Mae'n bwysig cydweithio os ydych yn aelod o grŵp trafod. Gwnewch yn siŵr eich bod yn cofio'r pwyntiau yma:

Ydych chi wedi...

• gwrando ar eich gilydd?
• ymateb i gyfraniadau eich gilydd?
• dechrau eich brawddegau'n wahanol ac yn ddiddorol?
• rhoi cyfle i bob aelod o'r grŵp gyfrannu?
• gofyn cwestiynau i'ch gilydd?
• ychwanegu at gyfraniadau eich gilydd?
• mynegi eich barn yn glir?
• dod â'r wybodaeth at ei gilydd?
• dod i benderfyniad terfynol?

Weithiau mewn trafodaeth, bydd rhaid i chi holi person arall, gan ofyn cwestiynau er mwyn cael gwybodaeth penodol.

Y gadair goch

Er mwyn holi'r person hwnnw, fe allwn ei holi tra ei fod yn eistedd mewn cadair arbennig - sef y gadair goch.

Weithiau, fe all y person yn y gadair goch esgus fod yn gymeriad arall e.e. Dafydd Elis Tomos (Llywydd Cynulliad Cenedlaethol Cymru), Harri Morgan, Mari Jones o'r Bala neu actor teledu neu ffilm.

Mewn tasg o'r fath, mae'n bwysig peidio â mynegi eich barn bersonol chi ond yn hytrach y cymeriad yr ydych chi'n esgus ei actio. Fe allwn ni gael hwyl yn gwisgo dillad y byddai'r cymeriad hwnnw'n ei wisgo neu drwy siarad yn union fel y byddai'r cymeriad hwnnw'n ei wneud!

Mae'n bwysig ystyried beth yw safbwynt y person, a rhaid meddwl am bwyntiau da i gefnogi'r safbwynt.

Cwestiynau agored

Cofiwch ei bod yn bwysig gofyn cwestiynau agored hefyd. Mae hyn yn bwysig fel ein bod yn cael gwybod mwy am y pwnc dan sylw.

Fe allwch chi ofyn cwestiynau agored tebyg i'r rhain i ddisgybl sy'n esgus bod yn Mari Jones:

Mae cwestiynau agored yn gofyn am ymateb sy'n rhoi mwy o wybodaeth na chwestiwn caeëdig. Mae'n rhoi cyfle i'r person sy'n ymateb i siarad mwy - nid yw 'Ie' neu 'Ydw' yn ateb digonol.

Cwestiynau caeëdig

Mae cwestiynau caeëdig ar y llaw arall yn gofyn am ymateb syml a byr . Yn aml, mae 'Ie' neu 'Ydw' yn ddigonol. Maen nhw'n ffordd dda o gael gwybodaeth mewn ffordd syml ac uniongyrchol.

Dyma rai cwestiynau agored a chaeëdig y gallech eu gofyn i Harri Morgan:

Cofiwch hefyd ymestyn eich ateb drwy ddefnyddio 'oherwydd' neu 'achos'!