Neges gyson gan y ddwy Eisteddfod Genedlaethol yw bod eu hymweliadau o les i'r gwahanol ardaloedd.

Eleni dywed yr Urdd y bydd Sir Gaerfyrddin £6.5m ar ei hennill yn dilyn ymweliad yr ŵyl.

Dywed y trefnwyr disgwylir dros 100,000 o ymwelwyr ac yn ôl ymchwil mewn eisteddfodau blaenorol bydd 70% o'r rhain yn ymweld â'r ardal gyfagos hefyd.

"Dengys yr ymchwil hefyd fod 30% o'r ymwelwyr yn aros am o leiaf un noson yn yr ardal a 78% yn gwario arian mewn busnesau lleol," meddai datganiad gan yr Urdd.

"Canlyniad hyn oll yw fod yr Eisteddfod yn cyfrannu dros £6.5 miliwn i'r economi leol," ychwanega.

'Yn gyfle gwych'

Ac meddai Iwan Evans o Fenter iaith Taf Myrddin: "Mae'r Eisteddfod yn gyfle gwych i gwmnïau lleol ond er mwyn manteisio i'r eithaf ar y cyfle, mae gofyn i fansachwyr baratoi ar ei gyfer a sicrhau eu bod yn barod i ymdopi â'r galw fydd arnynt."

I'r diben hwnnw bu Menter Taf Myrddin yn cydweithio â nifer o gyrff eraill megis yr Urdd, y Siambr Fasnach, Cyngor Tref Caerfyrddin a Bwrdd yr Iaith Gymraeg i sicrhau cyfleodd i fansachwyr lleol ddod at eu gilydd cyn wythnos yr Eisteddfod i gasglu gwybodaeth a sicrhau eu bod yn barod i groesawu Eisteddfotwyr 2007.