodd: "Mae'r TAN diwygiedig hwn yn rhoi eglurder i awdurdodau lleol ynghylch sut y dylai ystyriaethau yn gysylltiedig â'r Gymraeg gael eu bwydo i'r gwaith o baratoi eu Cynlluniau Datblygu Lleol."
Ychwanegodd: "Mae'r canllawiau yn golygu bod rhaid i awdurdodau cynllunio lleol sydd wedi nodi bod yr iaith yn bwysig yn lleol ystyried y Gymraeg fel rhan o'u Cynlluniau Datblygu Lleol yn y dyfodol. Bydd rhaid iddyn nhw hefyd ymgynghori â'r Comisiynydd Iaith wrth baratoi ac adolygu'r cynllun."
Cyhuddodd y Democrat Rhyddfrydol Aled Roberts y llywodraeth o "oedi" diogelu'r iaith Gymraeg yn y broses gynllunio.
Dywedodd: "Wrth gynhyrchu'r canllawiau newydd mae'r oedi yn golygu nad oedd y cynlluniau a baratowyd gan rai awdurdodau mor gadarn ag y gallent fod."
Fe wnaeth AC Plaid Cymru Alun Ffred Jones holi'r gweinidog ar y canllawiau ac a fyddai'r Comisiynydd Iaith Gymraeg hefyd yn gallu ymyrryd yng ngwaith awdurdodau lleol.
Cododd AC y Ceidwadwyr Suzy Davies bryderon na fyddai TAN 20 yn ehangu'r defnydd o'r iaith Gymraeg.
Pwysleisiodd y gweinidog mai TAN 20 oedd y ffordd gorau i gefnogi'r Gymraeg yn y system gynllunio, yn hytrach na chyflwyno deddfwriaeth newydd.
Bu Carl Sargeant AC hefyd yn ateb cwestiynau, ymhlith eraill, ar y dreth yr ystafell wely, mynd i'r afael â digartrefedd a chefnogi prynwyr cartrefi yng Nghymru.
