Llyfr hynaf yr iaith Gymraeg yn dyddio'n ôl i'r flwyddyn 1250 yw canolbwynt sioe agoriadol Eisteddfod Genedlaethol yr Urdd 2007.

Acyn amlwg, mae i Lyfr Du caerfyrddin gysylltiad uniongyrchol â thref yr Eisteddfod.

Llawysgrif o farddoniaeth yw'r Llyfr Du ac yn cael ei gadw yn y Llyfrgell Genedlaethol yn Aberystwyth.

Ac at y Llyfr Du y trodd y ddau brifardd, Mererid Hopwood a Tudur Dylan Jones, ar gyfer llunio'r sgript ar gyfer y cyngerdd a fydd yn cael ei lwyfannu yn y pafiliwn nos Sadwrn, Mai 26, 2007.

Cefin Roberts fydd yn cyfarwyddo gyda nifer o berfformwyr cyfarwydd yn chwarae rhannau blaenllaw.

"Mae'r arlwy o gyngherddau sy'n aros Eisteddfodwyr 2007 yn wych," meddai Siân Eirian, Cyfarwyddwr yr Eisteddfod.

"Mae'r Cyngerdd Agoriadol yn sicr o fod yn brofiad theatrig gwefreiddiol i'r gynulleidfa ac yn gychwyn haeddiannol iawn i'r Eisteddfod," meddai Sian Eirian sy'n llywio ei heisteddfod genedlaethol olaf gyda'r Urdd cyn cychwyn ar waith newydd gydag S4C.

Dagrau'r Coed

Nos Sul a nos Lun yn Theatr y Lyric, Caerfyrddin, bydd disgyblion ysgolion uwchradd yn cyflwyno Dagrau'r Coed gan Siwan Jones a Catrin Dafydd gyda . Charys Edwards yn cyfarwyddo.

Pren Braf

Nos Fawrth a nos Fercher perfformir O, Bren Braf gan y plant lleiaf.

Yr awduron yw Elinor Wyn Reynolds a Fflur Dafydd gyda Delyth Mair Nicholas a Dafydd Hughes yn cyfarwyddo.

Cydweithio eto

Dywedodd Siân Eirian i'r Urdd gydweithio o'r blaen gyda nifer o'r cyfarwyddwyr.

"Carys Edwards yn fwyaf diweddar gan mai hi oedd un o gyfarwyddwyr y sioe hynod lwyddiannus, Les Miserables yng Nghanolfan y Mileniwm yn 2005.

Rhif y llinell docynnau yw 0845 257 1639 neu ymwelwch â gwefan yr Urdd.