e-Gofnod Glyn Wise o'i wythnos yn cyd-gyflwyno C2

Llun 6 Tachwedd 2006
Codi bore ma am ddeg o'r gloch, mae gen i annwyd oherwydd heb gael amser i fi fy hun ers gadael ty'r Brawd Mawr, felly nes i fynd allan i siopa ac i brynu ffisig, menyg a sgarff a het, a cefais ddiod o oren a pastra efo gorgimwch ynddo fo i ginio.

P'nawn ma es i draw i wersyll yr Urdd yn y bae, a cael tynnu fy llun efo Mr Urdd a llawer o blant. Yna es i i weld Dafydd Iwan yn y Cynulliad i geisio cael pobl ifanc rhwng 18 - 25 oed i bledleisio i Blaid Cymru yn yr etholiad nesaf. Nes i fwynhau yn enfawr.

Am bump o'r gloch, nes i gyfarfod Sian Alaw a aeth a fi i stiwdio C2 yn y BBC, lle nes i fwynhau fy hun, yn cyd-gyflywno efo Dafydd Du. Sioe Siartiau oedd ganddo ni heno, a nes i fwynhau gwrando a cyflwyno cerddoriaeth gan Bodyrox, Frizbee a Poppies.

Edrych ymlaen ar gyfer gweddill yr wythnos yma ar C2, pan ga i'r cyfle i ddewis fy hoff gerddoriaeth i, a dim cerddoriaeth sydd yn y siartiau, felly gwyliwch allan am hen glasuron Glynaidd!!

Diolch yn fawr am wrando, a diolch am eich cefnogaeth dwi'n ei gael bob diwrnod , mae'n meddwl gymaint i mi, a diolch i bawb wnaeth gysylltu heno.
Wedi blino rwan, yn nol i'r gwesty a fi i gael mwy o ffisig i'r ffliw.
Edrych ymlaen i fynd i Jumpin' Jacks nos fory a hefyd cyflwyno efo Daf Du a Ebbzy ar C2 nos fory.

Nos Da Glyn xxxx

Mawrth 7 Tachwedd 2006
Deffro bore 'ma yn y gwesty tua hanner awr wedi naw, a mynd lawr i gael brecwast (oedd yn neis iawn). Wedyn ganol bore es i draw i weld fy ffrindiau Gwion a Branwen sydd yn y coleg yma yng Nghaerdydd, a tra on'i yno ges i gyfle i fynd ar y we i edrych ar fideos ohonai yn nhy'r Brawd Mawr! (tydw i heb weld llawer o'r rhaglen, gan fy mod mor brysur ar hyn o bryd!)

Mi aeth Gwion a fi allan am ginio, a mi ges i fy hoff fwyd sef brechdan caws a colslo a creision blas halen a finag - mm neis!.
Yn y p'nawn wedyn nes i fynd i siopa a prynu llwyth o bethau neis, fatha 'chain' efo croes arian arno fo, 'beads', het arall a dillad isaf sydd lot rhy fawr i fi!

Am hanner awr wedi pump ges i dacsi o'r gwesty fyny i swyddfa C2. Roedd rhaglen heno yn arbennig o dda, nes i fwynhau cyd gyflwyno ef Dafydd Du a Dylan Ebenezer. Trafod chwaraeon oedden ni heno rhanfwyaf, ond oedd Daf a Dylan yn siarad gormod am beldroed. Yr unig beth dwi'n ei wybod am beldroed ydi fod Ryan Giggs yn chwarae i Gymru! Mi oedd yr ymateb heno yn wych, diolch i bawb wnaeth gysylltu efo negeseuon, a diolch i'r llwyth o wrandawyr di-Gymraeg oedd yn gwrando ar y rhaglen ar y we o lefydd fatha Lerpwl a Stoke am e bostio'r rhaglen.

Ar ôl gorffen ar C2, ges i lifft yn ôl i'r gwesty gan Daf Du, ac yn disgwyl amdanai yno oedd fy rheolwr, oedd yn mynd i fynd a fi i Jumpin' Jaks erbyn hanner nos. Ges i amser arbennig o dda yno. Ar ôl cyrraedd mi wnes i fynd yn syth i'r ardal VIP a cael potel o siampen! Wedyn mi oedd yn rhaid i fi berfformio. Es i ymlaen i'r llwyfan i thema agoriadol Baywatch a dawnsio ar y llwyfan a tynnu fy nghrys. Wedyn mi nes i gymeryd rhan mewn gem oedd yn ymwneud efo aelodau o'r gynulleidfa a balwns!! Mi oedd y gynulleidfa heno yn wyllt!

Mi oedd hi wedi tri o'r gloch y bore arna'i cyrraedd yn ôl i'r gwesty, a mi oeddwn i'n gysgu'n braf erbyn pedwar.

Hwyl
Glyn xxx

Mercher 8 Tachwedd 2006
Codi bore mae yn y gwesty am 8 o'r gloch. Neithiwr ar ol bod yn Jumpin Jaks mi wnaeth Eryl a Gwion fy ffrindiau aros y noson. Tra'n cael brecwast yn y bore mi wnes i dorri'r peiriant sudd oren (heb drio!) a roeddwn yn teimlo'n sâl ar ol bod allan neithiwr. Mi ges i lawr o sylw yn y gwesty bore ma, llwyth o bobl eisiau fy llun, a finau ddim yn edrych ar fy ngorau.

Ar ôl i fy ffrindiau fynd i'r coleg, penderfynais fynd yn ôl i'r gwely tan 1 o'r gloch. Nes i fynd i swyddfa ITV Wales amser cinio i hyrwyddo y ffaith fy mod i yn dewis pwy sy'n ennill cystadleuaeth cardiau Nadolig i blant. Nes i aros yno am fy nghinio hefyd.

P'nawn ma mi fues i ar y ffon efo fy asiant am dros awr yn trafod fy nyfodol.
Mi ddes i draw i swyddfa C2 erbyn 5.30 er mwyn recordio cyfweliad efo BB Aled. Ar ol cinio neis yn y cantin, es i nol i'r swyddfa a dechrau mwydro criw C2.

Mi wnes i fwynhau'r rhaglen heno yn fawr iawn, mi oedd y cwis pop yn hwyl. Llongyfarchiadau Brynrefail!
Ar ôl y rhaglen es i draw i Glwb y BBC efo criw C2, cyn mentro fewn i'r dre. Noson dda iawn! Nos da a diolch am wrando ar y rhaglen a darllen fy nyddiadur.
Cariad
Glyn xxx

Iau 9 Tachwedd 2006
Ar ôl noson fawr neithiwr, nes i ddeffro am 9.30 y bore i gael brecwast - ges i rice crispies a melon - ond ddim yn yr un bowlen! Wedyn nes i fynd am gyfweliad gyda chylchgrawn Red Handed. Fe wnaethant dynnu lawer o luniau - ac roedd rhaid i fi edrych yn moody! (ha ha!)

Ar ôl hynny, es i i gael tan-ffug. Roedd yn rhaid i fi sefyll yn hollol noeth tra roedd y peiraint yn chwistrelli mwg brown ar hyd fy nhgorff. Nes i chwerthin drwyddo ac aeth y mwg i mewn i fy nheg ac roedd gen i dafod brown erbyn gada'l! Dwi'n impressed iawn â'r tan, a fyswn i'n neud e eto.

Es am ginio i Hard Rock Cafe cyn mynd i Ysgol ail-iaith Gymraeg yng Nghaerdydd. Roedd rhaid i fi ateb cwestiynau a chanu'r Gân Wy. Ddes i nôl i'r gwesty am 5 cyn cael tacsi i swyddfeydd moethus C2, Radio Cymru lle roedd y criw yn aros amdanai.

Pan es i lawr i'r stiwdio nath Daf Du roi her i fi i gyfweld â Owain o Ffeil. Roeddwn ni ychydig bach yn nerfus ond pan ddaeth Owain mewn, nes i rili fwynhau ei holi. Ddwedodd Daf Du a'r cynhyrchydd bo fi wedi g'neud job dda! Nes i hefyd sgwrsio gyda Magi D am y newyddion cerddororol diweddara'.

Noson allan i fi heno eto - dwi'n mynd i Clwb Ifor Bach gyda fy ffrind - sy' hefyd yn Jen Jeniro. Fyddai'n gadael chi wybod y gossip i gyd fory! Tan hynny - diolch am ddarllen - ac am wrando!
Hwyl!
Glyn xxx

Gwener 10 Tachwedd 2006
Teimlo bach yn wan bore ma, ar ôl bod allan neithiwr. Roedd rhaid i fi fynd i ffilmio efo Hacio bore ma, rhaglen sy'n cael ei ddarlledu ar S4C digidol ar y 7fed o Ragyfr. Roedd rhaid i fi orwedd ar wely efo Lisa Pedrick tra'n cael fy nghyfweld am y cyfryngau.

Yna ddes i'n syth i stiwdio am 3 i wneud cyfweliad efo Owen Money ar gyfer Radio Wales. Roeddwn wedi blino'n lân yn ystod y cyfweliad.
Ar ôl dod i fyny i swyddfa C2, fe aeth Mair a fi i stiwdio 5 i recordio sgyrsiau efo Richard, Lea, Lisa, Grace a Imogen ar gyfer rhaglen heno. Roedd yn hwyl!

Bach yn drist am ddeg o'r gloch heno gan fod fy wythnos ar C2 wedi dod i ben. Dwi wedi mwynhau yn fawr wythnos yma efo'r criw, ac wedi joio cyflwyno drwy'r wythnos, ac yn edrych ymlaen i ddod yn ôl yn fuan.

Dwi yn mynd i Casnewydd rwan, i wneud ymddangosiad mewn clwb nos. Yn Llundain fyddai dros y penwythnos, ac yna wythnos brysur arall o'm mlaen.

Diolch yn fawr i bawb am darllen fy nyddiadur, a hefyd i bawb sydd wedi bod yn gwrando a cysylltu efo C2 drwy gydol yr wythnos. Cofiwch i gario mlaen i wrando.
Diolch eto
Cariad Mawr
Glyn xxxx

Mynd yn ôl i brif dudalen wythnos Glyn Wise