Yr oedd y beirniaid yn hael eu canmoliaeth i'r gwaith celf a gyrhaeddodd faes yr Eisteddfod o bob rhan o Gymru ddechrau Ebrill.

Dywedodd Ifan Prys, Trefnydd Cynorthwyol Eisteddfod yr Urdd, i ymgeision ddod i law o 16 o ranbarthau i gyd a'r rheini wedi bod yn fuddugol yn barod mewn rowndiau cynradd a sirol.

Tair mil

Gyda rhyw dair mil o ymgeision wedi dod i law ar y cychwyn ychydig dros fil o'r rheini gyrhaeddodd y rownd genedlaethol a chyhoeddir enwau'r enillwyr ddechrau wythnos yr Eisteddfod ddiwedd Mai.

Yr oedd mwy nag un beirniad wedi ei blesio. Meddai Mari Thomas, beirniad y gemwaith: "Mae'n gyffrous iawn i weld cymaint o waith diddorol, a digon i ddewis ohono. Mae'r safon yn dda iawn."

Cerdd Mererid Hopwood

Yr oedd categorïau yn amrywio o grochenwaith i luniadu, gemwaith, dylunio a thechnoleg, pypedau, caligraffeg ac argraffu - gyda'r ymgeiswyr i gyd wedi cyfansoddi gwaith ar thema cerdd Fy Ngwlad gan Mererid Hopwood:

Pe gallwn i weld Cymru drwy lygad du y frân, A chlywed ddoe a'i hanes yn llais yr awel lân;
Pe gallwn fynd i'r lleuad i ofyn i'r hen ŵr
Am gip ar antur fory yn wyneb llyfr y dŵr;
Mi luniwn i ei stori er mwyn ei chadw'n fyw,
Rhown ffurf i bob un arwr ac i bob cân rhown liw;
Mewn paent rhown bob pencampwr, pob llenor a phob sant,
Mewn brodwaith rhown gerdd-dafod, mewn desglau rhown gerdd-dant.
I gofio beth yw'n cenedl ni
A dysgu deall pwy wyf i.

Arddangosfa

Bydd y darnau buddugol i'w gweld mewn arddangosfa ar y maes yn ystod wythnos yr eisteddfod.

Hefyd, bydd y Fedal Gelf yn cael ei chyflwyno yn ystod y seremoni agoriadol ddydd Llun yr Eisteddfod am yr eitem orau gan ymgeisydd dan 17 oed.

Meithrin talent

Pwysleisiodd Efa Gruffudd Jones, Prif Weithredwr yr Urdd, bwysigrwydd meithrin talentau yn y maes hwn:

'Mae'r Urdd yn ymfalchïo ein bod yn meithrin talentau celfyddydol trwy gyfrwng Celf, Dylunio a Thechnoleg.

"Mae meithrin dawn greadigol yr un mor bwysig â'r holl dalentau eraill y mae'r Urdd yn eu datblygu.

"Mae gan yr Urdd dros 60 o gystadlaethau Celf, Dylunio a Thechnoleg ac ymfalchïwn bod y safon yn arbennig o uchel bob blwyddyn," meddai.

Mewn Cystadleuaeth Portffolio i rai rhwng 18 - 25 bydd y cyntaf, ail a thrydydd yn cael eu hystyried ar gyfer Ysgoloriaeth Celf, Dylunio a Thechnoleg gwerth £2,000 dan nawdd y Dr Dewi Davies.