وزیر خارجه چین در تاجیکستان: به حمایت از افغانستان ادامه میدهیم
منبع تصویر، Xinhua
وزیر خارجه چین دیروز شنبه (۲۲ نوامبر- ۱ قوس) در سفری رسمی به دوشنبه، پایتخت تاجیکستان، با مقامات آن کشور از جمله رئیس جمهور و وزیر خارجه دیدار کرد؛ دو طرف در مورد همکاری «برای پیشبرد صلح، ثبات و بازسازی» در افغانستان گفتوگو کردند.
وانگ یی، که همچنین عضو دفتر سیاسی کمیته مرکزی حزب کمونیست چین است، از ۱۹ تا ۲۲ نوامبر سفرهایی به قرقیزستان، ازبیکستان و تاجیکستان داشت.
در وبسایت رسمی دولت چین آمده است که آقای وانگ به امامعلی رحمان، رئیس جمهور تاجیکستان، گفته است که: «چین آماده است تا هماهنگی با تاجیکستان را در چارچوب سازمان همکاری شانگهای و سازوکار چین-آسیای مرکزی تقویت کند، تا به طور مشترک با «سه نیروی شر» (تروریسم، تجزیهطلبی، افراطگرایی) مبارزه کنند و بنیان امنیتی مستحکمی برای توسعه و احیای هر دو کشور ایجاد کنند.»
چین با همکاری تاجیکستان در تلاش صلح، ثبات و بازسازی در افغانستان است
منبع تصویر، Xinhua
در همین روز پیش از دیدار با امامعلی رحمان، آقای وانگ با سراجالدین مهرالدین، وزیر امور خارجه تاجیکستان، دیدار جداگانه داشت.
شبکه تلویزیونی جهانی چین (CGTN) گزارش داده است که دو طرف روی «سرمایهگذاری و افزایش تجارت، افزایش روابط مردمی، و تقویت همکاریهای امنیتی گفتوگو کردند.»
به گفته این رسانه، وزیران خارجه دو کشور در پیوند با افغانستان نیز صحبتهایی رد و بدل کردهاند. آقای وانگ گفته است که «افغانستان همسایه مشترک چین و تاجیکستان است و چین در همکاری با تاجیکستان برای پیشبرد صلح، ثبات و بازسازی در این کشور ادامه خواهد داد.»
روزنامه چاینا دیلی هم نوشته است که «وانگ با اشاره به اینکه افغانستان همسایه نزدیک هر دو کشور چین و تاجیکستان است، گفت که چین به تقویت هماهنگی با تاجیکستان در مسئله افغانستان و حمایت از افغانستان برای پیشبرد بازسازی و توسعه ادامه خواهد داد.»
چین روابط گرم با حکومت طالبان دارد و سفیر اینکشور را در بیجنگ پذیرفته است.
تاجیکستان هم در حال احیای روابط خود با حکومت طالبان است.
تاجیکستان حکومت طالبان را به رسمیت نمیشناسد، اما دو طرف اخیرا دیدارها و رفتوآمدهای سیاسی داشتهاند.
یک هیئت تاجیکستانی در سفری چند روزه، شنبه (۲۴ عقرب/۱۵ نوامبر) وارد کابل شد که گفته میشد نمایندگانی از وزارتهای خارجه و امنیت تاجیکستان در آن حضور داشتند.
